မတ်မလီု ၊ ဂျာန်နဝါရဳ ၁
ကဝ်မယှေန်ပၞာန်သီအဝဵု သွက်ဂွံကၠောန်အာ ပေါဲရုဲမာဲသ္ကုတ် ၂ တွဵုရးမန် ပွိုၚ်ဍုၚ်ၜါဒၞာဲဂှ် အကြာၜါလပါ်ပရေၚ်ပၞာန် ကြံၚ်မ္ၚိုဟ်မံၚ်တုဲ ပေါဲဗတိုက်ကလေၚ်ဒှ်မံၚ်ရောၚ် ညးဒေသတံကဵု ဒပ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စိုပ်ကၠုၚ်ဂျာန်နဝါရဳ ၁၁ မ္ဂး ပ္ဍဲတွဵုရးမန် ပေါဲရုဲမာဲသ္ကုတ် ၂ ဂှ် သွက်ဂွံကၠောန်အာ ပ္ဍဲပွိုၚ်ဍုၚ်ၜဳလေၚ်၊ ပံၚ်၊ မုဟ်ဍုၚ်၊ ဇြပ်ဗုကဵု ရေဝ် တံရောၚ်။
ပ္ဍဲအကြာတ္ၚဲတံဏံဂှ် ပ္ဍဲကဵုပွိုၚ်ဍုၚ်ၜဳလေၚ်ကဵုပွိုၚ်ဍုၚ်ရေဝ် ပေါဲဗတိုက်ဒၞာဲလ္ၚဵု ကလေၚ်ဒှ်လဝ်ရ။
ကၠာဟွံစိုပ်ပေါဲရုဲမာဲဏီ ဒပ်ကဝ်မယှေန်ပၞာန် ထပက်ကရောၚ်ပၞာန်ဂှ်ရ အကြာၜါလပါ်ပေါဲဗတိုက်ဒှ်မံၚ်ရောၚ် ကောန်ဂကောံဒပ်ပၠန်ဂတး နူကဵုပွိုၚ်ဍုၚ်ၜဳလေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပြဟ်ဟ်ဏံ ပေါဲဗတိုက်သ္ကာတ်မြဟ်မံၚ် ဟီုစဂွံရ။ ရဲလပါ်ကဝ်မယှေန်ပၞာန်တံလေဝ် ပဵုဂၠိုၚ်တိုန်။ ကၠာဟွံစိုပ်ပေါဲရုဲမာဲဂှ် ဍေံတံဒစးဒုၚ် ဒၞာတာလဝ် စိုပ်ကၠုၚ်ဒၞာဲစေဝ် တိဍာ်ဗၠးၜးတံရ။ ဍေံတံလုပ်စိုပ်ကၠုၚ်ဒၞာဲစေဝ်တံဏံတုဲ ပေါဲဗတိုက်ဒှ်အာ။ ညံၚ်ဂွံဒှ်ပေါဲဗတိုက် ပိုဲတံဒးကၠောန်အာဏောၚ်” သာ်ဝွံသ္ဂးရ။
ကၠာဟွံစိုပ်ပေါဲရုဲမာဲသ္ကုတ် ၂ ဏီ ဒပ်ကဝ်မယှေန်ပၞာန်တံ ထပက် ကရောၚ်ပၞာန် အဆက်ဆက်ကီု၊ ဗက်ပန်ခြော်မံၚ်ကဵုလွဟ်ဇၞော် ကြာန်န်၊ ဒၞာဲဂၠံၚ်ဍာန်ဒပ်ပၠန်ဂတးတံ အာကၠုၚ်လေပ်ဂှ် ဗက်စွံ ကၚ်ဒမၠုက်တံနွံတုဲ ညးဍုၚ်ကွာန်တံပရေၚ်မံၚ်စံၚ် ထေက်ကဵုဒးစွံသတိညိဂှ် ညးဆက်ဟီုရ။
ပေါဲဗတိုက်ခြာတ္ၚဲဆက်ဒှ်မံၚ်တုဲ ဒးမံၚ်အာမံၚ်ဖေက်က်ရဏောၚ် ညးဒေသဍုၚ်ရေဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပေါဲဗတိုက်ဒှ်မံၚ်အရိုဟ်တ္ၚဲဟွံသေၚ်ပုဟ်။ ခြာမွဲတ္ၚဲ ခြာၜါတ္ၚဲတုဲ ဒှ်မံၚ်။ ကရောၚ်ပၞာန်ထပက်မံၚ် ဂွံပရိုၚ်တုဲ ပေါဲဗတိုက်ဒှ်။ ဒးမံၚ်အာဖေက်က်ရ။ ပရေၚ်စသုၚ်လေဝ်မံၚ်စံၚ်လေဝ်ဟွံဒးဗီု ကမၠောန်လေဝ်ဟၟဲ ပေါဲဗတိုက်ဂှ်မွဲအမှု ပန်မံၚ်ဟဂှ်” သာ်ဝွံ သ္ဂးရ။
မွဲလပါ်ပၠန်ကဝ်မယှေန်ပၞာန် သွက်ဂွံကၠောန်အာပေါဲရုဲမာဲသ္ကုတ် ၂ မာန်ဂှ် စကာလဝ်ဇြဟတ်ပၞာန်ဂၠိုၚ်ၚ်တုဲ ထပက်မံၚ်ကရောၚ်ပၞာန်ကီု တြးလဝ်ဒပ်လ္တူဍုၚ်သၟးဟွံက ပရေၚ်ဂီုကၠီုရုၚ်မာဲတံဂှ်လေဝ် သၠုၚ်လဝ်ပရေၚ်ဂီုကၠီု မဒှ်ရ။
ပ္ဍဲတွဵုရးမန်ပေါဲရုဲမာဲသ္ကုတ် ၁ ဒဳဇြမ်ပါ ၂၈ ကၠောန်လဝ် ပ္ဍဲပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံတုဲ ဗော်ပျဳခိုၚ်ဖျိုဝ်ဒပ်ပၞာန်ဗမာတံ ဂွံဇၞးလဝ်မာဲဂၠိုၚ်အိုတ်သ္ဂးရ။
ပရိုၚ်-သြၚ်လောန်တိုၚ်မ်
Photo – MOI