လ္ဂုၚ် ၊ ဂျာန်နဝါရဳ ၁
ပ္ဍဲကဵုဍုၚ်ဗမာ ကၠောန်အာပေါဲရုဲမာဲ သ္ကုတ်ကဵုသ္ကုတ်တုဲဒှ်မ္ဂးကဵုအာ အရီုဗၚ်ပရေၚ်ၜိုဟ်လလမ် ပဵုတုဲဂွံညိၚ်ဝပ်ကေုာံ သွက်ပရေၚ် ကလေၚ်ညဳသၟဟ်မာန်ရဂှ် ပတေဟ်လဝ်ရောၚ် နူရုၚ်ကလုတ်ကြုက် ဍုၚ်ဗမာ လလောၚ်ပတိတ်ပရိုၚ်ရ။
ပ္ဍဲဒဳဇြမ်ပါ ၂၈ စပ်ကဵုကၠောန်လဝ်ပေါဲရုဲမာဲ ပ္ဍဲကဵုဍုၚ်ဗမာတုဲ ညံၚ်ဂွံတီအာလစွံစိုတ် ဍုၚ်ကြုက်ဂှ် အစာပရိုၚ်နူကဵုဌာန်ပရိုၚ် CGTN သၟာန်ဏာဂှ် ညးအခေါၚ်ဟီုဂးနွံ ဌာနဝန်ဇၞော်ဍုၚ်သ္အာၚ်ကြုက် လေၚ်ဂျုၚ် သှ်ကဵုလဝ်ရ။
ဂကောံမၚ်ရံၚ်လ္ၚတ် ပေါဲရုဲမာဲဍုၚ်ကြုက်တံ ကၠုၚ်ကျောဝ်ဗဵုလဝ်ပေါဲရုဲမာဲ နကဵုမတ်ညးတံတုဲ ပရေၚ်ကဵုမာဲ ကလိတ်ကလောတ်တုဲ ဟိုတ်နူဖျေံလဝ်ဗီုချိုတ်ပၠိုတ်ဂှ်ရ စကၠောန်အာဗွဲမအံၚ်ဇၞးမာန်ကၠုၚ် သ္ဂးရ။
ပေါဲရုဲမာဲသ္ကုတ်သှ်ေမံၚ်ဂတဏံလေဝ် ညံၚ်ဂွံအံၚ်ဇၞးကၠောန်အာတုဲ အကာဲအရာဍုၚ်ဗမာသွက်ဂွံကလေၚ်ညိၚ်ဝပ်၊ ပရေၚ်ကြံၚ်မ္ၚိုဟ်မံၚ်တံ ညံၚ်ဂွံယအ်စှ်ေ၊ ဂၠံၚ်ဍာန်ပရေၚ်ဍုၚ်ကွာန် ညံၚ်ဂွံစိုပ်အာအကာဲအရာဍာံပၠန် ထံက်ပၚ်ကဵုအာမာန်ရောၚ် ဟီုရ။
တုဲပၠန် ပရေၚ်ၜိုဟ်လလမ် ပဵုတုဲညံၚ်ဂွံသၠဲလးကေုာံ သွက်ပရေၚ်ကလေၚ်ညဳသၟဟ်တံ ရီုဗၚ်ကဵုအာမာန်ရောၚ် ပတေဟ်ကေတ်တုဲ သွက်ဍုၚ်ဂွံညိင်ဝပ်ကေုာံပရေၚ်ဖေအ်ဗြဳတဴတက်တံ ညံၚ်သ္ဂောံဂွံဗွဲမပြဟ်မာန် ဒှ်အထံက်ပၚ်ရောၚ် နကဵုဍုၚ်ကြုက်စၟဳစလဝ်ရောၚ်။
ပ္ဍဲပေါဲရုဲမာဲဏံလောန်ၜက်အာမ္ဂး တၠုၚ်လအာအကာဲအရာ ဗီုပြင်ဒပ်ကောန်ဍုၚ်ပၠန်ဂတးတံကဵု ဒပ်ရပ်လွဟ်တမ်ကညၚ်တံ တၞဟ်ခြာအာမာန်ရောၚ် CDM ဗိုလ်ဇၞော်ဇြေန်ယဝ် သ္ၚဳဂၠိပ်ရ။
“ EAOs ညးတံ ဗွဲအပြောံ သဳကၠဳအာကဵု ဒပ်ပၞာန်ဗမာလေဝ်ဒှ်မာန်။ ဒေါအ်ပန်ပှော်ဏောၚ်။ အခေါၚ်ပရေၚ်အုပ်ဓုပ်ဂှ် နူကဵုစၠတ်ဓဝ်မွဲအဆံၚ် ဗီုပြၚ်အာတ်မိက်အာလေဝ် ဒှ်မာန်။ ဆဂး မွဲနဲမွဲဗီု ဆက်ကဵုမံၚ်ပၠန်ဂတးပၠန်ဏောၚ်။ အေဂှ်တှ်ေ ဂကောံရပ်လွဟ်မံက်တိုန်လဝ်လက်ကရဴ ၂၀၂၁ တံ ပေါဲဗတိုက်ဗီုပြၚ်အပိုၚ်အခြာ ဆက်ဒှ်အာမာန်ဏောၚ် အဲခယျ” သာ်ဝွံ သ္ဂးရ။
ဒပ်ပၞာန်ဗမာသီအဝဵု ၂၀၂၁ တုဲ ဗွဲကြဴဂကောံပၠန်ဂတး မံက်တိုန်ကၠုၚ် ပ္ဍဲကဵုပေါဲဗတိုက် ထပိုတ်ရိုဟ်ကၞက်သၠောတ်တၠအဝဵုပၞာန်တံဂှ် ဂကောံကောန်ဍုၚ်အရၚ်ရပ်လွဟ် EAOs ဇြဟတ်ဇၞော်ဇၞော်တံလေဝ် ပါလုပ်လဝ်ကီုရ။
အပ္ဍဲဏံ ဂကောံဆက်စပ်မံၚ်ကဵုအလဵုအသဳကြုက် ဒပ်ကိုဝ်က MNDAA ကဵု ဒပ်တအာၚ် TNLA တံလေဝ် မွဲကရောံကဵု PDF တံပါလုပ်ကၠုၚ် ပ္ဍဲကဵုပၠန်ဂတးတမ်ကညၚ်မွဲစွံရ။
အပ္ဍဲကဵုပေါဲဗတိုက်ထပိုတ်ရိုဟ်ကၞက် သၠောတ်တၠအဝဵုပၞာန် လဝေၚ်ပၞာန်ဂကောံကောဒေံပိ ၁၀၂၇ ဂှ် ထပက်သရိုဟ်လဝ် ဂၞဴဂြိုဟ်ဒပ်ပၞာန်ဗမာ သီုကဵုပရေၚ်ဗတိုက်သၠေက်ကျာဖျကီုတုဲ ဒပ်ပၞာန်ဗမာ ဒးဗလးထောံလဝ် တိဍာ်ဗွဲမဂၠိုၚ်ရ။
ဆဂး အလဵုအသဳကြုက် ထ္ၜးဟိုတ်ပရေၚ်ဒေသပယျဵုဂွံညိၚ်ဝပ်ဂးတုဲ စပ်ကဵုပရေၚ်ဍုၚ်ဗမာဂှ် နူကဵုလက်ကရဴ ဗက်လုပ်ဖန်ဖက်ကၠုၚ်ကီု ကဵုတိုန်ဇြဟတ်ဟရိုဟ် ဒပ်ကိုဝ်က MNDAA ကဵု ဒပ်တအာၚ် TNLA ပါလုပ်မံၚ်ပ္ဍဲကဵု ပၠန်ဂတးတမ်ကညၚ်တံရ။
ဟိုတ်ဂှ်ရ ဂကောံပၠန်ဂတးၜါဂကောံဏံကဵု PDF တံ ပ္ဍဲကဵုလဝေၚ်ပၞာန် ၁၀၂၇ ထိၚ်ချုက်ဂွံလဝ်ဍုၚ်လ္ၚဵုတံဂှ် ပြဟ်ဟ်ဏံ ဒးကလေၚ်ပအပ်ကဵုဒပ်ပၞာန်ဗမာတုဲ ကၠောန်လဝ်ဒေါအ်ပန်ပှော်ရ။
ပ္ဍဲအကာဲအရာဏံ ဒပ်ကောန်ဍုၚ်အရၚ် ထိၚ်ချုက်ဂွံလဝ်တိဍာ် နူကဵုစၠတ်ဓဝ်ပေါဲရုဲမာဲဏံတုဲ ပါ်ပရအ်ကဵုပယျဵုတိဍာ်မာန်မ္ဂး ပေါဲဗတိုက်တံညိၚ်အာမာန်ရောၚ် ဗိုလ်ဇၞော် CDM ဇြေန်ယဝ် ဟီုရ။
ဆဂး ဟိုတ်နူပရေၚ်ပါ်ပရအ်တိဍာ်တုဲ အကြာမွဲလပါ်ကဵုမွဲလပါ် ကလေၚ်ဒှ်ကၠုၚ်ပေါဲဗတိုက်မာန်တုဲ မွဲလပါ်ပၠန် အတိုၚ်အစဳဇန် အလဵုအသဳကြုက် ဖန်ကၠောန်မံၚ်လက်ကရဴတေံရောၚ် ညးထံက်ထ္ၜးရ။
အကြာဒပ်ပၞာန်ကဵု ဂကောံမဟာမိတ်ကောဒေံပိ ပ္ဍဲကဵုဆဵုဂဗတက်လဝ်ကျာ အခိၚ်လဝေၚ်ပၞာန် ၁၀၂၇ သ္ကုတ်ပထမဂှ် ကြုက်လုပ်အကြာ စပ္ညဳပ္ညပ်ကဵုလဝ်တုဲ ဗွဲကြဴဟိုတ်နူဇြဟတ်ဟရိုဟ် အလဵုအသဳကြုက်ဂှ် ဒပ်ကိုဝ်ကကဵု တအာၚ်တံ ဒေါအ်အာ ပ္ဍဲပၠန်ဂတးတမ်ကညၚ်ရ။
ဂကောံကောန်ဍုၚ်အရၚ်ရပ်လွဟ်ပၠန်ဂတး ဒပ်ပၞာန်အာရက္ခ AA၊ ဒပ်ပၞာန်ဗၠးၜးကချေၚ် KIA၊ ဗော်သွးကောန်ဂကူကရေၚ် KNU၊ မုက်ဒပ်ကောန်ဂကူချေၚ် CNF ကေုာံ ဗော်တဴတက်ကရေၚ်ဍာဲ KNPP တံဂှ် ဆက်လုပ်အာမံၚ် ပေါဲဗတိုက်တမ်ကညၚ်ဖိုအ်ရ။
ပရိုၚ်-သြၚ်လောန်တိုၚ်မ်
Photo – RFA