ဖာအၚ်၊ ဂျာန်နဝါရဳ ၂
နူကဵုဒပ်မင်ပယျဵုကရေၚ် BGF ဟိုတ်နူပြံၚ်သၠာဲဒပ်ပၞာန်ကောန်ဂကူကရေၚ် KNA ဂှ်ရ လ္တူဍုၚ်ဖာအၚ်ကီု ပ္ဍဲကွာန်တံကီု ဒပ်ကဝ်မယှေန်ပၞာန်သၠုၚ်ပတိုန်ဖျေံလဝ်ပရေၚ်ဂီုကၠီုတုဲ စွံလဝ်အကာဲအရာကာတၟေၚ်ရောၚ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူ ဂိတုဂျာန်နဝါရဳ ၁ တုဲ တမ်ဒပ် BGF ဗွဲမဂၠိုၚ်တံ ပြံၚ်လဝ်တဆိပ်ပၞးတၟိ KNA ဂှ် လ္တူဏံဒပ်ကဝ်မယှေန်ပၞာန် ဟွံဒုၚ်တဲမဒှ်ရ။
ရဲ BGF တံ ပြံၚ်သၠာဲထောံတဆိပ်တၟိဗီုဏံဂှ် ဒပ်ပၞာန်ဗမာလေဝ်ဟွံဒုၚ်တဲ၊ ရဲ KNA တံလုပ်ကၠုၚ် လ္တူဍုၚ်ဖာအၚ်ဂှ်လေဝ် ဟွံဒးစိုတ်ပုဟ်သ္ဂးရ။
စပ်ကဵုပရေၚ်ပြံၚ်သၠာဲယၟုဒပ်ဏံတုဲ ပ္ဍဲဒဳဇြမ်ပါ ၃၀ တေံ အကြာဒပ်ကဝ်မယှေန်ပၞာန်ကဵု BGF တံ ညးတာလျိုၚ်ၜါလပါ်သဳကၠဳလဝ် ပ္ဍဲဌာန်ဂအုပ်ဒပ် (၂၂) ကီုလေဝ်ဟွံပြေပြံၚ်တုဲ အကာဲအရာကြံၚ်မ္ၚိုဟ်တိုန်ရ။
စနူဂှ်တုဲ နူကဵုဒပ်ကဝ်မယှေန်ပၞာန် လလောၚ်တြးလဝ် အကြာတမ်ဒပ်နွံမံၚ်ဖာအၚ်သီုဖအိုတ်တံ ဗီုပြၚ်အကာဲအရာတၟေၚ်ရဂှ် ဂွံတီနူညးဒေသတံကီု ရိုဟ်ကၞက်ပရိုၚ်ဒပ်ပၞာန်ဗမာတံကီုရ။
ကရောၚ်ပၞာန် ဒပ်ကဝ်မယှေန်ပၞာန်တံပၠန် ပ္ဍဲကဵုတ္ၚဲအကြာတံဏံ အာစိုပ်လဝ်ကွာန်နွံမံၚ် ပွိုၚ်ဍုၚ်ဖာအၚ်တံတုဲ ဒစးဒုၚ်ဖျေံစွံလဝ် ပရေၚ်ဂီုကၠီုနွံမံၚ်ရဂှ် ဂွံလဝ်ပရိုၚ်နူညးဒေသတံရ။
မွဲလပါ်ဂှ်လေဝ် ဒပ် BGF တံ ပ္ဍဲဒေသယှိုဲကုက်ကို ကဵုကောန်ပၞာန်တံမၚ်လဝ်ဂွန်အိုတ်ဂှ်ကီု နူကဵုဒပ်ကဝ်မယှေန်ပၞာန်တံလေဝ် ပလံၚ်ဗစိုပ်လဝ်ဇြဟတ်ကောန်ပၞာန် ကရပ်ယှိုဲကုက်ကိုနွံမံၚ် ညးဒေသတံ ဟီုရ။
အတိုၚ်လဝ်ဗဳဒပ်ပၞာန်ဗမာဟီုလဝ်မ္ဂး နူကဵု BGF သွက်ဂွံပါ်တိတ် KNA ဂှ် က္ဍိုပ်သ္ကိုပ် BGF တံ ကၠောန်ဗ္ဒျ်လဝ်ကောံဓရီု ပ္ဍဲကွာန်တေံကတေသၟဝ်ကျာပွိုၚ်ဍုၚ်ဗြဝတဳ ပ္ဍဲဂျာန်နဝါရဳ ၁ တုဲ ဒပ် BGF လ္ၚဵုပြံၚ်အာ KNA ဂှ်လေဝ်နွံ ကောန်ဒပ်လ္ၚဵု ဆက်သှ်ေအာအတိုၚ် BGF လေဝ်နွံ ဖျေံလဝ်ဗီုရ။
အတိုၚ်ရိုဟ်ကၞက်ပရိုၚ်ဒေသတံဟီုမ္ဂး တမ်ဒပ် BGF ၁၀၂၂ ဖျေံလဝ် သ္ဇိုၚ် လ္တူဍုၚ်ဗြဝတဳ သ္ကိုပ်ဗိုလ်ဇၞော် သဝ်မုက်တုၚ် က္ဍိုပ်က္ဍိုပ်ဂှ်ဟွံပြံၚ်သၠာဲ KNA မွဲသာ် ဆက်မံၚ်အာသၟဝ်တဲဒပ်ပၞာန်ဗမာပၠန် ဂွံတီရ။
ပရိုင်-သြၚ်လောန်တိုၚ်မ်
Photo – KNA