မတ်မလီု ၊ ဂျာန်နဝါရဳ ၂
အခိၚ်သီကေတ်လဝ်အဝဵု ကြပ်စိုပ် ၅ သၞာံဏံ ဆက်ပံက်အာမုက်လိက်ဒုတိယရောၚ် က္ဍိုပ်သ္ကိုပ်ပၞာန်ဟီုတုဲဗက်ဂှ် ညံၚ်ဂွံဒှ်ဂကောံပၠန်ဂတး သွက်ဂွံသီဖ္ၜောဝ်ကေတ် ကောန်တၟံညးဍုၚ်ကွာန်မာန်ပတိတ်ဇြဟတ်အိုတ်ညိဂှ် အလုံအသဳညဳသၟဟ် ဂကူ NUG ဗတိုက်ဖအောဝ်ဟီုဏာဂလာန် ကၠောံသၞာံတၟိရ။
ညံၚ်ဂွံလုပ်အဝေါၚ်ပရေၚ်ဍုၚ်ကွာန်ဗဗွဲဓဝ်မာန် လ္တူဒပ်ပၞာန်ကၠောန်လဝ်ပေါဲရုဲမာဲသ္ကုတ် ၁ တုဲကၠုၚ်ဒဳဇြမ်ပါဏံဂှ် တက်ပေါဲအလီရောၚ် အလုံအသဳညဳသၟဟ်ဂကူ NUG လလောၚ်တြးလဝ်ရ။
ပေါဲရုဲမာဲဏံတုဲဒှ်အာမ္ဂး အလဵုအသဳတၟိမံက်တိုန်ကၠုၚ်တုဲ ညံၚ်ဂွံဆက်ယိုက်ဂၠေၚ်အာတာလျိုၚ်မာန်ဂှ် သၠောဲပြံၚ်ကဵုအဝဵုတုဲ ပံက်အာမုက်လိက်ညံၚ်ဂွံခိုဟ်အိုတ်ရောၚ် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် သ္ဂးလဝ်ရ။
တုဲပၠန် နူကဵုပရေၚ်ဆဵုဂဗတက်ကျာသဳကၠဳလဝ် လက်ထက်ကံၚ်သဳပၞာန်တေံ ဂွံလဝ်တၚ်တုပ်စိုတ် ၄၃ တၚ်ဂှ် ဆက်သဳကၠဳအာ ပ္ဍဲစၠတ်ဓဝ်တုဲ အတိုၚ်လၟေၚ်သၞောဝ်ပလေဝ်အာ သ္ဇိုၚ်သၞောဝ်ဥပဒေ ၂၀၀၈ ရောၚ် ညးဆက်ဟီုရ။
ကၠောန်မာန်ကၠုၚ် ပေါဲရုဲမာဲ ၁၀၂ ပွိုၚ်ဍုၚ် ဗွဲမအံၚ်ဇၞးဂှ် ဟိုတ်နူညးဍုၚ်ကွာန် ဆာန်ကၟိန်သၞောတ်ဒဳမဝ်ကရေသဳဗော်ဇဳတံ ပံၚ်တောဲပါလုပ်ရေၚ်တၠုၚ်လဝ်ရောၚ် က္ဍိုပ်သ္ကိုပ်ပၞာန် သ္ဂးရ။
ရံၚ်အာ ပေါဲရုဲမာဲအလီကဝ်မယှေန်ပၞာန်ဏံမ္ဂး ပ္ဍဲကဵုဝင်ပေါဲရုဲမာဲဍုၚ်ဗမာမ္ဂး ဒှ်ပေါဲရုဲမာဲညးဍုၚ်ကွာန်ဂလာန်ပတေဟ် ဟၟဲအိုတ်မွဲရောၚ်လုပ်အာဝင်ယျ သမ္မတယာယဳ NUG ဒူဝါလယှဳလ ဟီုရ။
ပေါဲရုဲမာဲအလီ ကၠောန်ထ္ၜးစသၟးဟွံက ကရေပ်ဓရတ် ကဵုလဝ်ဇြဟတ်ဟရိုဟ် လ္တူညးဍုၚ်ကွာန်တံဂှ် ဂွံဆဵုလဝ်နမတ်ရောၚ် ညးဟီုလဝ်ရ။
တုဲပၠန် ညးဍုၚ်ကွာန်တံဂှ် ဒဵုကဵုတ္ၚဲဏံ တးပါဲစဵုစးမံၚ် ပရေၚ်အုပ်ဓုပ် တၠအဝဵုပၞာန်ဖိုဟ်တုဲ ပတေဟ်ကေတ်လဝ် ပၠန်ဂတးညးဍုၚ်ကွာန်တံ ဆန္ဒဇၞော်မံၚ်ပေၚ်ၚ်ရောၚ် သ္ဂးရ။
အလဵုအသဳသ္ပစၞးညးဍုၚ်ကွာန်ဇေတ်တ်ဂှ်ရနွံပၟိက်ရဂှ် ညးဍုၚ်ကွာန်တံကညာၚ်ကရေဲမံၚ်ရောၚ် ပ္ဍဲကဵုဂလာန်ကၠောံသၞာံတၟိ ၂၀၂၆ ဂှ် သမ္မတယာယဳ NUG ဒူဝါလယှဳလ ဟီုစုတ်လဝ်ရ။
မွဲလပါ်ပၠန် ပၞာန်တဝ်စၞေဟ်ပၠန်ဂတးဟီုဂှ် နဲကဲပၞာန် နဲကဲပရေၚ်ဍုၚ်ကွာန်ကဵု နဲကဲညးဍုၚ်ကွာန်တံပံၚ်ဗစပ်တုဲ ဒးဇက်ဂၠောဲအာမဒှ်တုဲ ဂလာန်ပတေဟ်ညးဍုၚ်ကွာန်ပေၚ်ၚ် သွက်ဂွံဂွံမာန် နကဵုဒပ်ပၠတရဴ ပရေၚ်ညဳသၟဟ်ဂွံနွံဂှ် ကိစ္စဇၞော်ဗွဲမလောန် ညးဆက်ဟီုရ။
ဟိုတ်ဂှ်ရ စွံသတိပရေၚ်တံဏံတုဲ ညံၚ်ဂွံဒှ်ဂကောံပၠန်ဂတး သီဖ္ၜောဝ် ကေတ်လဝ်ကောန်တၟံညးဍုၚ်ကွာန်မာန် ပတိတ်ဇြဟတ်အိုတ်ညိဂှ် ဗတိုက်ဖအောဝ်လဝ်ရ။
ဍုၚ်ဂၠးကဝ်တံလေဝ် ညးဍုၚ်ကွာန်ဍုၚ်ဗမာတံ သွက်ဂွံဂွံပရေၚ်အရီုဗၚ်ဗစာရဏာ မၞိဟ်တံမာန် ညံၚ်ဂွံဘိုၚ်ရီုဗၚ်ထံက်ပၚ်ညိ ယန္တရာတၠအဝဵုပၞာန်တံ ညံၚ်ဂွံကၠက်အာဆက်တုဲကၟာတ်ဆိုအ်ကဵုညိဂှ် အာတ်မိက်လဝ်ရ။
တုဲပၠန် ပ္ဍဲကဵုသၠောတ်တၠအဝဵုပၞာန် ညံၚ်ဂွံကၠေံကၠက်အာ နကဵုနဲကဲအမာတ်ကလုတ်တံ ကေတ်ကဵုအရေဝ်တုဲ ယန္တရာသၠောတ်တၠအဝဵု ပၞာန် ညံၚ်ဂွံအိုတ်အာဘိုၚ်ကဵုအရီဗၚ်ညိဂှ် ဒူဝါလယှဳလ အာတ်မိက်ဏာ မဒှ်ရ။
နူကၠာပေါဲရုဲမာဲဏံဟွံတုဲဒှ်ဏီမ္ဂး လုပ်ဗဗွဲဓဝ်ရောၚ် ညံၚ်ဟွံသ္ပဒးအာ သမ္တီကီု၊ ဂၠံၚ်ဍာန်တၟိမွဲ ညံၚ်ဂွံမံက်တိုန်ဂှ်ရ မၚ်ရံၚ်အာရောၚ် ဥက္ကဌ ဂကောံအာသဳယာန် သ္ကိုပ်ဝန်ဇၞော်မလေဝ်ယှာ အာန်နဝါအဳဗရာဟေၚ် ဟီုလဝ်ပ္ဍဲဒဳဇြမ်ပါ ၃၀ ဂှ်ရ။
ပေါဲရုဲမာဲအလီ ကဝ်မယှေန်ပၞာန်ဏံ ညံၚ်ဂွံလုပ်သၞောဝ် အလဵုအသဳထံက်မံၚ်ဂလာန်တံဂှ်လေဝ် ပ္ဍဲကဵုအမှုရာဇဝတ်ဂကောံပၞာန် ကၠောန်မံၚ်တံဂှ် သီုကဵုမွဲကသပ်ဂၞန်ပါလုပ်မံၚ်ရောၚ် ကောန်ဂကောံ ဆေင်စပ်ကဵုဂကောံကဵုကသပ်တၟေၚ် ပရေၚ်ဍုၚ်ဗမာ SAC-M ယာန်ဟဳလဳ ကဵုလဝ်သတိနွံရ။
ပရိုင်-သြၚ်လောန်တိုၚ်မ်
Photo – NUG