ၜဳလေၚ်၊ ဂျာန်နဝါရဳ ၃
တွဵုရးမန် ပွိုၚ်ဍုၚ်ၜဳလေၚ် နူကဵုဒပ်ကဝ်မယှေန်ပၞာန်ပန်လွဟ်ဇၞော်ဂှ် ကောန်ကွာန်ပိတၠတံထပ်ချိုတ်အာပၠန်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုင်မ်ရ။
ဂိတုဂျာန်နဝါရဳ ၂ အခိၚ်နူဂယးၜိုတ် ၈ နာဍဳဂှ် ဒပ်ကဝ်မယှေန်ပၞာန်ဖျေံသ္ဇိုၚ်ဍုၚ်ၜဳလေၚ် နူကဵုတမ်ဒပ် ခမရ ၃ ပန်လွဟ်ဇၞော် ဒတုံပြဟ်စှ်ေအာ ပ္ဍဲကဵုရုၚ်စက်ဆု ကွာန်အလူလေဝ် ကရပ်ဒၞာဲခဒမ်သၟာကမၠောန်ခတိုဟ်လဝ်ရ။
ဟိုတ်နူလွဟ်ဇၞော်ခတိုဟ်ဂှ်ရ ဒဝ်တာန်ဌေ အာယုက် ၅၀ သၞာံ၊ ဥူတာန်နိုင်ကဵု ညးဗြဴမွဲတၠ ချိုတ်အာတုဲ ညးဒေသပိတၠတံလေဝ် ဒးလဝ်ဝပ်ရ။
အတိုၚ်ညးဒေသတံဟီုမ္ဂး စနူဂိတုဂျာန်နဝါရဳ ၁ တုဲ ပ္ဍဲကရပ် ကွာန်အလူလေဝ် ဒပ်ကဝ်မယှေန်ပၞာန်ဗမာ ချဳဒရာၚ်မံၚ်ပရေၚ်ပၞာန် ကီု နူကဵုတမ်ဒမ်ဖျေံသ္ဇိုၚ်ဍုၚ်ၜဳလေၚ်တံဂှ်လေဝ် ပန်ပလံၚ်မံၚ်ကဵုလွဟ်ဇၞော် သီုဗ္တံတ္ၚဲရ။
တုဲကၠုၚ်ဒဳဇြမ် ၃၁ အခိၚ်ပ္တံပၠန် အကြာပေါဲဗတိုက် ကရပ်ကွာန်အလူလေဝ်ဂှ် ကောန်ကွာန်ၜါတၠချိုတ်တုဲ ပန်တၠ ဒးလဝ်ဝပ်နွံကီုရ။
ဟိုတ်နူဒပ်ပၞာန်ဗမာပန်လွဟ်ဇၞော်ကီု ပေါဲဗတိုက်အကြာၜါလပါ်ဒှ်ကီုတုဲ ကောန်ကွာန်အလူလေဝ်ကဵု ကွာန်ဝေၚ်ပျာန်တံ ဒးဂြိပ်ပါဲမံၚ်ဒၞာဲဗၠးဘဲဒဏ်တံ မဒှ်ရ။
သွက်ဂွံကၠောန်ပေါဲရုဲမာဲ ဂျာန်နဝါရဳ ၁၁ ပ္ဍဲပွိုၚ်ဍုၚ်ၜဳလေၚ်ဂှ် ဒပ်ကဝ်မယှေန်ပၞာန် ထပက်ကရောၚ်ပၞာန်ကီု ပန်မံၚ်လွဟ်ဇၞော်တံကီု ကၠောန်မံၚ်အဆက်က်ရဂှ် ဂွံတီနူကဵုညးဒေသတံရ။
ပရိုၚ်-သြၚ်လောန်တိုင်မ်