ဗြဝတဳ၊ ဂျာန်နဝါရဳ ၃
ပ္ဍဲတွဵုရးကရေၚ် ဒပ်ကဝ်မယှေန်ပၞာန်လုပ်ဖျေံလဝ်ဒၞာဲ ပ္ဍဲဒေသယှိုဲကုက်ကိုတံ ဟိုတ်နူကဵုဇြဟတ်ဟရိုဟ် ဒပ်ပၞာန်ဗၠးၜးကောန်ဂကူကရေၚ် KNA ဂှ်ရ ဒးကလေၚ်ဆုတ်စဴအာဗြဝတဳတုဲ ပ္ဍဲကဵုဒေသယှိုဲကုက်ကိုဂှ် သၠုၚ်လဝ်ပရေၚ်ဂီုကၠီုကာမံက်တိုန်ရောၚ် ဂွံတီနူ ရိုဟ်ကၞက်ဒေသတံရ။
စနူဂိတုဂျာန်နဝါရဳ ၂၀၂၆ ဂှ် ဒပ်မၚ်ပယျဵုကရေၚ် BGF တံ ပြံၚ်သၠာဲထောံဗီုပြၚ် ဒပ်ပၞာန်ကောန်ဂကူကရေၚ် KNA တုဲ ဒပ်ကဝ်မယှေန်ပၞာန် စိုပ်မံၚ်ပ္ဍဲဒေသယှိုဲကုက်ကို ၝောံဒပ် ၂၂ ဂှ် ဒးကလေၚ်ဆုတ်စဴအာ ဍုၚ်ဗြဝတဳဂှ်တှ်ေ ဟိုတ်နူဇြဟတ်ဟရိုဟ် KNA ရောၚ် သ္ဂးရ။
ပ္ဍဲကဵုဒေသယှိုဲကုက်ကိုပၠန် ဒပ်ပၞာန်ကောန်ဂကူကရေၚ် KNA သၠုၚ်လဝ်ပရေၚ်ဂီုကၠီုကာမံက်တိုန်တုဲ ကောန်ပၞာန်တံ ညံၚ်ဂွံမံၚ်စံၚ်အာ သတိပၞာန်ပေၚ်ၚ် ကဵုလဝ်စၞောန်ပ္ညုၚ်သီုဖအိုတ်တုဲ နူကဵုဒပ်ကဝ်မယှေန်ပၞာန် သွက်ဂွံကလေၚ်လုပ် ဍုၚ်ယှိုဲကုက်ကိုဝ်ပၠန်ဂှ် ထပ်ဗပေၚ်လဝ်ဇြဟတ်ဒပ် နူကဵုၝောံဒပ် ၄၄ ရဂှ် ဂွံတီရ။
ဆဂး KNA ဟွံကဵုအခေါၚ်လုပ် အပ္ဍဲဍုၚ်ယှိုဲကုက်ကိုဏီတုဲ ကောန်ပၞာန်နူကဵုၝောံဒပ် ၄၄ တံဖျေံလဝ်ဒပ် ဒၞာဲစိုပ်မံၚ် ပ္ဍဲကဵုဒဒန် နဒဳလေၚ်မျာၚ် ဆက်စၠောံလဝ် ဗြဝတဳ-ယှိုဲကုက်ကို သ္ဂးရ။
အတိုၚ်ရဲလဝ်ဗဳ ထံက်ဂလာန်ဒပ်ပၞာန်ဗမာတံဟီုမံၚ်မ္ဂး နူကဵုၝောံဒပ် ၄၄ သွက်ဂွံအုပ်ဓလုံအာ မွဲဒမြိပ်ဂၠံၚ် ဗြဝတဳ ယှိုဲကုက်ကိုတုဲ နူကဵု BGF ပြံၚ်ယၟု KNA၊ သၠာဲတဆိပ်ပၞး၊ ပလှ်ထောံတဲကဵုဒပ်ပၞာန်ဗမာတံ ဟီုဂှ် ညံၚ်ကဵုကော်ဘိက်မံၚ်ပဋိပက္ခ သွက်ဂွံကြံၚ်မ္ၚိုဟ်တိုန် သ္ဂးရ။
ဟိုတ်နူ BGF ပြံၚ်သၠာဲထောံ KNA ဂှ် ကဝ်မယှေန်ပၞာန် သၠုၚ်ပတိုန်လဝ်ပရေၚ်ဂီုကၠီု အကာဲအရာကာမံက်တိုန် လ္တူဍုၚ်ဖာအၚ်တုဲ ရဲဒပ် KNA တံ လုပ်တိတ်အာကၠုၚ်ပ္ဍဲဍုၚ်ဖာအၚ်ဂှ် အကြာတ္ၚဲတံဏံဟွံဂွံဆဵုရပုဟ် ညးဒေသမွဲတၠ သ္ဂးရ။
အပ္ဍဲကဵု BGF ပြံၚ်သၠာဲထောံ KNA ဏံ BGF ဟွံပြံၚ်ဂှ်နွံမံၚ်ကီုလေဝ် ဗွဲမဂၠိုၚ်ဂှ်တှ်ေပြံၚ်လုပ်အာဒပ် KNA တံရဂှ် နူကဵုရိုဟ်ကၞက်ပရိုၚ် BGF ဟီုရ။
အတိုၚ်ဒပ်ပ္တန်လဝ် BGF မ္ဂး ပ္ဍဲကဵုဗွိုၚ်ဒေသဒပ် ၄ ဒၞာဲဂှ် ၁၃ တမ်ဒပ်နွံတုဲ အပ္ဍဲကဵုပြံၚ်ယၟုဒပ်ပၞာန် KNA လၟုဟ်ဂှ်တှ်ေ ဒက်ပ္တန်လဝ် နကဵုဗွိုၚ်ဒေသ ဒပ် ၄ ဒၞာဲ၊ ၉ ဗျူဟာ၊ ၆၀ တမ်ဒပ်နွံမံၚ်ရောၚ် ညးတာလျိုၚ် KNA တံ ဟီုလဴလဝ်နွံရ။
ပရိုၚ်-သြၚ်လောန်တိုင်မ်
Photo – CJ