မတ်မလီု ၊ ဂျာန်နဝါရဳ ၁၄
သွက်တိုင်ပ္ကဴရန်တၟံကောန်ဂကူတအာၚ်ဂှ် ညံၚ်ဂွံစိုပ်ပံၚ်တောဲအာကဵု ညးဍုၚ်ကွာန်တံတုဲ ဆက်ဂစာန်အာရောၚ် ပ္ဍဲတ္ၚဲပၠန်ဂတးကောန်ဂကူတအာၚ် မရနုက်ကဵု ၆၃ ဝါ ဂျာန်နဝါရဳ ၁၂ ဂှ် နူကဵု TNLA ပတိတ်လိက် လလောၚ်တြးရ။
အပ္ဍဲတိုင်ပကဴပရေၚ်ဍုၚ်ကွာန်တံဂှ်မ္ဂး အလုံကောန်ဂကူတအာၚ် ညံၚ်ဂွံတိတ်ဗၠးအာ နူဘဝဒုၚ်ပ္ဍဵုပ္ဍိုက်မာန်၊ သွက်ဂွံဒက်ပတန်တွဵုရးတအာၚ် ဒုၚ်လျိုၚ်ကုဒဳမဝ်ကရေသဳကဵု အခေါၚ်အရာမၞိဟ်တံမာန်၊ သွက်ဂွံဒက်ပ္တန်အာ ကၟိန်ဍုၚ်ဖိတ်ဒရေဝ် ဒုၚ်လျိုၚ်အခေါၚ်ဖန်ဖက် ပရေၚ်ကုသဵုကုဇကုမာန် မဒှ်ရ။
ပြဟ်ဟ်ဏံ ဒပ်တအာၚ် TNLA ပါလုပ်ကၠုၚ်လဝ် ပ္ဍဲကဵုပေါဲဗတိုက် ထပိုတ်ရိုဟ်ကၞက်သၠောတ်တၠအဝဵုပၞာန် ပ္ဍဲကဵုလဝေၚ်ပၞာန်ဂှ်တှ်ေ ညံၚ်ရဴဂကောံကောဒေံ မဟာမိတ်ဒပ်ကိုဝ်က MNDAA ကီု ဟိုတ်နူဇြဟတ်ဟရိုဟ် အလဵုအသဳကြုက်ဂှ် ဒးဒေါအ်ဇူထောံလဝ် မွဲအခန်ယျ။
ဂကောံထမံက်မံၚ်ရုပ်ရဴ ပရေၚ်ပၞာန်တံ ကာလအာနနဲပရေၚ်ဍုၚ်ကွာန်မ္ဂး နကဵုပရေၚ်ပၞာန် တင်အံၚ်ဇၞး၊ တင်ဟွံအံၚ်ဇၞး လတိုန်လစှ်ေတံဂှ် သွက်ဂွံကလေၚ်စိုပ် လ္တူဂၠံၚ်တရဴပရေၚ်ဍုၚ်ကွာန်ဇကုပၠန် ၜိုတ်လဵုပရေၚ်ဇီုကပိုက်နွံမာန် ထေက်ကဵုဒးချပ်လဝ်ရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ထံက်ထ္ၜးရ။
အခိၚ်ကာလ လဝေၚ်ပၞာန် ၁၀၂၇ သ္ကုတ်ပထမကဵု သ္ကုတ်ဒုတိယတုဲ ပေါဲဗတိုက်ပဵုသ္ကာတ်မြဟ်တိုန်ဂှ် အလုံဒေသသၟဝ်ကျာ ဂွံညိၚ်ဝပ်အာ သွက်ဂွံဒေါအ်ပန်ပှော်မာန် အလဵုအသဳကြုက်ဂစာန်လုပ်ကၠုၚ် အကြာရောၚ် TNLA ဟီုလဝ် ပ္ဍဲလိက်လလောၚ်တြးရ။
ဟိုတ်ဂှ်ရ သၞာံ ၂၀၂၅ ဂိတုအံက်တဝ်ပါ ၂၈ ဂှ် ဒပ်ပၞာန်ဗမာကဵု ဒပ်တအာၚ် TNLA တံ ထပက်စၟတ်တဲလိက်ကသုက် ပရေၚ်ဒေါအ်ပန်ပှော် ပ္ဍဲကဵုဟိုက်ဂေန်ဟဝ်တေဝ် ဍုၚ်ကူမေန်၊ တွဵုရးယူနာန် နိဂီုဍုၚ်ကြုက်ရ။
ဟိုတ်နူ ထပက်စၟတ်တဲလိက်ကသုက် ပရေၚ်ဒေါအ်ပန်ပှော်ဂှ် အခိၚ်တ္ၚဲပၠန်ဂတးကောန်ဂကူတအာၚ် မရနုက်ကဵု ၆၃ ဝါဏံ ပ္ဍဲတွဵုရးတအာၚ် ဇၟာပ်ဒေသတံ ပေါဲဗတိုက်ဒေါအ်အာအိုတ်တုဲ ညးဍုၚ်ကွာန်တံလေဝ် နူကဵုဒးဒုၚ်ပန်ကဵုၜၚ်ကျာကဵု လွဟ်ဇၞော်တံဂှ် ဗၠးတိတ်သက်သာအာနွံရဂှ် ချူထမံက်လဝ် ပ္ဍဲလိက်လလောၚ်တြး ဂှ်ရ။
အလုံဍုၚ်ဗမာမွဲ ပရေၚ်ပေါဲဗတိုက်တံ ဒေါအ်အိုတ်တုဲ ပွမပြံၚ်လှာဲပရေၚ်ဍုၚ်ကွာန်တံ ညံၚ်ဂွံမံက်ဂတဝ် ပ္တန်လဝ်ဆန္ဒတုဲ တိုင်ပ္ကဴရန်တၟံကောန်ဂကူတအာၚ် ညံၚ်ဂွံစိုပ်မာန် လွဳပရာဂစာန်အာရောၚ် TNLA ဟီုလဝ်ရ။
နူကဵုဒပ်ပၞာန်ဗမာလးလဝ် တၠုၚ်လအာစၠတ်ဓဝ်မံက်တိုန်ကၠုၚ်ဏံ သွက်ဂွံခုတ်စၟတ်အာကဵုဒေသတိဍာ်ကေုာံ အခေါၚ်ပရေၚ်အုပ်ဓုပ် TNLA ကဵု MNDAA တံဂှ် ကြပ်မံၚ်ကဵုဗီုပြၚ် ဂကောံ “ဝ” UWSA တံကီုရောၚ် ဗိုလ်ဇၞော် CDM ဇြေၚ်ယဝ် သ္ၚဳဂၠိပ်ရ။
“ညံၚ်သ္ဂောံဂွံဖိတ်ဒေရဝ်ဇေတ်တ် ညးတံကေတ်အာဏောၚ်။ ကြပ်ကဵုညံၚ်ရဴဗီုပြၚ် UWSA တံကီု သီုဖအိုတ်ရန်တၟံလဝ်နွံ။ တွဵုရးညးတံ။ ပ္ဍဲတွဵုရးကောန်ဍုၚ်အရၚ်တံဂှ် နကဵုအခေါၚ်အရာပရေၚ်တုပ်သၟဟ် ကောန်ဍုၚ်အရၚ်တံဟေၚ် သွက်ဂွံအုပ်ဓုပ်စဳရေၚ်အာဏောၚ်။ အခေါၚ်သယံဇာတကဵု ကူသာန်ဗၞိက်လေဝ် အာဗီုပြၚ် ညံၚ်ကဵုဂွံအခေါၚ်တုပ်ဏောၚ်။ စၟဳစလဝ်ဗီုပြၚ် ဖိတ်ဒရေဝ်နွံမံၚ်။ ဟိုတ်ဂှ်တှ်ေ ဒပ်ပၞာန်ကဵု ညးတံ(တအာၚ်၊ ကိုဝ်က) သွက်စၠတ်ဓဝ် ပရေၚ်တုပ်စိုတ်အပြောံ စွံလဝ်ဒးနွံဏောၚ်။ နူကဵုဏံ ဒးဆက်မၚ်အာ အကာဲအရာ ပရေၚ်ခုတ်စၟတ်တိဍာ်တံဏီ” သာ်ဝွံ သ္ဂးရ။
ပေါဲရုဲမာဲဒပ်ပၞာန်ကၠောန်တုဲအာတုဲ ကာလကော်စၠတ်ဓဝ်မှ အတိုၚ်ဒပ်တအာၚ်ကဵု ဒပ်ကိုဝ်ကတံစၟဳစလဝ် သ္ဂုတ်သွာတ်ဟွံစှ်ေကၠုၚ်မ္ဂး နကဵုနဲကဲပရေၚ်ပၞာန် ညံၚ်ရဴလပှ်တတိယ ၁၀၂၇ အကာဲအရာဒှ်ကၠုၚ်မာန်ရေၚ် ညးဆက်ဟီုရ။
ဟိုတ်ဂှ်ရ ပ္ဍဲကဵုစၠတ်ဓဝ်မံက်တိုန်မ္ဂး အကာဲအရာဒပ်ကိုဝ်ကကဵုဒပ်တအာၚ်တံ ဗီုပြၚ်လဵုဒှ်အာမာန်ရောဟီုဂှ် ကောန်ဍုၚ်အရၚ်တံကဵု ဂကောံမဟာမိတ်ဒပ်ပၠန်ဂတးတံ ဒှ်မံၚ်သဘဴညံၚ်ကဵု ဒးဆက်မၚ်ရံၚ်အာပၠန်ရောၚ်။
လ္တူဏံ အတိုၚ်ကောန်ဍုၚ်အရၚ်တံအာတ်မိက်ဂှ် ဒပ်ပၞာန်ဗမာဗက်ကဵုမာန်မ္ဂး ဂကောံမဟာမိတ် ဒပ်ပၠန်ဂတးတံလေဝ် ဗတိုက်ကေတ်ဇၞးနကဵုပေါဲပၞာန်တံတုဲ အတိုၚ်နွံမံၚ်ပၟိက်တံဂှ် ဘိုအ်ဂွံအာတ်မိက်အာရနွံမံၚ် ဗိုလ်ဇၞော် CDM ဇြေၚ်ယဝ် ဟီုစၟတ်သမ္တီလဝ်ရ။
ၜိုတ်ကဆံၚ်လဵု ပတေဟ်စဒပ်ပၞာန်ဗမာဂွံမာန်ရော ရံၚ်အာဝင်အဆက်က်ဂှ်တှ်ေ TNLA သွက်ဂွံအာဂၠံၚ်တရဴ ပရေၚ်ဍုၚ်ကွာန်ဟီုဂှ် သၠောတ်တၠအဝဵုပၞာန်ဟၟဲမှဂွံမာန်ရောၚ် ကိုမေန်တွိဲတေတ်ဟီုရ။
“သွက် TNLA ဂွံအာဂၠံၚ်တရဴ ပရေၚ်ဍုၚ်ကွာန်မာန်ဂှ် ကံၚ်သဳပၞာန်(ဒပ်ပၞာန်) ဟွံမွဲမှ ဂွံဏောၚ်။ ပရေၚ်ဏံဂှ် TNLA မွဲဂကောံဟွံသေၚ်ပုဟ်။ ဗမာတံကီု ဇၟာပ်ကောန်ဍုၚ်အရၚ်တံကီု သွက်သ္ဂောံဂွံအခေါၚ်အရာကံကုသဵုဇကုကဵု ပရေၚ်ညဳသၟဟ်တံဟီုဂှ် သၠောတ်တၠအဝဵုပၞာန်အိုတ်မှ ဒှ်မာန်။ ဟိုတ်ဂှ်ရ မွဲအခိၚ်ဓဝ် မွဲအလန်ဓဝ် လုပ်အာပေါဲဗတိုက်မွဲစွံမာန်မှ ပိုဲညးတံသီုဖအိုတ် ဂွံပေါဲအံၚ်ဇၞးတိုင်ပ္ကဴပရေၚ်ဍုၚ်ကွာန်မာန်ရောၚ် အဲမိက်ဂွံကဵုကသပ်ရ”
ပ္ဍဲလဝေၚ်ပၞာန် ၁၀၂၇ မွဲကရောံကဵု ဒပ်ပၞာန်စဵုဒၞာညးဍုၚ်ကွာန် PDF တံ ဗတိုက်ကေတ်သီဂွံလဝ်ဍုၚ်လ္ၚဵုလ္ၚဵုတံဂှ် ဟိုတ်နူဒပ်ပၞာန်ဗမာ ကလေၚ်ဗတိုက်ဂွံဂှ်ကီု တင်တုပ်စိုတ်ပရေၚ်ဒေါအ်ပန်ပှော်ကီုတုဲ ဒပ်တအာၚ်တံ ကလေၚ်ဗလးကၠုၚ်တဲရ။
အပ္ဍဲဏံ ပ္ဍဲကဵုဒေသသေံသၟဝ်ကျာ ဍုၚ်နံၚ်ချို၊ ကျံက်မေဝ်ကဵုတဳပဝ်တံနကဵုပရေၚ်ပၞာန် ဒးကလေၚ်ဗလးတဲတုဲ ဟိုတ်နူအလဵုအသဳကြုက်ကဵု ဇြဟတ်ဟရိုဟ်ကီု သီုကဵုၜၚ်ကျာပၞာန်ဗတိုက်ဂှ်ရ ဒးဗလးတဲကလေၚ်ဆုတ်အာနူကဵု ဍုၚ်မိုဝ်ဂိက်ကဵု မိုဝ်မုက်တံရ။ ဟိုတ်ဂှ်ရ ပြဟ်ဟ်ဏံ ဒပ်တအာၚ် TNLA ထိၚ်ဂွံလဝ်ပ္ဍဲသေံသၟဝ်ကျာ နွံမံၚ် ၇ ဍုၚ် မဒှ်ရ။
နူကဵုဗျူဟာမိုဝ်ဂုက်ကဵု PDF မာန္တလေဝ် သၟဝ်ဌာနဝန်ဇၞော်ပရေၚ်စဵုဒၞာ အလဵုအသဳ NUG ဂှ်တှ်ေ ၜိုတ်အစောန်နွံ စဵုဒၞာအာဒၞာဲဒေသ ထိၚ်ချုက်လဝ် မိုဝ်ဂုက်ကဵု မိုဝ်မုက်ရောၚ် ကဵုလဝ်သမ္တီနွံရ။
သွက်ပရေၚ်တံဏံ နူကဵုရုၚ်ဌာန်ဂအုပ်ပၞာန် ဒပ်ပၞာန်စဵုဒၞာညးဍုၚ်ကွာန် ဌာနဝန်ဇၞော်ပရေၚ်စဵုဒၞာ ပံက်လဝ်ဂကောံက္ဍိုက်ပ်လဝေၚ်ပၞာန် ဒေသမိုဝ်ဂုက်ကဵုမိုဝ်မုက်တုဲ ပြဟ်ဟ်ဏံ ပ္ဍဲဒေသတံဏံ အကြာဒပ်ပၞာန်ဗမာကဵု ဂကောံဒပ်ပၠန်ဂတးတံ ပေါဲဗတိုက်သ္ကာတ်မြဟ် ဒှ်မံၚ်ရ။
ပရိုင်-သြၚ်လောန်တိုၚ်မ်
Photo – TNLA