ရေဝ်၊ ဂျာန်နဝါရဳ ၁၇
တွဵုရးမန် အပ္ဍဲပွိုၚ်ဍုၚ်ရေဝ် အကြာဒပ်ကဝ်မယှေန်ပၞာန်ကဵု ဒပ်ပံၚ်တောဲမဟာမိတ်ပၠန်ဂတးတံ ပေါဲဗတိုက်ကလေၚ်ဒှ်မံၚ်ရောၚ်ဂှ် ညးတာလျိုၚ်ဒပ်စဵုဒၞာညးဍုၚ်ကွာန်-ရေဝ် YPDF ဗိုလ်ယာန်နိုင် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဒပ်ကဝ်မယှေန်ပၞာန်ဗမာ ဇြဟတ်ပါလုပ် ၁၅၀ ပြၚ်တံ စနူကဵုဂိတုဂျာန်နဝါရဳ ၁၅ ဂှ် ထပက်ကရောၚ်ပၞာန်လုပ်ကၠုၚ် ဒေသရေဝ်သၟဝ်ကျာ မဒှ်ရ။
ဟိုတ်နူကရောၚ်ပၞာန်ဒပ်ကဝ်မယှေန်ပၞာန်ဗမာ ထပက်ကၠုၚ်ဂှ်ရ ပေါဲဗတိုက်ဒှ်အာကရပ်ကွာန်အံၚ်တပျေ ပွိုၚ်ဍုၚ်ရေဝ်ဂှ် သီုၜါလပါ် ဒးဘဲဒဏ်ချိုတ်လဝ်နွံရ။
ပ္ဍဲအကြာပေါဲဗတိုက်ကွာန်အံၚ်တပျေဏံ လပါ်ဒပ်ကဝ်မယှေန်ပၞာန် ၃ တၠ ချိုတ်တုဲ၊ လပါ်ရဲပၠန်ဂတးတံ ကောန်သ္ဂံၚ်မွဲတၠ ဒးအာဝပ်ပ္ဍဲတၚ်တဲ သ္ဂးရ။
ပေါဲဗတိုက်ဒှ်တုဲ ဒပ်ကဝ်မယှေန်ပၞာန်လုပ်ကၠုၚ် ကွာန်အံၚ်တပျေ ဗက်စၟဳစၟတ်ဂၠိုက်ဂၠာဲသ္ၚိညးဒေသတံကဵု ပံက်ဗဵုဖုၚ်ညးတံရ။
ဒဵုကဵုဂိတုဂျာန်နဝါရဳ ၁၆ အခိၚ်သဝ်တ္ၚဲလေဝ် ကရောၚ်ပၞာန် ဆက်ဖျေံလဝ်ဒပ် ပ္ဍဲပွဳပွူကွာန်ဂှ်ရ အကာဲအရာကြံၚ်မ္ၚိုဟ်မံၚ်ဖိုအ်ရ။
ဟိုတ်နူ ကရောၚ်ပၞာန် ဒပ်ကဝ်မယှေန်ပၞာန်ဗမာထပက်ဂှ်ရ သၟတ်ကဵုညးတြုံအဝဲပၠိုၚ်ၚ်တံ ဖေက်ဒးဒုၚ်တံၚ်ပဝ်တာတုဲ ဂြိပ်ပါဲအာ နူကွာန်အိုတ်ယျရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media