မတ်မလီု၊ ဂျာန်နဝါရဳ ၁၇
အပ္ဍဲကဵုတွဵုရးမန် ကၟုဲညးအာတရဴတံ ညံၚ်ဂွံလုပ်ဂၠိုၚ်တိုန်ကၠုၚ်ပဵုနူကဵု အခိၚ်ကၠာတေံမာန် ကဏ္ဍကၟုဲအာတရဴ သွက်ဂွံတဴတက် ညံၚ်ဂွံကၠောန်ၜိုတ်အာဂှ် သ္ကိုပ်ဝန်ဇၞော် တွဵုရးမန် ဥူအံၚ်ကျဳတိၚ် ကဵုလဝ်စၞောန်ပ္ညုၚ်ရ။
တုဲကၠုၚ်ဂိတုဂျာန်နဝါရဳ ၁၄ ဒၞာဲရုၚ်အလဵုအသဳတွဵုရးမန် ဍုၚ်မတ်မလီု ကၠောန်လဝ်ကောံဓရီု ကမ္မတဳလၟေၚ်ကမၠောန်ပရေၚ်ကၟုဲအာတရဴ ဆေင်စပ်ကဵုဒေသတွဵုရးမန်ဂှ် ကဵုလဝ်စၞောန်ပ္ညုၚ်ကဵု ဌာနဆေင်စပ် သၟဝ်တဲညးတံကဵုညးတၠကမၠောန်တံရ။
လၟေၚ်ပရေၚ်ကၟုဲအာတရဴ သွက်ဂွံတဴတက်အာ ဂတဵုမုက်စၞောန်ပ္ညုၚ် လၟေၚ်တရဴဒေသ သွက်ကၟုဲတံဂွံအာကၠုၚ်ဂှ် ညံၚ်ဂွံကၠောန်ဗ္ဒျ်အာ၊ ပရေၚ်တက်ဗီုရုပ်ရမျှာၚ် လၟေၚ်တရဴဒေသနာနာ၊ ကၟုဲအာတရဴတံ သွက်ဂွံဇူဒီု ၜိုဟ်ဟ်ခိုဟ်ဟ်မာန် ရုပ်ရဴဗီုပြၚ်ဟဝ်တေဝ် ဌာန်ဇၞူတံဂှ်လေဝ် ကၠောန်လဝ်ညံၚ်ဂွံခိုဟ်တဴညိဂှ် ဟီုလဝ်ရ။
ကၟုဲညံၚ်ဂွံအာကၠုၚ်ပဵုဂၠိုၚ်တိုန် ဟီုမံၚ်ကီုလေဝ် ပြဟ်ဟ်ဏံ အမိၚ်တိတ်မ္ၚးအခိၚ်ဗ္တံဟွံဂွံ၊ သွက်ကၟုဲဍုၚ်သအာၚ်မ္ဂး ဒးအာတ်အခေါၚ်တံဂှ် အခက်အခုဲနွံမံၚ်ကွေံကွေံရောၚ် ညးပလံၚ်ကၟုဲ မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အဓိက မိက်ဂွံဟီုဂှ်တှ်ေ အမိၚ်တိတ်ဗ္တံဟွံဂွံ နွံမံၚ်ဏီ။ အခိၚ်တိတ်ဗ္တံဟွံဂွံနွံမံၚ်ဏီတှ်ေ ကၟုဲအာတရဴတံ အာကၠုၚ်ဟွံဂွံ အခိၚ်ဗ္တံတတ်အာကၠုၚ်ဟွံဂွံပုဟ်။ ကၟုဲဂွံအခေါၚ်မှ လုပ်ကၠုၚ်ဂွံ။ ဒးအာတ်အခေါၚ်ဂှ် ဒှ်အခက်အခုဲဟဂှ်ရ။ သွက်ကၟုဲဍုၚ်မ္ၚး ဆလအာတ်အခေါၚ်ဂွံ ဆလဟွံဂွံအခေါၚ်ပုဟ်” သာ်ဝွံ သ္ဂးရ။
တုဲပၠန် ဟိုတ်နူကဝ်မယှေန်ပၞာန် ပတိတ်လဝ်အမိၚ် “အခိၚ်ဗ္တံတိတ်မ္ၚးဟွံဂွံ” တုဲ အတိုၚ်ချိၚ်လဝ်ဟွံစိုပ်ဒၞာဲတုဲ ကၟုဲလ္ၚဵုတံ ဒးတိတ်ကဝက်ဂၠံၚ်၊ တေၚ်ကၟုဲလေဝ်အခက်အခုဲနွံ၊ ဟွံသင်ကာတှ်ေ ရပ်ပၠန်တုဲ ကၟုဲအာတရဴတံ ဂွံလုပ်ဝေၚ်ဂှ် ဒှ်မံၚ်အခက်အခုဲဏီရောၚ် ညးဆက်ဟီုရ။
ပ္ဍဲအခိၚ်အာတရဴပၠန် ဂိက်သၞေဟ်ကၚ်ကဝ်မယှေန်ပၞာန်တံ ဂၠိုက်ဂၠာဲစၟဳစၟတ်တေၚ်ဂြတ်လောန်ကီု၊ ထရတ်ကေတ်မံၚ်သြန် နူကဵုကၟုဲအာတရဴတံကီု ကၟဲနူဒေသလ္ၚဵု ဟွံကဵုလုပ်ကၠုၚ်ပိုၚ်ခြာစွံလဝ်နွံကီုတုဲ ကၟုဲအာတရဴ ညံၚ်ဂွံဂၠိုၚ်တိုန်ဂှ်ကၠောန်ဟွံဂွံဏီပုဟ် ညးပလံၚ်ကၟုဲမွဲတၠ သ္ဂးရ။
ရဲရပ်လဝ်တၞးကာတ်ကောန်ဍုၚ် တွဵုရးသေံ ၁၃/ တံ ယဝ်ရ ကၠုၚ်လုပ်ဝေၚ် ခရိုၚ်မတ်မလီုမ္ဂး အတိုၚ်ကဝ်မယှေန်ပၞာန် ခုတ်စၟတ်ကဵုလဝ် ပ္ဍဲကဵိုဟဝ်တဝ် ၂ မ ကေုာံ မဝ်တေဝ် ၁ မတံဟေၚ် ဒးလုပ်ဇူဒီုအာရောၚ် နူကဵုဂိတုသိပ်တမ်ပါ သၞာံအာတေံဖျေံလဝ်သ္ဂုတ်သွာတ်ရ။
ပ္ဍဲကဵုတွဵုရးမန် ကဝ်မယှေန်ပၞာန် သွက်ဂွံသၠုၚ်ပတိုန် အရာကဏ္ဍကၟုဲအာတရဴမာန် ကော်မံၚ်ကောံဓရီု မွဲဏှမွဲဏှကီုလေဝ် ပ္ဍဲဒေသလ္ၚဵုတံဂှ်ပေါဲဗတိုက်ဒှ်မံၚ်၊ ပရေၚ်ဂီုကၠီုဟၟဲတုဲ ကၟုဲလုပ်ကၠုၚ်ဝေၚ်ဂၠိုၚ်ၚ်ဟၟဲဏီပုဟ် ဂွံတီနူကဵုညးပလံၚ်ကၟုဲတံရ။
ပရိုၚ်-သြၚ်လောန်တိုၚ်မ်
Photo – MOI