နေပျဳတဝ် ၊ ဂျာန်နဝါရဳ ၁၇
လ္တူလၟေၚ်ဒဒှ် ပရေၚ်ၜိုဟ်လလမ်ဍုၚ်ဗမာ ဗီုပြၚ်ဂၠးကဝ်ကေုာံ တင်ဒတူလိုၚ် မဳဒဳယာအပ္ဍဲဍုၚ်မ္ၚးဍုၚ်တံဂှ် နကဵုလညာတ်သၟတ်တံ ဂွံပြံၚ်သၠာဲအာဗီုပြၚ်မာန် စုတ်လဝ်တၚ်နၚ်ပ္ဍဲကဵုလိက်ကၞပ် လလောၚ်တြးသၟတ် ပတိတ်လဝ် ဂျာန်နဝါရဳ ၁၆ ဂှ် တြးလဝ်ဝါဒ ပ္ဍဲကဵုလိက်ပရိုၚ်ကၟိန်ဍုၚ်ရ။
ပေါဲရုဲမာဲလောန်မ္ဂး လၟေၚ်ဒဒှ်ပရေၚ်ၜိုဟ်လလမ် ကာလအနာဂတ်ဒှ်ကၠုၚ်မာန်တံကေုာံ ပ္ဍဲလၟေၚ်ပရေၚ်ကမၠောန်ဒက်ပတန်ဍုၚ်ဂှ် ပံၚ်ကောံတုဲ အခေါၚ်အရာသၟတ်တံဂွံမံက်တိုန် သွက်ဂွံဖန်ဗ္ဒျ်အာဂှ် ပ္ဍဲကဵုလိက်ကၞပ်လလောၚ်တြးသၟတ် ကဝ်မယှေန်ပၞာန် လလောၚ်တြးလဝ်ရ။
ပ္ဍဲအရာသၟတ်တံ ဂွံထမံက်အာရုပ်ရဴ အခန်ကဏ္ဍပရေၚ်ၜိုဟ်လလမ်နတဲစှ်ေစှ်ေမာန် အကြာသတီုဂအုံသၟတ်ဂမၠိုၚ် ပရေၚ်ဆက်စၠောံ အတန်အခၠန် သွက်ဂွံဒှ်အာအထံက်ပၚ်မာန် ညံၚ်ဂွံဒက်ပတန်အာ ဇာဖိုၚ်သၟတ်တံ မဒှ်ကီုရ။
နူကဵုဏံ ကိုန်အစဳဇန်နတဲသၟတ်တံ သွက်ဂွံဖန်ဖက်အာကေတ်တ်မာန် ညံၚ်ဂွံထမံက်ရုပ်ရဴချူစုတ်လဝ် ပ္ပ္ဍဲကဵုလိက်ကၞပ်လလောၚ်တြးသၟတ်ဏံဂှ် ဂွံဆဵုကေတ်ရ။
ဖိုရမ်သၟတ်ဟီုဂှ် သွက်ဂွံထမံက်အာပဝ်လသဳကဵု လညာတ်ပရေၚ်ဍုၚ်ကွာန်ဒပ်ပၞာန်မာန် စင်လဝ်ခဗါဲကဵု သၟတ်တံရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“စင်လဝ်ခဗာဲကဵု သၟတ်တံတုဲ ကဵုထမံက်အာရုပ်ရဴ ပဝ်လသဳလညာတ်ပရေၚ်ဍုၚ်ကွာန်ဒပ်ပၞာန်တံရ။ ကၠောန်ပတိတ်လိက်ကၞပ်လလောၚ်တြးသၟတ်ဂှ် ကွေံကွေံဂှ် ၜိုတ်လဵုထမံက်အာရုပ်ရဴမာန်ရော။ ဂကောံသွက်ဂွံထမံက်အာရုပ်ရဴအဝဵုနွံဂှ် ဒှ်မံၚ်သၟဝ်တဲ ဗော်ဒပ်ပၞာန်တံတှ်ေ ရမျှာၚ်သၟတ်တံ ပါလုပ်ကၠုၚ်ပ္ဍဲကဵု ပဝ်လသဳဍုၚ်ဏံဟွံမာန်ပုဟ်။ အတိုၚ်ဒပ်ပၞာန်ကၠောန်အာ ရမျှာၚ်သၟတ်တံဂးတုဲ အတိုၚ်ပၟိက်စိုတ်ဍေံတံ ကၠောန်အာဏောၚ် ခယျ” သာ်ဝွံသ္ဂးရ။
တုဲပၠန် အတေၚ်အဓ္ဓမ ပၠုပ်မံၚ်သၟတ်တံအပ္ဍဲကဵုဒပ်ပၞာန် ဥပဒေယိုက်ဝန်ပၞာန်ဂှ် ဗွဲကိုပ်ကၠာပလီုထောံတုဲ ကၟိန်ဍုၚ်ညံၚ်သ္ဂောံဂွံ ပရေၚ်ၜိုဟ်လလမ်မာန် နူကဵုဗွိုၚ်ပရေၚ်ဍုၚ်ကွာန်ဂှ် ဒပ်ပၞာန်တိတ်ကဵုမှ လပအ်သၟတ်တံဂှ် ထမံက်အာရုပ်ရဴမာန်ရောၚ် ညးဟီုစၟတ်သ္ပလဝ်သမ္တီရ။
ဖိုရမ်သၟတ်ပရေၚ်ၜိုဟ်လလမ် ၂၀၂၆ ကၠောန်အာလဝ်ပ္ဍဲကဵုနေပျဳတဝ် ပွိုၚ်ပိတ္ၚဲဂှ် နူကဵုကမ္မတဳပ္ညဳပ္ညပ် ထမံက်ရုပ်ရဴပရေၚ်ၜိုဟ်လလမ် NSPNC ဒပ်ပၞာန်ဗမာ သ္ကိုပ်သ္ကလဝ်ရ။
အခိၚ်ကၠောန်ပေါဲရုဲမာဲတုဲ လၟေၚ်ပရေၚ်ၜိုဟ်လလမ် မုက်လိက်ဝင်တၟိ က္တဵုဒှ်ကၠုၚ်ကေုာံ အရာဒက်ပ္တန်ကၟိန်ဍုၚ်ဂှ် ကဝ်မယှေန်ပၞာန်ထ္ၜးလဝ်ဟိုတ် သွက်ဂွံသၠုၚ်ပတိုန်သၟတ်တံညံၚ်ဂွံပါလုပ်ဂးရ။
အတိုၚ်မူဝါဒဒပ်ပၞာန်လးဖျေံလဝ် သွက်ဂွံထမံက်အာရုပ်ရဴသ္ပလဝ် လေံထံက်ကဵုသၟတ်တံတုဲ စကာသုၚ်စောဲမံၚ်ရောၚ် ညးအခေါၚ်ဟီုဂးနွံ ဒပ်ပၠန်ဂတးဍုၚ်မန် MSRF မိတလဉာဏ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ဒပ်ပၞာန်ၜးကယျိုၚ် ဗိုက်လတက်လဝ်ပလောအ်တိုက်ပုၚ် အခိၚ်ဂေတ်မံၚ်ရးနိဂီုဂှ် အတိုင်ပၟိက်ဒပ်ပၞာန်မိစ္ဆာဏံ သွက်ဂွံထမံက်အာရုပ်ရဴ သ္ပလဝ်ကဵုသၟတ်တံလေံထံက်မွဲ ပိုဲတံညာတ်ရ။ ဗတိုက်သရိုဟ်ဖျေံအာ သၠောတ်တၠအဝဵုပၞာန်ဏံမာန်မှ ဒက်ပတန်အာ ကၟိန်ဍုၚ်ဖိတ်ဒရေဝ် ဒဳမဝ်ကရေသဳမာန်ရောၚ်” သာ်ဝွံ သ္ဂးရ။
ပ္ပ္ဍဲကဵုလိက်ကၞပ် လလောၚ်တြးသၟတ်ဂှ်တှ်ေ ပ္ဍဲအရာဒက်ပတန်ပရေၚ်ၜိုဟ်လလမ်မ္ဂး ပရေၚ်ဟွံတုပ်သၟဟ်တၞဟ်ခြာမံၚ်တံဂှ် ဒးကၠိုဟ်ခၠၚ်တုဲ သွက်ဂွံသၠုၚ်ပတိုန်ပရေၚ်ပညာ၊ ပရေၚ်ထတ်ယုက်၊ ယေန်သၞာၚ် ပရေၚ်ဝေင်ဇြဟတ်ကေုာံ သွက်သၟတ်နွံမံၚ် ပ္ဍဲကဵုဗွိုၚ်ပရေၚ်ဖောအ်ဗြဳပိုန်ဒြပ်နာနာတံ ညံၚ်ဂွံသၠုၚ်ပတိုန်ကဵုအစောံစရာဲမာန် ဒးတံၚ်ဓဇက်အာကိုန်အစဳဇန် သွက်ဇၟာပ်ပ်ကဏ္ဍနာနာ မဒှ်ရ။
သွက်ပရေၚ်ၜိုဟ်လလမ်ကေုာံ ပရေၚ်စန်ပကောံညဳသၟဟ် စပ်ကဵုအစဳဇန်သၠုၚ်ပတိုန်သဟဇာတပရေၚ်မၞိဟ်တံ ညံၚ်ဂွံဒှ်အထံက်ပၚ် မကိတ်ညဳကဵုအကာဲအရာဒေသဗလးတိမာန် သွက်ဂွံထမံက်အာ မူဝါဒကေုာံလၟေၚ်ကမၠောန်တံလေဝ် ပါလုပ်ကီုရ။
တုဲပၠန် ကသပ်တိတ်ကၠုၚ်လဝ် နူကဵုဖိုရမ်သၟတ်ပရေၚ်ၜိုဟ်လလမ်ဏံ ပကောံပကေဝ်အာတုဲ သွက်ဂွံတံၚ်ဓဇက်အာ မူဝါဒဆေင်စပ်ကဵုသၟတ်ကေုာံပရေၚ်ၜိုဟ်လလမ် မဒှ်ရ။
စပ်ကဵုပရေၚ်အနာဂတ်သၟတ်တံကၠေံဗ္ဒန် ကိစ္စပရူပရာ ပရေၚ်ယိုက်ဝန်ပၞာန်တံဟွံပါတုဲ သၟတ်တံဏံဒးဒုၚ်စကာ သုင်စောဲလဝ်သက်က်ရဏောၚ် ညးအုပ်ကာကံၚ်သဳမဳဒဳယာပရိုၚ်ဍုၚ်ဗမာ ဥူတိုဝ်ဇြဝ်လာတ် ထံက်ထ္ၜးရ။
“ပဵုနူဏံတုဲ ပြဟ်ဟ်ဏံသၟတ်တံ ဒးဇီုကပိုက်မံၚ်ကဵု ဟိုတ်နူဗီုပြၚ်ဥပဒေယိုက်ဝန်ပၞာန်တံ၊ ဟိုတ်နူပရေၚ်ပၞာန်အပ္ဍဲဍုၚ်ဂှ် ပရေၚ်ပညာ၊ ပရေၚ်ပိုန်ဒြပ် ဒစေင်ဝေင်အာတုဲ ပရူပရာအနာဂတ်သၟတ်တံကၠေံဗ္ဒန်လေဝ်ဟွံပါလုပ်၊ သၟတ်တံဒးဒုၚ်စကာသုင်စောဲအာသက်က်ရဒှ်မံၚ်။ ဇၟာပ်ပ်အလဵုအသဳပၞာန်ဂှ် ကေင်စကာစသုၚ်လဝ် သၟတ်တံအဆက်က်ရ သက်သဳနွံမံၚ်” သ္ဂးရ။
ပ္ဍဲကဵုဖိုရမ်သၟတ်ပရေၚ်ၜိုဟ်လလမ်ဏံ နူကဵုရးဒေသကဵု တွဵုရး ၁၄ ဒၞာဲကေုာံ နေပျဳတဝ်၊ သၟတ်နူကဵုတက္ကသိုလ် ပရေၚ်ပညာအဆံၚ်သၠုၚ်တံ၊ ဂကောံပုဂ္ဂလိကနာနာကေုာံ ဂကောံမှာဇန်နာနာတံ ညးစၞးသၟတ် မွဲအလုံဍုၚ် ၄၅၀ တၠ တိုန်စိုပ်လဝ်ရ။
ပ္ဍဲအနာဂတ်ဂတဏံ အခန်ကဏ္ဍကေုာံလၟေၚ်ပရေၚ်ကမၠောန်သာ်လဵု သၟတ်တံပါလုပ်အာမာန် ပွိုၚ် ၃ တ္ၚဲ သၠာဲဂတးသဳကၠဳလဝ် ဗွဲမဍုက်ကေဝ်တုဲ လလောၚ်တြးလဝ်လိက်ကၞပ်သၟတ်ရောၚ် ကဝ်မယှေန်ပၞာန် ပတိတ်လဝ်ပရိုၚ်ရ။
သၟတ်တိုန်စိုပ်မံၚ် ပ္ဍဲဖိုရမ်ၜိုဟ်လလမ်ဏံ ဟွံသ္ပစၞးကဵုသၟတ်စိုပ်မံၚ်ပၠန်ဂတးတံကီု သွက်ပရေၚ်ၜိုဟ်လလမ် ကိစ္စဒးကလေၚ်သဳကၠဳအာကဵု ဒပ်ပၞာန်ဟီုဂှ် ဟွံစှ်ေနတဲပုဟ် ညးလ္ၚဵုဒစဵုဒစးမံၚ်သၠောတ်တၠအဝဵုပၞာန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပရိုၚ်-သြၚ်လောန်တိုၚ်မ်
Photo – MOI