ကြုၚ်ဒဵု၊ ဂျာန်နဝါရဳ ၁၈
ညးဍုၚ်ကွာန်လၟိဟ်ကဵုလ္ၚီ နူကဵုခရိုၚ်ဒူပလာယာ ဗော်သွးကောန်ဂကူ ကရေၚ် KNU (၄) ပွိုၚ်ဍုၚ်တံ ကၠောန်ပေါဲထမံက်ထ္ၜးဆန္ဒ ဒစဵုဒစး ပေါဲရုဲမာဲဒပ်ပၞာန် ၜိုဟ်ဟ်သြိုဟ်ဟ်ရဂှ် ဗဟဵု KNU လလောၚ်ပတိတ် ပရိုၚ် ပ္ဍဲကဵုဂျာန်နဝါရဳ ၁၇ ရ။
ညးဍုၚ်ကွာန် နွံမံၚ်တိဍာ်ကဝ်တူလေဝ် ခရိုၚ်ဒူပလာယာတံ အတိုၚ် အလုံမွဲခရိုၚ်ဂှ် စၟတ်လဝ်အခိၚ် (Zero Hour)
ပ္ဍဲဂိတုဂျာန်နဝါရဳ ၉ အခိၚ်နူဂယး ၉ နာဍဳဂှ်တုဲ ညးဍုၚ်ကွာန် ပွိုၚ်ဍုၚ်ညးကဵုညး ပါ်လဝ်ဒၞာဲတံဂှ် မွဲအခိၚ်ဓဝ် ကၠောန်အာပေါဲဒစဵုဒစး ပေါဲရုဲမာဲ နနဲၜိုဟ်ဟ်သြိုဟ်ဟ်ရ။
ပေါဲရုဲမာဲအလီ ကဝ်မယှေန်ပၞာန်ကၠောန်ဏံဂှ် သ္ပစၞးကဵုဆန္ဒညးဍုၚ်ကွာန်တံလေဝ်ဟွံမာန်၊ သၞောတ်ပေါဲရုဲမာဲဒဳမဝ်ကရေသဳဟွံသေၚ်တုဲ ဍုၚ်ဂၠးကဝ်ဂမၠိုၚ်လေဝ်ဟွံသ္ပစၟတ်သမ္တီပုဟ် ဗဟဵု KNU သ္ဂးလဝ်ရ။
ပ္ဍဲကဵုအစဳဇန် ဒစဵုဒစးပေါဲရုဲမာဲအလီ ဆန္ဒညးဍုၚ်ကွာန်ဟွံပါဏံ က္ဍိုပ်သ္ကိုပ်ညးဍုၚ်ကွာန် နူဇၟာပ်ပွိုၚ်ဍုၚ်တံ ဟီုတွံဒစဵုဒစးလဝ်ပေါဲရုဲမာဲကီု တြး ပရအ်ကဵုဏာတၞးလိက်လၟေၚ်ကီု ရပ်ပဝ်သတာတုဲ ဂေတ်ဂေၚ်ဒစဵုဒစးလဝ်ဂှ် ချူလဝ် ပ္ဍဲလိက်လလောၚ်တြးရ။
တုဲပၠန် အလဵုအသဳပျဲပျာံဂစိုတ်ညးဍုၚ်ကွာန်- ပိုဲဟွံကေတ်၊ ပေါဲရုဲမာဲအလီကဝ်မယှေန်ပၞာန်-ပိုဲဟွံကေတ်၊ ဝါဒမဟာဂကူဇၞော်-ပိုဲဟွံကေတ်၊ သွက်ဂွံဒက်ပတန် ပရေၚ်ညဳသၟဟ်ကောန်ဍုၚ်အရၚ်ကေုာံ သွက်ဂွံဒက်ပတန် အလဵုအသဳကဝ်တူလေဝ် ရဴသာ်ဝွံ ပ္ဍဲဇၟာပ်ပွိုၚ်ဍုၚ်တံ ကညၚ်ကမြေဲကၠောန်လဝ် ပေါဲထမံက်ဆန္ဒတံ သ္ဂးရ။
အတိုၚ်အလုံခရိုၚ်ဒူပလာယာဂှ် ပ္ဍဲပွိုၚ်ဍုၚ်ကအ်ကြိက် ၄ ဒၞာဲဂှ် ညးဍုၚ်ကွာန် ၂၆၅၀ တၠ၊ ပ္ဍဲပွိုၚ်ဍုၚ် ကြုၚ်ဒဵု ညးဍုၚ်ကွာန် ၄၀၀၊ ပ္ဍဲပွိုၚ်ဍုၚ်ဝေန်ယျေဝ် ၂ ဒၞာဲဂှ် ညးဍုၚ်ကွာန် ကြပ် ၂၀၀၀၊ ပ္ဍဲပွိုၚ်ဍုၚ် နိုတကဝ် ၄ ဒၞာဲဂှ် ကြပ် ၂၀၀၀၊ အပံၚ်ဖအိုတ် ညးဍုၚ်ကွာန်ကြပ် ၇၀၀၀ ဂေတ်ဂေၚ်ထ္ၜးလဝ်ဆန္ဒ ၜိုဟ်ဟ်သြိုဟ်ဟ်ရဂှ် ဌာန်ဂအုပ်ဗဟဵု KNU လလောၚ်ပတိတ်လဝ်ရ။
ပ္ဍဲတွဵုရးကရေၚ်မ္ဂး နူကဵုကဝ်မယှေန်ပၞာန် ကၠောန်လဝ်ပေါဲရုဲမာဲသ္ကုတ် ၁ ကဵု ၂ ပွိုၚ်ဍုၚ်ဖာအၚ်၊ တာန်တံၚ်ဂျဳ၊ ဗြဝတဳ၊ ဖာပေါန်၊ လိုၚ်ဗၠဲတံတုဲ ပေါဲရုဲမာဲသ္ကုတ် ၃ ဂှ် သွက်ဂွံကၠောန်အာ ပ္ဍဲကဵုပွိုၚ်ဍုၚ်လှာဒကှ်ကဵုကအ်ကြိက်တံ နွံမံၚ်ဏီရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ