ရေဝ်၊ ဂျာန်နဝါရီ ၂၃
စနူကဵုသၞာံ ၂၀၂၄ ဒဵုကဵု ၂၀၂၆ ဂိတုဂျာန်နဝါရဳဏံ ဒၟာနူကဵုဟိုတ်နာနာသာ် ရဲဂြိပ်တိတ်အာလဝ်နူဒပ်တံဂှ် အတိုၚ်စေဝ်ပၞောန်ဖျေံလဝ်ကေတ်အာအရေဝ်ရောၚ် ဒပ်ပၠန်ဂတးဍုၚ်မန် MSRF ကဵုသမ္တီ လလောၚ်တြးလဝ် ပ္ဍဲဂျာန်နဝါရဳ ၂၀ ရ။
ကောန်သ္ဂံၚ် ၁၄ တၠ ဂြိပ်တိတ်လဝ် နူကဵုဒပ် MSRF တံဂှ်ထမံက်ထ္ၜး လဝ်သီုကဵုဗီုရုပ်၊ ယၟု၊ မဂၞန်ဇကုတံတုဲ အတိုၚ်အာတ်လဝ်အခေါၚ် တ္ၚဲပေၚ်အာကီုလေဝ် ဟွံကလေၚ်စိုပ်ကၠုၚ်တမ်ဒပ်ဂှ်ကီု အဃောတိတ်မုက်ပၞာန်၊ နွံမံၚ်စးပၞာန် ယိုက်ဂၠေၚ်မံၚ်တာလျိုၚ် ဂြိပ်တိတ်အာလဝ်တံဂှ်တှ်ေ သ္ဂးလဝ်ရဲဂြိပ်နူဒပ်ရ။
ဟွံဒဂေတ်ဗက်စေဝ်ပၞောန် ဒပ်ပၠန်ဂတးဍုၚ်မန် MSRF မွဲသာ်၊ နအလဵုစိုတ်ဆန္ဒဇကု ဂြိပ်တိတ်အာလဝ်နူဒပ်မဒှ်တုဲ ရဲဂြိပ်လဝ်နူဒပ်တံဏံဂှ် မုလေဝ်ဟွံဆေင်စပ်ကဵုဒပ်ရရောၚ် ပ္ဍဲလိက်လလောၚ်တြးဂှ် ချူထမံက်လဝ်ရ။
သွက်ကိစ္စပရေၚ်ကေတ်အရေဝ် ရဲဂြိပ်လဝ်နူဒပ်တံကီု ရဲဂြိပ်လဝ်နူဒပ်တံ လုပ်ဖျေံလွဟ်ပ္ဍဲဒပ်ပၞာန်ဗမာနွံ/ဟၟဲကီု သၞောတ်ထ္ၜတ်အပိုၚ်အခြာကာလ ယိုက်ဂၠေၚ်တာလျိုၚ် ဖျေံစွံလဝ်စေဝ်ပၞောန် ဗီုလဵုနွံကီုဂွံတီမာန် နူကဵုဌာန်ပရိုၚ်သြၚ်လောန်တိုၚ်မ် ကေတ်အဆက်သၟာန်လဝ်ကု ညးတာလျိုၚ်အခေါၚ်ဟီုဂးနွံ MSRF ကီုလေဝ် ဟွံကလေၚ်ပရိုၚ်ဏီ။
စနူကဵုသၞာံ ၂၀၂၁ ပ္ဍဲဂိတုအဝ်ဂတ် ၇ ဂှ် သ္ကိုပ်ဗိုလ်နာဲထူ (သ္ကိုပ်တမ်ဒပ်ဒရက်ဂန်လၟုဟ်) က္ဍိုက်က္ဍိုပ်တုဲ မၞိဟ် ၇ တၠ နကဵုလွဟ် ၃ ဇကိုအ် စဒက်ပတန်ပံက်လဝ် ဒပ်ပၠန်ဂတးဍုၚ်မန် MSRF တုဲ ပ္ဍဲဒေသရေဝ်သၠုၚ်ကျာဂှ် ဆက်လုပ်လဝ်ပေါဲဗတိုက် ထပိုတ်ရိုဟ်ကၞက် သၠောတ်တၠအဝဵုပၞာန်ရ။
ထ္ၜးဟိုတ်ပေါဲရုဲမာဲ ဟွံယဵုလ္ဂူဍာံပြတုဲ အခိၚ်ဒပ်ပၞာန်ကလေၚ်သီကေတ်အဝဵု ပ္ဍဲကဵုသၞာံ ၂၀၂၁ တေံ ဟိုတ်နူဒပ်ပၞာန် ပန်ဂစိုတ်လဝ် ရဲထမံက်ထ္ၜးလဝ်ဆန္ဒၜိုဟ်ဟ်သြိုဟ်ဟ်တံဂှ် ဒပ်ပၠန်ဂတးနာနာမံက်တိုန်ကၠုၚ်တုဲ ပဍဲဂှ် MSRF လေဝ် ပါလုပ်ကီုရ။
ပ္ဍဲသၞာံ၂၀၂၃ ဂိတုဒဳဇြမ်ပါ ၁၅ ဂှ် MSRF လုပ်ကၠုၚ်သၟဝ်ပၠတရဴပရေၚ်ဍုၚ်ကွာန် ဖိတ်ဒရေဝ်ကံၚ်သဳဍုၚ်မန် MSFC တုဲ နကဵုဒပ်ရပ်လွဟ်မွဲမံၚ်ကၠုၚ်လဝ် သၟဝ်ဌာနပရေၚ်စဵုဒၞာကံၚ်သဳဂှ်ရ။
တုဲပၠန် ပံၚ်တောဲကဵုဒပ်ပၞာန်စဵုဒၞာညးဍုၚ်ကွာန် PDF တိဍာ်လဝေၚ်ပၞာန် စၟတ် (၁) နဲကဲဗျူဟာ (၃၃) တုဲ ပဵုနူကဵု ကဆံၚ်မဟာမိတ်ဂှ် သၠုၚ်ပတိုန်လဝ် “ဒပ်ကောဒေံ” ပ္ဍဲကဵုဂိတုအဝ်ဂတ် သၞာံအာတေံရ။
မွဲလပါ်ပၠန် ပ္ဍဲကဵုဒဳဇြမ်ပါ သၞာံအာဏံ ဂကောံဒပ်ရပ်လွဟ် ၁၉ ဂကောံတံ ပ္ဍဲကဵုဒက်ပတန်လဝ် ဒပ်ပံၚ်ကောံမဟာာမိတ်ပၠန်ဂတးကညၚ် SRA ဂှ် MSRF လေဝ် ဒုၚ်ယၟုဒပ်ကောန်ဍုၚ်အရၚ်တုဲ ပါလုပ်လဝ်ရ။
ပရိုၚ်-သြၚ်လောန်တိုၚ်မ်
Photo – MSRF