ပ္ဍဲလံၚ်လုၚ် ကဝ်မယှေန်ပၞာန် ပန်ခြော်မံၚ်လွဟ်ဇၞော်ကြာန်န်တုဲ ညးဒေသ ၁၀၀၀ ပြၚ် ဒးဂြိပ်ပါဲမံၚ်

လံၚ်လုၚ်၊ ဂျာန်နဝါရဳ ၂၅

ရးတနၚ်သဳ ပ္ဍဲကဵုကွာန်နွံမံၚ် ပွိုၚ်ဍုၚ်လံၚ်လုၚ်တံဂှ် နူကဵုဒပ်ကဝ်မယှေန်ပၞာန် ပန်ခြော်ထောံမံၚ်လွဟ်ဇၞော်ကြာန်န် တုဲ ညးဒေသ ၁၀၀၀ ပြၚ် ဒးဂြိပ်ပါဲမံၚ် ညးတာလျိုၚ်ပကဖ လံၚ်လုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။ 

ဒပ်ပၞာန်ဗမာ ဖျေံလဝ်ဒၞာဲ ကရပ်ရုၚ်ကာတ်သတာန် နွံမံၚ်ဂၠံၚ်ဇိုၚ်ၜဳထဝါဲဂှ် ပန်ခြော်ဖျေံလွဟ်ဇၞော်ကြာန်န် ပ္ဍဲကဵုကွာန်ပျေၚ်ထိၚ်၊ ကုန်သာယာ၊ အေန်ဇံက်၊ ဝပျဝ်တံ စနူဂျာန်နဝါရဳ ၂၃ အခိၚ်သဝ်တ္ၚဲ ၅ နာဍဳ ဒဵုစိုပ်ဗ္တံအခိၚ် ၁၁ နာဍဳ သ္ဂးရ။

ဒပ်စဵုဒၞာညးဍုၚ်ကွာန်တံ ညံၚ်ဟွံဂွံကၠုၚ်ပလီု ကၠောန်ပေါဲရုဲမာဲ ပ္ဍဲဂျာန်နဝါရဳ ၂၅ ဂှ် ဗက်ဂြာံ ပန်ခြော်မံၚ်လွဟ်ဇၞော် လပါ်ကွာန်တံ ဖတုံစှ်ေမံၚ်ပြးဇးတုဲ ကောန်ကွာန်တံ ဒးဂြိပ်ပါဲမံၚ်ရဂှ် ညးတာလျိုၚ်ပကဖ လံၚ်လုၚ်မွဲတၠ ဟီုရ။

မကမ်လွဟ်ဇၞော် ဒပ်ကဝ်မယှေန်ပၞာန် ပန်လဝ်တံ ဟွံဒးသ္ၚိဌာန်၊ ကောန်ကွာန်တံ ဟွံဒးဘဲဝပ်ကီုလေဝ် ညးဒေသတံသီုဖအိုတ် ဒးဖေက်လကိုတ်မံၚ်အိုတ်စောန် သ္ဂးရ။ 

ဟိုတ်နူပန်လွဟ်ဇၞော်ဂှ် ညးဒေသ ကွာန်ပျေၚ်ထိၚ်၊ ကုန်သာယာ၊ အေန်ဇံက်၊ ဝပျဝ် ၁၀၀၀ ပြၚ်ၚ်တံ ဒးဂြိပ်ဒဴပါဲအောပ်မံၚ် ဒၞာဲခယျဗၠးဘဲ ကွာန်ကဵုဥဒျာန်ကၠအ်တံရ။

ပ္ဍဲကဵုကဝ်မယှေန်ပၞာန် ကၠောန်လဝ်ပေါဲရုဲမာဲသ္ကုတ်ပိ ဂျာန်နဝါရဳ ၂၅ ဂှ် ပွိုၚ်ဍုၚ်လံၚ်လုၚ်ပါမံၚ်ကီုတုဲ ဒပ်ပကဖတံ ညံၚ်ဟွံဂွံကၠုၚ်စိုပ် လ္တူဍုၚ်ကဵု ပွဳပွူဗ္ဒာဲဗ္ဒာဲတံဂှ်တုဲ ဖျေံလဝ်ဇြဟတ်ဂၠိုၚ်ၚ်ကီု ပန်မံၚ်လွဟ်ဇၞော်ကီု ကၠောန်သ္ပမံၚ် မဒှ်ရ။

ပ္ဍဲပွိုၚ်ဍုၚ်လံၚ်လုၚ် အရာပ်လ္တူဍုၚ် ၄ ဒၞာဲ၊ ကွာန်သခါန်ဂျဳ ကေုာံ ကွန်မံၚ်မကာန်တံဂှ် ညးဍုၚ်ကွာန်တံ ကၠုၚ်ကဵုလဝ်မာဲနွံညိညကီု ဂွံတီရ။ 

ပရိုၚ်-သြၚ်လောန်တိုၚ်မ်

Leave a Reply

Your email address will not be published. Required fields are marked *