နေပျဳတဝ် ၊ ဂျာန်နဝါရဳ ၂၅
ပလီုပလာ် ပလာတ်ပထုဲလဝ်ပေါဲရုဲမာဲစောဲစပ်တုဲ အဃောကဝ်မယှေန်ပၞာန် ကေတ်မံၚ်အရေဝ်ဆက်က်ဏံဂှ်တှ်ေ ဗ္ၜူအရက်တုဲ ညးလက်လဝ်သ္ကိုပ်ရုၚ်မာဲမွဲတၠဂှ် ကဝ်မယှေန်ပၞာန် ပံက်လဝ်အမှု နကဵုဥပဒေစဵုဒၞာပေါဲရုဲမာဲဂှ် ချူထမံက်လဝ် ပ္ဍဲကဵုလိက်ပရိုၚ်တြးဝါဒ ကၟိန်ဍုၚ်တံရ။
လောန်ကၠုၚ်ဂျာန်နဝါရဳ ၁၀ တေံ ပ္ဍဲကဵုဘာဗတောန်လိက် တန်မူလ ကွာန်သာန်မျုက်ယှေ ပွိုၚ်ဍုၚ်တာသဳ ရးမာန္တလေဝ် ကၠောန်လဝ်ရုၚ်မာဲဂှ် ကောန်ကွာန် ကိုကျဝ်မိုဝ်ဥူ သုၚ်အရက်ဗ္ၜူဓလူ တုဲ ကညာၚ်လက်လဝ် သ္ကိုပ်ရုၚ်မာဲ ဂအုပ်ဘာဇၞော် ဥူယျေဝ်လေၚ်ဥူ ပပ်ပ်ပဳပဳရောၚ် ကဝ်မယှေန်ပၞာန် လလောၚ်ပတိတ်လဝ်ပရိုၚ်ရ။
ပ္ဍဲကဵုရုၚ်မာဲစၟတ် (၃) ပံက်စွံလဝ် ပ္ဍဲကဵုဗွိုၚ်ဘာဗတောန်လိက်ဂှ် ဥူယျေဝ်လေၚ်ဥူကဵု သ္ကိုပ်အုပ်ဓုပ်တံ စက်စုတ်မာဲ ပရေၚ်ယောၚ်ယာ ညံၚ်ဟွံဂွံဒှ် အဃောရေၚ်တၠုၚ်ကၠောန်ၜိုတ်မံၚ်တံဂှ် ကိုကျဝ်မိုဝ်ဥူ စိုပ်ကၠုၚ်ရုၚ်မာဲတုဲ လက်လဝ်သ္ကိုပ်ရုၚ်မာဲ ချူထမံက်လဝ်ရ။
သွက်အရာဏံ နူကဵုရုၚ်ဗၠာဲသၟိၚ် ၝောံဍုၚ်တာသဳ ပံက်အမှုကု ကိုကျဝ်မိုဝ်ဥူ အယုက် ၃၄ သၞာံ နကဵုဥပဒေစဵုဒၞာပေါဲရုဲာဲ ၝောံပိုဒ် ၂၄(က) ကီုလေဝ် ဗီုပြၚ်လဵုလက်ဆောလဝ်ဂှ် ဗွဲတြးချိုတ်တ်ပၠိုတ်တ် ချူလဝ်ဟၟဲပုဟ်။
ပ္ဍဲဂျာန်နဝါရဳ ၁၅ ဂှ်လေဝ် ပ္ဍဲဍုၚ်လ္ဂုၚ် ပွိုၚ်ဍုၚ်ဒဂုၚ်ဍုၚ်တၟိ (သ္ကုတ်ဗၟံက်)ဂှ် နူကဵုဗော်သၟာကမၠောန်ညးဍုၚ်ကွာန် ကေုာံဂကောံတံ အဃောစှ်ေမံၚ်ပရေၚ်စန်ဒက်မာဲ ဗစူမံၚ်ဂတဵုမုက် ဇိုၚ်ဂၠံၚ်မွဲဒၞာဲ တြုံကဵုဗြဴၜါတၠ ကၠုၚ်ဗဒေါအ်တာဒၞာဲလဝ်ဂှ် ကဝ်မယှေန်ပၞာန် ကေတ်ထောံအရေဝ်ကီုရ။
တြုံကဵုဗြဴၜါတၠ အယုက်ၜိုတ် ၄၀ သၞာံ သွံမံၚ်ဆေင်စသုၚ် ဇိုၚ်ဂၠံၚ်ပန်သွာၚ်ဂှ် ရဲဗော်တံဏံ ညံၚ်ဟွံဂွံဗစူဂတဵုမုက် နကဵုနဲကဲစုၚ်ၚ် တာဒၞာမံၚ်တုဲ ညးတြုံဂှ် နကဵုဗီုပြၚ်ပပ်ပ်ပဳပဳ ကၠောန်ထ္ၜးလဝ်ဂှ်ရ နကဵုဥပဒေစဵုဒၞာပေါဲရုဲမာဲ ကေတ်လဝ်အရေဝ်ကီု လလောၚ်တြးလဝ်ရ။
တုဲပၠန် စံၚ်ပလီုလဝ် ဂတဵုမုက်စန်ဒက်မာဲ ဗော်ဓယံက်ဒပ်ပၞာန် ပျဳခိုၚ်ဖျိုဝ်ဂးတုဲ ညးတြုံၜါတၠ ရဲနူကွာန် ညံၚ်ကုန် ပွိုၚ်ဍုၚ်ခယာန် ဂှ်လေဝ် ပံက်အမှုရပ်ကၠေၚ်ဏာ နကဵုဥပဒေစဵုဒၞာပေါဲရုဲမာဲ ၝောံပိုဒ် ၂၃(က)/၂၈ ကီုရ။
လၟေၚ်ကမၠောန် ပေါဲရုဲမာဲကဝ်မယှေန်ပၞာန် ညံၚ်ဂွံလီု ဖန်ဖက်လဝ် နကဵုနဲကဲနာနာသာ်ဂးတုဲ ထမံက်ပတိတ်စောဲစပ်လဝ် ၃၃၁ အမှုနွံတုဲ ပ္ဍဲကဵုအလုံမွဲဍုၚ် ပံက်အမှုကေတ်လဝ်အရေဝ် ညးတြုံညးဗြဴ ၄၀၄ တၠ နွံရ။
ပရေၚ်ဂီုကၠီုပေါဲရုဲမာဲ ညံၚ်ဂွံယောၚ်ယာ ရဲတြးမံၚ်ဝါဒတံဂှ်လေဝ် ဆက်ဂၠိုက်ဂၠာဲစၟဳစၟတ်အာရောၚ် ဝန်ဇၞော်ပရေၚ်ကေၚ်ကာအပ္ဍဲဍုၚ် ဒုတိယသ္ကိုပ်ပၞာန်ဇၞော် ထောန်န်နံၚ် ဟီုပတိတ်လဝ် အကြာတ္ၚဲတံဏံနွံရ။
ဥပဒေစဵုဒၞာပေါဲရုဲမာဲဟီုဂှ် ပဵုနူကဵုစဵုဒၞာပေါဲရုဲမာဲတုဲ ပါ်ပါဲဒးဟီုတှ် အောန်အိုတ်ထံၚ်နူ ၃ သၞာံ ဒဵုကဵုထံၚ်မွဲအယုက် ဟွံသေၚ်မ္ဂး အမိၚ်ဂစိုတ်ဖျေံအာမာန် နကဵုလွဟ်မွဲ စကာသုၚ်စောဲလဝ်ရောၚ် နူကဵုဂကောံ “ရမျှာၚ်” ထံက်ထ္ၜးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media

