အခိၚ်သီလဝ်အဝဵုဏံ အကြာသၟတ်တံ စကာသုၚ်စောဲမံၚ် ဂဥုဲၜူမာဲ ထေၚ်လဵုဂၠိုၚ်တိုန်မံၚ်

မတ်မလီု ၊ ဂျာန်နဝါရဳ ၂၅

အပ္ဍဲကဵုကဝ်မယှေန်ပၞာန် သီဂွံလဝ်အဝဵုပွိုၚ် ၅ သၞာံဏံဂှ်တှ်ေ အကြာသၟတ်နွံမံၚ်ပ္ဍဲဒေသတံဂှ် စကာသုၚ်စောဲဂဥုဲၜူမာဲ ဟွံလုပ်သၞောဝ်တံ ထေၚ်လဵုဂၠိုၚ်တိုန်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ဂကောံဂီုကၠီု သၟဝ်တဲကဝ်မယှေန်ပၞာန်တံ ထ္ၜးလဝ်ဟိုတ်ပရေၚ်ဂီုကၠီု တုဲ ဟွံဗက်ရပ်ဂဥုဲၜူမာဲဗီုဗီုကၠာတေံကီု ရာန်ကေတ်ဂဥုဲၜူမာဲတံ ဂွံမံၚ်လောဲလောဲကီုတုဲ အကြာသၟတ်တံ စကာသုၚ်စောဲတိုန်ဂဥုဲၜူမာဲ ဂၠိုၚ်တိုန်မံၚ်ဗီုဏံရောၚ် ဂွံတီရ။

ပြဟ်ဟ်ဏံ သၟတ်အဝဲစိုပ်တံသၟးဟွံက သၟတ်သၟဝ်အယုက် ၁၈ သၞာံ ဟွံပေၚ်တံလေဝ် စကာသုၚ်စောဲမံၚ်နွံတုဲ ပရေၚ်ဇီုကပိုက် ဖဵုပရေအ်ပရေအ် သွက်အနာဂတ်သၟတ်တံဒှ်ကၠုၚ်မာန်ဂှ် ညးဒေသတံ ဂွိၚ်ဂွာဲမံၚ်အိုတ်ရ။

ပ္ဍဲအခိၚ်ကာလပၞာန်သီလဝ်အဝဵုဏံ အကြာအရာပ်တံ သွံရာန်မံၚ် ဂဥုဲၜူမာဲ ဇၟာပ်ပ်သ္ၚိဒှ်ကၠုၚ်ဂှ်ဆဵုလဝ်တုဲ ကောန်ၚာ်အယုက်ဟွံပေၚ်တံ စကာမံၚ် မံက်က်ထေၚ်ၚ်လဵုလဵု ဂွံဆဵုညာတ်လဝ်ရဂှ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။

“လၟုဟ် ပ္ဍဲအရာပ်ပိုဲ ပ္ဍဲဂၠံၚ် ဇၟာပ်ပ်သ္ၚိ သွံမံၚ်ဂဥုဲ WY တံ၊ ကမၠတ်တံ ဟဂိတ်တံ ကောန်ၚာ် ၁၃ သၞာံ ၁၀ သၞာံတံ ကၠုၚ်ဇြောတ်မံၚ်ဂဥုဲ၊ ဆလဆလ ဂ္ဇအ်မံၚ်လ္တူဂၠံၚ်တုဲ ဍေံတံဇြောတ်ဂဥုဲ ဂံၚ်တိုန်ကွေံကွေံ” သာ်ဝွံသ္ဂးရ။

တုဲပၠန် ရဲသွံရာန်မံၚ်ဂဥုဲၜူမာဲအကြာအရာပ်တံ ဗွဲမဂၠိုၚ်ဂှ် ကဵုလဝ် ၚုဟ်စရိတ်လိုၚ်ကဵု ကောန်ရဲကဝ်မယှေန်ပၞာန်တံကီု ဒှ်မံၚ်ရဲကြပ်ကဵု ကဝ်မယှေန်ပၞာန်တံကီုတုဲ ဂွံတေၚ်စပ်ဂှ် ဒှ်မံၚ်အခက်အခုဲ ကွေံကွေံ ရောၚ် ညးဆက်ဟီုရ။

အကြာသၟတ်ဗၠာဲဍောတ်တ်တံ အတိုၚ်ဏံ စကာသုၚ်စောဲမံၚ် ဂဥုဲၜူမာဲဂှ် ပရေၚ်ကၠတ်ဂၠံက်ပၠံၚ်ၜး၊ ဂစိုတ်မၞိဟ်တံ ဒှ်တိုန်တုဲ ရဲစိုတ်ဖံက်ပၠန်လေဝ်ဒှ်ဂၠိုၚ်တိုန် ပရေၚ်ဇီုကပိုက်ဒှ်မံၚ်ရောၚ် ညးဒေသတံ ဟီုရ။

မွဲလပါ်ဂှ် ဂကောံရပ်လွဟ်ကောန်ဍုၚ်အရၚ် EAO တံ နူစတန်တဴကၠုၚ်လဝ်ဂှ် နကဵုပရေၚ်ပိုန်ဒြပ် ကၠောန်လဝ် ပရေၚ်ဂဥုဲၜူမာဲတုဲ လၟုဟ်လေဝ် ဆက်ကၠောန်မံၚ်ဖိုအ်ရောၚ် ညးအခေါၚ်ဟီုဂးနွံ ကဝ်မယှေန်ပၞာန်ဗမာ သ္ကိုပ်ပၞာန်ဇြဝ်မေန်ထောန် ဟီုဂးလဝ်ပေါဲသောၚ်ကလးလိက်ပရိုၚ် စပ်ကဵုပရေၚ်ဂဥုဲၜူမာဲ အလန်ဒုတိယ ဂျာန်နဝါရဳ ၂၄ ဂှ်ရ။

ရံၚ်အာအကာဲအရာဗလးတိမ္ဂး ရဲသွံရာန်မံၚ်ဂဥုဲၜူမာဲတံဂှ် ရဲကြပ်မံၚ်ကဵုကဝ်မယှေန်ပၞာန်ကေုာံ ဒှ်မံၚ်ကဝ်မယှေန်ပၞာန်တံတုဲ ညးဒေသဗွဲမဂၠိုၚ်တံဂှ် ဟွံဂံၚ်အာတေၚ်စိုပ်ကီု အာတေၚ်စိုပ်မ္ဂး ဂွံဖေက် ဒှ်အန္တရာဲလမျီုညးတံတုဲ ညံၚ်ကလော်သ္ပဟွံတီ မံၚ်အာဒၟံၚ်အတိုၚ်ဏံ ဂွံတီရ။

ပြဟ်ဟ်ဏံ အကြာသၟတ်ဒေသတံမ္ဂး ဂဥုဲမ WY၊ ဘင်၊ တၞးၜါဲကရဓံၚ်တံကီု ဂဥုဲၜူမာဲစကာသုၚ်စောဲမံၚ်အကြာ ကလာတ်ပ်/ ဗါ (Class/Bar) တံကီု ဂၠိုၚ်တိုန်မံၚ်ကီုလေဝ် ပရေၚ်ကေတ်အရေဝ် ချိုတ်တ်ပၠိုတ်တ် ရေၚ်တၠုၚ်ကၠောန်လဝ်ဟၟဲပုဟ် ဂွံတီရ။

ပရိုၚ်-သြၚ်လောန်တိုၚ်မ်

Photo – AFP

Leave a Reply

Your email address will not be published. Required fields are marked *