ဗြဝတဳ၊ ဂျာန်နဝါရဳ ၃၀
သွက်ဂွံပြေၚ်ဇန်လဝေၚ်ပၞာန် ပ္ဍဲကဵုတွဵုရးကရေၚ်ဂှ် ဒပ်ကဝ်မယှေန်ပၞာန် ထပ်ဗပေၚ်လဝ် ကွဳစက်ခြပ်၊ လွဟ်မကမ် ပေၚ်ၚ်၊ ဇြဟတ်ကောန်ပၞာန်ဗွဲမဂၠိုၚ်ရောၚ် တမ်ရိုဟ်ကၞက်ပရိုၚ် ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ်ဂျာန်နဝါရဳ ၂၈ ဂှ် ကွဳစက်ခြပ် သီုကဵုလွဟ်ဇၞော်နာနာ သွက်လဝေၚ်ပၞာန် တွဵုရးကရေၚ် နူကဵုဒပ်ကဝ်မယှေန်ပၞာန် ကၠုၚ်ထပ်ဗပေၚ်လဝ် ဇြဟတ်ကောန်ပၞာန်ဗွဲမဂၠိုၚ် မဒှ်ရ။
ကွဳစက်ပၞာန်ရေၚ်တိုန်ကၠုၚ်ဗွဲမဂၠိုၚ်ဂှ် ပ္ဍဲဂျာန်နဝါရဳ ၂၉ စိုပ်ကၠုၚ် အပ္ဍဲပွိုၚ်ဍုၚ်ဖာအၚ်တုဲ သွက်ဂွံဆက်တိုန်အာ လပါ်ပွိုၚ်ဍုၚ်ဗြဝတဳ၊ လိုၚ်ဗၠဲတံရောၚ် ဂွံတီရ။
ပြဟ်ဟ်ဏံ ဒပ်ကဝ်မယှေန်ပၞာန်တံ ဒပ်မံၚ်ပေါဲဗတိုက်ကဵု ဂကောံဇြဟတ်ပၠန်ဂတး KNLA က္ဍိုက်က္ဍိုပ်သၟးဟွံက သွက်ဂွံရပ်စပ်အာ လ္တူဒပ် KNA နွံမံၚ်တုဲ ထပ်ထပေၚ်လဝ်ဇြဟတ် ပၞာန်ဒှ်မာန်ရောၚ် ပရေၚ်သ္ၚဳဂၠိပ်တံလေဝ်နွံရ။
စနူကဵုဂျာန်နဝါရဳ ၁ တေံ နူကဵုဒပ်မၚ်ပယျဵုကရေၚ် BGF တံ ပြံၚ်သၠာဲဏာ ဒပ်ပၞာန်ကောန်ဂကူကရေၚ် KNA ဂှ် အကြာဒပ်ကဝ်မယှေန်ပၞာန်ကဵု KNA တံ အကာဲအရာကြံၚ်မ္ၚိုဟ် ဒှ်မံၚ်ဟွံက ညံၚ်ဂွံတိတ်အာ နူဍုၚ်ဗြဝတဳဂှ် ကဝ်မယှေန်ပၞာန် ကဵုလဝ်သတိနွံရ။
တုဲပၠန် သၞေဟ်ကၚ် KNA လ္ၚဵုတံလေဝ် ၜၚ်ကျာဒပ်ကဝ်မယှေန်ပၞာန် ဗတိုက်လဝ်တုဲ ဂိက်သၞေဟ်ကၚ် KNA ဒၞာဲပယျဵု ပွိုၚ်ဍုၚ်ဖာအၚ်ကဵု လိုၚ်ဗၠဲဆက်စပ် နွံမံၚ်လ္တူဂၠံၚ်ဗၞိက် ဒေသပယျဵုသေံတေံ ညၚ်ဂွံမာတ်ထောံ ကဝ်မယှေန်ပၞာန် ကဵုလဝ်ဇြဟတ်ဟရိုဟ်ရ။
တုဲကၠုၚ်ဂျာန်နဝါရဳ ၂၈ တေံပၠန် ပ္ဍဲဒေသဖလူ ပွိုၚ်ဍုၚ်ဗြဝတဳဂှ် အကြာဒပ်ကဝ်မယှေန်ပၞာန်ကဵု ဂကောံမဟာမိတ်ဒပ်ပံၚ်တောဲတံ ပေါဲဗတိုက်သ္ကာတ်မြဟ် ၜိုတ်ပွိုၚ်မွဲတ္ၚဲဒှ်လဝ်ဂှ် နူကဵုၜၚ်ကျာ ဒပ်ကဝ်မယှေန်ပၞာန် ကၠုၚ်ကြဳဖျေံလဝ်ဗုမ် ၄ မနွံရဂှ် ဂွံတီနူကဵု တမ်ရိုဟ်ပရိုၚ် ညးဒေသတံရ။
ပရိုၚ်-သြၚ်လောန်တိုင်မ်
Photo – CJ