သဓီု၊ ဂျာန်နဝါရဳ ၃၀
တွဵုရးမန် ပွိုၚ်ဍုၚ်သဓီု ပ္ဍဲကဵုဍုၚ်သုဝဏ္ဏဝတဳ သၟတ်ရဲကၠောန်ကၠအ် ရာဘာ ပိတၠ ဍိုက်ဒးအာကွဳလိုန်မွဲမဂှ် ဒးဒုၚ်အာတ်သြန် ညးမွဲကၠံကၠံကိုတ် နွံကၠုၚ်လဝ်ရဂှ် ဂွံတီနူကဵု မိမကောဒေံညးတံရ။
တုဲကၠုၚ်ဂျာန်နဝါရဳ ၂၆ အခိၚ်သဝ်တ္ၚဲ သၟတ်ပိတၠစဴကၠုၚ် နူကဵုကၠအ် ရာဘာ အတိုၚ်ဂၠံၚ်ကွဳစက် မတ်မလီု-လ္ဂုၚ် ပ္ဍဲကဵုဂိက်သၞေဟ်ကၚ် လုပ်ဍုၚ်သုဝဏ္ဏဝတဳဂှ် နူကဵုဒပ်ကဝ်ပၞာန်တံကဵု ဗၠာဲသၟိၚ်တံ ရပ်လဝ်ရ။
သၟတ်အယုက်အဝဲ ၂၀ သၞာံ မာံမိုဝ်ဝေန်အံၚ်၊ မာံနေလေၚ်အံၚ်ကဵု မာံပျေအ်ဇြုၚ်အံၚ်တံ ညးပိမဒှ်ရ။
ဟိုတ်နူ ဖံက်ပကဝ်စေဝ်ပၞောန်အမိၚ် ညးတြုံပိတၠ ဍိုက်မွဲ ကွဳလိုန်ဓါတ်ဟွံဂွံဂှ် စောဲစပ်ရပ်ထိၚ်စွံလဝ် ပ္ဍဲကဵုရုၚ်ဗၠာဲသၟိၚ်ဍုၚ်သဓီုရ။
တုဲပၠန် သၟတ်တံဏံ ယဝ်ဟွံမိက်ကဵုပလံၚ်ဒၞာဲယိုက်ဝန်ပၞာန်တေံမ္ဂး ညးမွဲတၠ သြန်ကၠံကၠံကိုတ်ဒကေဝ် ညံၚ်ဂွံပလံၚ်နၚ်ကဵု ညးတာလျိုၚ် ဒပ်ကဝ်မယှေန်ပၞာန်၊ ဒပ်ဗၠာဲသၟိၚ်ကဵု ရုၚ်ဌာနသ္ကိုပ်အုပ်ဓုပ်တံညိဂှ် ဘပဠအာတ်မိက်သြန် သ္ဂးရ။
ဟိုတ်နူဒးဒုၚ်ဘပဠ ကရေပ်ဓရတ်ဂှ်ရ မိမ မာံနေလေၚ်အံၚ်ကဵု မာံပျေအ်ဇြုၚ်အံၚ်တံ ကဵုသြန်သွက်မၞိဟ်မွဲ ၇၀ ကိုအ်တုဲ နုက်ကေတ်ဏာလဝ် ဂွံတီရ။
ဆဂး မာံမိုဝ်ဝေန်အံၚ်ဂှ် အမေဍေံဒှ်မံၚ်ဗြဴကၟာဲတုဲ နုက်ကဵုသြန် ဟွံမာန်တုဲ ချုက်စွံလဝ်ပ္ဍဲကဵု ဒၞာဲပကောံလဝ်ရဲပဝ်တာ သွက်ဂွံပလံၚ် ဘာယိုက်ဝန်ပၞာန် ပ္ဍဲဍုၚ်သဓီုဏီရဂှ် ဂၠိုက်ဂၠာဲဂွံတီရ။
မိ မာံမိုဝ်ဝေန်အံၚ်ဂှ် ပတိုန်လိက်ပရေၚ်ဓရ်ဆာန်ဍူ ကုဇရေၚ် ဌာနရုၚ်အုပ်ဓုပ်ပွိုၚ်ဍုၚ်သဓီုကီုလေဝ် ကဵုသြန်ဟွံမာန်မ္ဂး ဟွံကလေၚ်ဗလးကဵုတုဲ ခက်မံၚ်ဖိုအ်ဏောၚ် သ္ဂးရ။
ပ္ဍဲတွဵုရးမန် သွက်ဂွံပံက်ဘာတန်ဗတောန်ယိုက်ဝန်ပၞာန် လၟေၚ်ဂိတုမာန်ဂှ် ရပ်ကေတ်မံၚ်သၟတ်တံ နကဵုနဲကဲနာနာတုဲ ပကောံကေတ်မံၚ် ကောန်ပၞာန်တံဂှ် ဆက်ကၠောန်မံၚ် မဒှ်ရ။
ပရိုၚ်-သြၚ်လောန်တိုင်မ်
Photo – CJ