မတ်မလီု ၊ ဂျာန်နဝါရဳ ၃၀
အနှေန်ထဝ်ဂၠးကဝ် ၜက်တိုန်အာမံၚ် နူသၞောတ်ထ္ၜတ် ဒှ်ကၠုၚ်လဝ် ဆက်က်တုဲ အနှေန်ထဝ်ၚုဟ်မဳလေၚ် အပ္ဍဲဍုၚ် လျိုၚ်မွဲဒကေဝ်ဂှ် စိုပ်ကၠုၚ်ဗ္ဒာဲ ၁၂၀ ကိုတ်ရဂှ် ညးတၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျာန်နဝါရဳ သတ္တဟပထမဂှ် ထဝ်လျိုၚ်မွဲဒကေဝ် ၉၀ ပြၚ်ညိရ နွံကီုလေဝ် ပ္ဍဲကၞောတ်ဂိတုဂျာန်နဝါရဳဏံ အနှေန်ထဝ်ပ္ဍဲဍုၚ် ဆက်တိုန်စိုပ်ကၠုၚ် ကရပ် ၁၂၀ ကိုတ်ရ။
အနှေန်ထဝ်ဂၠးကဝ်ပၠန် လျိုၚ်ထဝ်မွဲအံၚ်သ ပွဳပွူ ၄၃၀၀ ဒဝ်ဠာဂှ် တိုန်အာ ၅၆၀၀ ဒဝ်ဠာပြၚ်တုဲ ပ္ဍဲဂၠးကဝ်ဂှ် အလန်ကၠာအိုတ် သၞောတ်ထ္ၜတ်ထဝ် ၚုဟ်မးသၠုၚ်တိုန်အာ မဒှ်ရ။
ဟိုတ်နူအကာဲအရာ ပရေၚ်ဍုၚ်ကွာန်ဂၠးကဝ်ဂှ် အနှေန်ထဝ်အပ္ဍဲဍုၚ် တိုန်စိုပ်အာဟွံတန်ကဵုအဆ ၜက်အာနူကဵုသၞောတ်ထ္ၜတ် သၠုၚ်တိုန်မံၚ်ယျဂှ် ညးတၠကံကမၠောန်ဆေၚ်ထဝ်မွဲ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ၚုဟ်ထဝ်ကၠာတေံတိုန်ဂှ် ဟိုတ်နူအကာဲအရာပရေၚ်ဍုၚ်ကွာန်ဗမာ ဟွံညိၚ်တုဲဒှ်အာ။ လၟုဟ်ဂှ် ဟိုတ်နူၚုဟ်ဒဝ်ဠာတံ အကာဲအရာပရေၚ်ဍုၚ်ကွာန်ဍုၚ်ဗမာဟွံသေၚ်၊ ဟိုတ်နူအကာဲအရာပရေၚ်ဍုၚ်ကွာန်ဂၠးကဝ်တုဲ အနှေန်ထဝ်ဂၠးကဝ်တိုန်အာလဝ်ဏောၚ်ဒှ်မံၚ်” သာ်ဝွံသ္ဂးရ။
တုဲပၠန် အကာဲအရာပရေၚ်ဍုၚ်ကွာန်ဂၠးကဝ် ကြံၚ်မ္ၚိုဟ်တေၚ်မံၚ်ဂှ် အကာဲအရာၚုဟ်ထဝ်ဂၠးကဝ်လေဝ် ဆက်ဂွံထပ်တိုန်အာနွံမံၚ်တုဲ ယဝ်ရၚုဟ်ထဝ်ဂၠးကဝ်ထပ်တိုန်မ္ဂး အနှန်ထဝ်ပ္ဍဲဍုၚ်လေဝ် ၜက်နူသၞောတ်တုဲ ၜက်နူသၞောတ်ပၠန် သွက်ဂွံဆက်တိုန်အာနွံမံၚ် ညးဆက်ဟီုရ။
ပ္ဍဲကဵုဗွဝ်ဖျာအပ္ဍဲဍုၚ်ပၠန် အနှေန်ထဝ်ဟွံညိၚ်ဂှ်ကီု ဆက်တိုန်အာမံၚ် ၜက်နူသၞောတ်တုဲ ရဲရာန်ထဝ်ကီု ရဲသွံထဝ်တံကီု ဒေါအ်ဇူလဝ် ပရေၚ်သွံရာန်ထဝ် မွဲအံၚ်ကၠာဏီရောၚ် ဂွံတီရ။
အနှေန်ၚုဟ်ထဝ်ဂၠးကဝ်ဂှ် ဟိုတ်နူအကာဲအရာပၞာန် အမေရိကာန်-အဳရာန်၊ ပရေၚ်တ္ကအ်ဂရေၚ်လာန်တုဲ အကြာအမေရိကာန်ကဵု ဂကောံနေတိုဝ်တံ အကာဲအရာတေၚ်တိုန်မံၚ်ကီု၊ ပရေၚ်ဘဏ္ဍာ ဂၠးကဝ်ကီု ဟိုတ်နူကဵုပရေၚ်ဍုၚ်ကွာန်ဂၠးကဝ် ဟွံချိုတ်ပၠိုတ်ကၠးမး ကွေံကွေံတုဲ ၚုဟ်ထဝ်တိုန်စိုပ်ၜက်အာနူသၞောတ် လုပ်အာဝၚ်မဒှ်ရ။
ပရိုၚ်-သြၚ်လောန်တိုင်မ်
Photo – Social Media