ပေါဲရုဲမာဲၜက်တုဲ ဂကောံသီုဖအိုတ်သွက်ဂွံဆဵုဂဗဂှ် ဒှ်အဓိက ရဲဒေါအ်ပန်ပှော် ၇ ဂကောံဟီု

မတ်မလီု ၊ ဂျာန်နဝါရဳ ၃၀

ပ္ဍဲဍုၚ်ဗမာ သွက်သ္ဂောံဂွံပရေၚ်ၜိုဟ်လလမ်ကဵု ညံၚ်ဂွံယှအ်ဖျေံ ဖအိုတ်ကၠေံအာပဋိပက္ခတံမာန်ဂှ် လိက်ကသုက် NCA ဂှ် ဒဵုကဵုတ္ၚဲဏံ လုပ်မံၚ်အဝေါၚ်ဏီ ကဝ်မယှေန်ပၞာန်ဟီုမံၚ်ကီုလေဝ် ပ္ဍဲအခိၚ် ပေါဲရုဲမာဲလောန်ဏံ ဂကောံသီုဖအိုတ်တံ ဂွံဆဵုဂဗအာဂှ် ဒှ်အဓိကရောၚ် ရဲဒေါအ်လဝ်ပန်ပှော် ၇ ဂကောံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ဟိုတ်နူဒပ်ပၞာန်သီအဝဵုဂှ် လၟေၚ်ကမၠောန်ထမံက်ရုပ်ရဴ လိက်ကသုက် NCA စပ်ကဵုပရေၚ်ဒေါအ်ပန်ပှော်အလုံဍုၚ် နူလက်ထက်အလဵုအသဳ သမ္မတဥူတိၚ်သိၚ် စထမံက်ကၠုၚ်လဝ်တေံ ဒေါအ်ဒေင်အာ ဒဵုကဵုတ္ၚဲဏံရ။

လိက်ကသုက်တၚ်တုပ်စိုတ် NCA ဂွံလဝ်ပရေၚ်အံၚ်ဇၞးနွံ သွက်လၟေၚ်ကမၠောန်ပရေၚ်ၜိုဟ်လလမ် ညံၚ်ဂွံတဴတက်အာဂှ် ဒဵုအခိၚ်တ္ၚဲဏံ စိုပ်မံၚ်တရဲဏီတုဲ အတိုၚ်တင်တုပ်စိုတ်လိက်ကသုက် NCA ဂှ် ဒးဆက်ထမံက်အာရုပ်ရဴ နတဲပၠန်ရောၚ် ကဝ်မယှေန်ပၞာန် ဟီုပတိတ် အကြာတ္ၚဲဏံရ။

အတိုၚ်ဂၠံၚ်တရဴ NCA ဒှ်ဒှ် ဂၠံၚ်တၟိခိုဟ်နူဏံမွဲဒှ်ဒှ် လ္တူတၠုၚ်လအာ ပရေၚ်ဍုၚ်ကွာန် ဗွဲကြဴ ၂၀၂၁ ဒှ်ကၠုၚ်လဝ်တံဂှ် ဗွဲမသၠဲလးဇြိုဟ်နက် သွက်ဂွံဆဵုဂဗသဳကၠဳအာ ညးအခေါၚ်ဟီုဂးနွံ မဟာမိတ်ဒေါအ်ပန်ပှော် ၇ ဂကောံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။

“အတိုၚ်ဂၠံၚ်တရဴ NCA လေဝ်ဒှ်မာန်။ ဆဂး သွက်ဂွံသောၚ်ကလးပြဿနာဍုၚ်ဏံ နွံပၟိက်မံၚ်ကဵုပရေၚ်ဆဵုဂဗသဳကၠဳတံဂှ် အတိုၚ်ဂၠံၚ် NCA လေဝ်ဒှ်မာန်။ ဟွံသေၚ်မ္ဂး ခိုဟ်နူ NCA တုဲ ဂၠံၚ်တၟိမွဲလေဝ်ဒှ်မာန်။ ပ္ဍဲအဝေါၚ်ပဋိပက္ခဏံ ညးပါလုပ်မံၚ်သီဖအိုတ်တံ သွက်ဂွံဆဵုဂဗသဳကၠဳအာ ဒှ်အဓိက အဲခယျ” သာ်ဝွံသ္ဂးရ။

ဟိုတ်ဂှ်ရ ပ္ဍဲကဵုအလဵုအသဳတၟိကဵု စၠတ်ဓဝ်တၟိ မံက်တိုန်မ္ဂး သွက်ပရေၚ်ၜိုဟ်လလမ်အနာဂတ် အတိုၚ်မဟာမိတ်ဒေါအ်ပန်ပှော် ၇ ဂကောံ ပတိုန်ထ္ၜးဖျေံလဝ်သ္ဂုတ်သွာတ်တံဂှ် စၟဳစလဝ်ရောၚ် ဟီုရ။

နူကဵုဂိတုအေဗရာ သၞာံအာတေံဂှ် နူကဵုမဟာမိတ်ဒေါအ်ပန်ပှော် ၇ ဂကောံတံ ကၠောန်လဝ်ကောံဓရီုအန်လိုၚ်ဂှ် ဖျေံလဝ်အစဳဇန် ကာလအပြံၚ်သၠာဲ ၅ တၚ်နွံမံၚ်ရ။

ပ္ဍဲအစဳဇန်ဏံ ညးဆေၚ်စပ်ဂကောံသီုဖအိုတ်တံ မုလေဝ်ဟွံခုတ်စၟတ် ဒစးဒုၚ်မွဲသာ် ညံၚ်ဂွံလလောၚ်တြးအာ ပရေၚ်ဒေါအ်ပန်ပှော် အလုံဍုၚ်မာန်ဂှ် ဂစာန်ကၠောန်အာကၠာတုဲ နူကဵုပလက်ဖံၚ် နဲကဲ ပရေၚ်ဍုၚ်ကွာန် သောၚ်ကလးအာပဋိပက္ခရပ်လွဟ်ဂှ် ညးဆေင်စပ်သီုဖအိုတ်တံ ပါလုပ်သဳကၠဳတုဲ ညံၚ်ဂွံကေတ်အာ တၚ်တုပ်စိုတ်ပရေၚ်ဍုၚ်ကွာန်တံရ။

တုဲပၠန် သွက်ဂွံဒက်ပတန် အလဵုအသဳကာလအပြံၚ်သၠာဲ ဖိတ်ဒရေဝ်ဒဳမဝ်ကရေသဳ၊ သွက်ဂွံချူခၞံအာ သ္ဇိုၚ်သၞောဝ်ဖိတ်ဒရေဝ် ဒဳမဝ်ကရေသဳ ပတဝ်လဝ်ပရေၚ်ၜိုဟ်လလမ်ကဵု ပရေၚ်ညိၚ်ဝပ်တံ၊ အတိုၚ်သ္ဇိုၚ်သၞောဝ်ချူခၞံလဝ်ဂှ် သွက်ဂွံကၠောန်အာပေါဲရုဲမာဲ မဒှ်ရ။

တၚ်နၚ်ဂလာန်အတိုၚ်ဗီုပြၚ်ဏံဂှ် အလဵုအသဳဒပ်ပၞာန်ကီု ကောန်ဍုၚ်အရၚ်ရပ်လွဟ်တံကီု ဂကောံဆေင်စပ်သီုဖအိုတ်တံ ညံၚ်ဂွံပါလုပ်ရေၚ်တၠုၚ်အာ ချပ်ကၠောန်အာရောၚ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။

ဟိုတ်ဂှ်ရ ပေါဲရုဲမာဲဏံတုဲ တၠုၚ်လအာပရေၚ်ဍုၚ်ကွာန်ဍုၚ်ဗမာ ဒှ်မာန်တံဂှ် နကဵုနဲဆဵုဂဗသဳကၠဳ ညံၚ်ဂွံဂၠာဲအာသွဟ်မာန် အကြာဂကောံမဟာမိတ်ညးတံ သဳကၠဳလဝ် ညးဆက်ဟီုရ။

“သွက်ဍုၚ်ပိုဲ အရာနွံမံၚ်ပၟိက်ဍာံဍာံ ယေန်သၞၚ်ဂၠာဲသွဟ်ပရေၚ်ဍုၚ်ကွာန် နကဵုနဲကဲဆဵုဂဗသဳကၠဳအာ ညံၚ်ကလေၚ်ဂွံဒှ်မာန် ၜိုတ်လဵုပိုဲပတိတ်အစောန်မာန်ရော။ တုဲပၠန် စနူကဵု Entry Points လဵု ရေၚ်တၠုၚ်အာမာန်ရော အကာဲအရာဗီုပြၚ်နာနာတံဂှ် 7 EAO Alliance သ္ၚဳဂၠိပ်တုဲ တၠုၚ်လအာဗီုပြၚ်လဵုဒှ်ကၠုၚ်မာန် ဂွံပညဳကၠောန်အာမာန် ကောံဓရီုပိုဲ ကၠောန်လဝ်သွက်ဂွံပလေဝ်ပလေတ်စလဝ် အရာတံဏံရ” သာ်ဝွံ သ္ဂးရ။

ပ္ဍဲဂျာန်နဝါရဳ ၂၈ ကောံဓရီု မဟာမိတ်ဒေါအ်ပန်ပှော် ၇ ဂကောံဂှ် တၠုၚ်လအာအကာဲအရာပရေၚ်ဍုၚ်ကွာန် ပရေၚ်ပၞာန်လၟုဟ်ကီု ပေါဲရုဲမာဲလောန်တုဲ အကာဲအရာဒှ်ကၠုၚ်မာန်ဂှ် ချပ်သဳကၠဳလဝ်ရ။

တုဲပၠန် တင်စၞောန် ဆေင်စပ်ကဵုကာလပြံၚ်သၠာဲ အကြာကၟိန်ဍုၚ် ဖိတ်ဒရေဝ်ဒဳမဝ်ကရေသဳတံကီု ကလေၚ်သ္ၚဳဂၠိပ် စပ်ကဵုမဟာဗျူဟာ ကေုာံ တင်စၞောန်ပရေၚ်သ္ၚဳဂၠိပ် လၟေၚ်ကမၠောန်ပရေၚ်ဍုၚ်ကွာန်တံဂှ် ဖျေံကၠုၚ်မာန်ရောၚ် လလောၚ်တြးလဝ်ရ။

မွဲလပါ်ပၠန် သွက်ဂွံပလေဝ်အာသ္ဇိုၚ်သၞောဝ် ၂၀၀၈ မာန် ဂွံလဝ်တၚ်တုပ်စိုတ် နူကဵုဆဵုဂဗသဳကၠဳလဝ် ၄၃ တၚ်တံဂှ် သဳကၠဳအာ ပ္ဍဲစၠတ်ဓဝ်မံက်တၟိဏံတုဲ အတိုၚ်ဥပဒေ ဆက်ကၠောန်အာရောၚ် ကဝ်မယှေန်ပၞာန် ဟီုလဝ်ရ။

တင်နၚ်တံဏံဝွံ ပ္ဍဲအခိၚ်ပၞာန်သီလဝ်အဝဵုဂှ် ကမ္မတဳကလေၚ် ပညဳပညပ် NSPNC ဒပ်ပၞာန်၊ ဂကောံထပက် NCA ၇ ဂကောံ၊ ဂကောံဟွံဂွံထပက်လဝ် NCA ၃ ဂကောံတံ သဳကၠဳကၠုၚ်လဝ် အလန်ကဵုအလန်တုဲ ဂွံလဝ်တင်တုပ်စိုတ်တံဏံ မဒှ်ရ။

မဟာမိတ်ဒေါအ်ပန်ပှော် ၇ ဂကောံဂှ် ဂကောံသေံ RCSS, ဗော်ဍုၚ်မန်တၟိ၊ ဒပ်ရခေင် ALP၊ ဒပ်ကရေၚ် DKBA၊ ဒပ်ကရေၚ် KNU/KNLA-PC၊ ဒပ်လာဟူ LDU ဒပ် PNLO-NCA/S သ္ကိုပ်ဗိုလ်ဇၞော် ခေါန်ဥက္ကာတံ ပါလုပ်ရ။

ပရိုၚ်-သြၚ်လောန်တိုင်မ်

Photo – MOI