ၜဳကလေၚ်၊ ဂျာန်နဝါရဳ ၃၁
တွဵုရးမန် ပွိုၚ်ဍုၚ်ၜဳကလေၚ် ပ္ဍဲဘာဗတောန်လိက်ကွာန်ဖိုဝ်ဝတိၚ်ဂှ် နူကဵုဒရုၚ်ဒပ်ကဝ်မယှေန်ပၞာန် ကၠုၚ်ကြဳဖျေံဗုမ်တုဲ စမြိုၚ်ဒၞာဲဘာဗတောန်လိက်တံ လီုလာ်အာလဝ်နွံမံၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် ဖျေံလဝ်ဒပ် ပ္ဍဲကဵုဂိက်သၞေဟ်ကၚ်ဒဒန်ပသဲ ပွိုၚ်ဍုၚ်ၜဳကလေၚ်ဂှ် ကၠုၚ်ဖျေံလဝ်ဗုမ်ပိမ နကဵုဒရုၚ် ပ္ဍဲဂျာန်နဝါရဳ ၂၉ အခိၚ်နူဂယး ၜိုတ်၁၁ နာဍဳရ။
ဟိုတ်နူဒးဗုမ်ဂှ် စမြိုၚ်ဒၞာဲဗတောန်လိက် ၂ မ လီုလာ်အာတုဲ မဗုမ်ဟွံဖတိုဟ်ဏီမွဲမဂှ်ပၠန် သှ်ေမံၚ်ပ္ဍဲကဵုဒၞာဲစမြိုၚ်ဘာမွဲမ သ္ဂးရ။
အတိုၚ်ညးဍုၚ်ကွာန်တံဟီုလဝ်မ္ဂး အပ္ဍဲကဵုကွာန်ဏံ ဒပ်ညးဍုၚ်ကွာန်စဵုဒၞာ PDF တံ နွံမာန်မံၚ်ခယျကေတ်တုဲ ကၠုၚ်ကြဳဖျေံဗုမ်နကဵုဒရုၚ် ဒှ်မာန်ရောၚ် ဂွံတီရ။
ပ္ဍဲကဵုဂအုံကွာန်ဖိုဝ်ဝတိၚ် လၟိဟ်သ္ၚိနွံ ၅၀၀ ပြင်ဏံ ဒပ်ကဝ်မယှေန်ပၞာန် ဟိုတ်နူပန်မံၚ်ကဵုလွဟ်ဇၞော်ကဵုဒရုၚ်တံ မွဲဏှမွဲဏှဂှ် အတိုၚ်မွဲကွာန်ထောံလဝ်သ္ၚိဌာန် ဂြိပ်ပါဲအာမံၚ်အိုတ်ရ။
ကွာန်ဖိုဝ်ဝတိၚ် ဒပ်ကဝ်မယှေန်ပၞာန်ကြဳလဝ်ဗုမ်ဂှ် ဒှ်မံၚ်ဒၞာဲသၟဝ်တဲပရေၚ်အုပ်ဓုပ် ဗော်သွးကောန်ဂကူကရေၚ် KNU မဟာဒပ် (၁) ခရိုၚ်သဓီု မဒှ်ရ။
တုဲကၠုၚ်ဂျာန်နဝါရဳ ၂၆ ဂှ်လေဝ် ပ္ဍဲကဵုကွာန်အလူကျဳ ပွိုၚ်ဍုၚ်ၜဳကလေၚ်ဂှ် ဟိုတ်နူဒပ်ကဝ်မယှေန်ပၞာန် ပန်လဝ်ကဵုလွဟ်ဇၞော်တုဲ ကောန်စဴကဵုအမေနော်ၜါတၠချိုတ်အာ၊ ညးဗြဴမွဲတၠ ဒးလဝ်ဝပ်နွံ နူကဵု KNU ခရိုၚ်သဓီု လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media