မတ်မလီု၊ ဂျာန်နဝါရဳ ၃၁
ပ္ဍဲကဵုတိဍာ်ကဝ်တူလေဝ် ဗော်သွးကောန်ဂကူကရေၚ် KNU ပေါဲဗတိုက်ဒှ်လဝ် ပ္ဍဲကဵုပွိုၚ်မွဲသၞာံတုဲကၠုၚ်ဏံ ကောန်ဒပ်ကဝ်မယှေန်ပၞာန်ကြပ် ၂၀၀၀ ချိုတ်လဝ် နူကဵုဗဟဵု KNU လလောၚ်ပတိတ်လဝ် ပ္ဍဲဂျာန်နဝါရဳ ၃၀ ရ။
ပ္ဍဲကဵုသၞာံတုဲကၠုၚ် ၂၀၂၅ ပွိုၚ်မွဲသၞာံဂှ် အကြာဒပ်ကဝ်မယှေန်ပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞာကောန်ဂကူကရေၚ် KNDO အာလဝ်က္ဍိုပ် ဂကောံပၠန်ဂတးတံပေါဲဗတိုက်ဒှ်လဝ် ၂၃၀၀ ဝါပြၚ်ရ။
ပ္ဍဲကဵုအကြာပေါဲဗတိုက်တံဏံ နူလပါ်ကဝ်မယှေန်ပၞာန် သီုကဵုသ္ကိုပ်တမ်ဒပ် ၂ တၠ ကောန်ပၞာန် ၁၉၇၄ တၠချိုတ်အာ၊ ဒးလဝ်ဝပ် ၁၆၅၅ တၠနွံမံၚ် ပ္ဍဲကဵုလိက်လလောၚ်တြး KNU ချူလဝ်ရ။
တုဲပၠန် ကလေၚ်သီဂွံလဝ် ဗ္ဒိုပ်ဒပ်ကဝ်မယှေန်ပၞာန် ၁၇ ဒၞာဲမဒှ်တုဲ ပလီုလဝ်ကွဳစက်ယာန်ထံက်ပလံၚ် ၄၂ မ၊ ကောန်သ္ဂံၚ်ကၠုၚ်ဖျေံလွဟ် ၂၁၄ တၠနွံမံၚ် ဂွံတီနူကဵုလိက်လလောၚ်တြးရ။
ပ္ဍဲပွိုၚ်မွဲသၞာံဂှ် နူကဵုဒပ်မဟာမိတ်ပၠန်ဂတးပံၚ်တောဲလဝ် KNLA သ္ကိုပ်သ္ကတံ ကောန်သ္ဂံၚ် ၁၀၈ ပြဟ်လလုဲအာ ၃၈၀ တၠ ဒးလဝ်ဝပ်ရ။
အတိုၚ်တင်နၚ် အလဵုအသဳပရေၚ်ညဳသၟဟ်ကောန်ဂကူ NUG မ္ဂး ပ္ဍဲအလုံဍုၚ်မွဲ သၞာံ ၂၀၂၅ ပွိုၚ်မွဲသၞာံဂှ် ပေါဲဗတိုက်အကြာၜါလပါ် ဒှ်လဝ် ၇၀၀၀ ပြၚ်တုဲ နူကဵုလပါ်ဒပ်ပၞာန်ဗမာသီအဝဵု ကောန်ပၞာန် မွဲဠက်ပြၚ် ဇြဟတ်ဆောံလေၚ်အာလဝ် သ္ဂးရ။
ပ္ဍဲကဵုပေါဲဗတိုက်အကြာၜါလပါ်ဏံ လပါ်ဒပ်ကဝ်မယှေန်ပၞာန် ချိုတ်လဝ် ၅၆၉၉ တၠ၊ ဒးဝပ် ၂၇၂၆၊ ရပ်ဂွံဂၠုဲပၞာန် ၁၁၂၄ တံ သီုဖအိုတ် ဇြဟတ် ၉၅၄၉ တၠ ဆောံလေၚ်အာလဝ်နွံ NUG လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media