မတ်မလီု ၊ ဖေဖဝ်ဝါရဳ ၂
ပရေၚ်လဝေၚ်ပၞာန် ဆက်မံၚ်အယုက်ကဵုဒပ်ပၞာန်ဗမာတံ ညံၚ်ဂွံဒေါအ်အာဂှ် စွံပွန်တုဲ ဖျေံဒဏ်ပရေၚ်ကၟာတ်ဆိုအ်ညဳညဳစိုအ် Justic For Myanmar-JFM ဗတိုက်ဖအောဝ်လဝ်ရ။
ပ္ဍဲအခိၚ်လၟုဟ်ဏံ ဒပ်ပၞာန်ဗမာ ကၠောန်ပေါဲရုဲမာဲအလီတုဲ ဂစာန်ဖန်ဗ္ဒျ်မံၚ်ကီုလေဝ် တက်ကေတ်ပေါဲအလီသက်သက်ရဒှ်တုဲ မတ်ညးဍုၚ်ကွာန်ကောန်ဍုၚ်ဗမာတံကီု မတ်အလဵုအသဳဍုၚ်သ္အာၚ်တံကီု ဗဂေတ်ဏာဗီုဏံဟွံဂွံပုဟ်ဂှ် သ္ဂးရ။
ဟိုတ်ဂှ်ရ ဒပ်ပၞာန်ကၠောန်လဝ်ပေါဲရုဲမာဲအလီုကေုာံ သွဟ်ဍေံဂှ် အလဵုအသဳဍုၚ်သ္အာၚ်တံဒးတးပါဲအာတုဲ သွက်ဂွံမာတ်ဆိုအ်အာ ဂၠံၚ်ဍာန်ဘဏ္ဍာသြန်ဒပ်ပၞာန်၊ ကပေါတ်လွဟ်လက်နက်၊ ကပေါတ်ကရိယာနာနာကေုာံ ကၠေၚ်ၜၚ်ကျာတံဂှ် ပညဳပညပ် ပံၚ်တောဲဒးကၠောန်အာရောၚ်။
ကာန်ပနဳတံကီု၊ ရဲဓလိုက်တမ်ရိုဟ်တံ ညံၚ်ဂွံကလေၚ်သီရုပ်ထောံ ပရေၚ်ပိုန်ဒြပ်ဆက်စပ်မံၚ်ကဵု ဒပ်ပၞာန်ကေုာံ ခရိုနဳဍေံတံဂှ်ရောၚ် JFM ထံက်ထ္ၜးရ။
ပရေၚ်လဝေၚ်ပၞာန် ပကီုပရာတ်ဒပ်ပၞာန်ကၠောန်မံၚ်ဏံဂှ် ဂွံလဝ်အထံက်ပၚ် နူကဵုမဟာမိတ် အလဵုအသဳသၠောတ်တၠအဝဵုပၞာန်တံကီု နူကဵုကာန်ပနဳဂၠးကဝ်ဇၞော်ဇၞော်၊ ဗါန်ဂၠးကဝ်၊ သီုကဵု ပရေၚ်အထံက်ပၚ် ခရိုနဳဗမာတံ မဒှ်ရ။
ဂကောံတံဏံဂှ်တှ်ေ ကဵုမံၚ်အထံက်ပၚ်သွက်ဒပ်ပၞာန် မပ္တံ သြန်၊ လွဟ်လက်နက်၊ ကပေါတ်ပၞာန်ကေုာံ ကပေါတ်ပရေၚ်ခန်လ္ၚတ် ကွတ်တံတုဲ လ္တူဏံ ဗၠးၜးတိတ်မံၚ် နူကဵုပရေၚ်ကေတ်အရေဝ် ဂၠးကဝ်ဂှ်တှ်ေ ဒှ်ပွမကဵုမံၚ်ဇြဟတ်ကဵုဒပ်ပၞာန် ညံၚ်ဂွံဖန်ဗ္ဒျ် ပရေၚ်ရာဇဝတ်ပၞာန်တံရောၚ်။
အတိုၚ်ဒပ်ပၞာန်ကၠောန်မံၚ် ပရေၚ်ပကီုပရာတ်ကေုာံ ကၠောန်မံၚ်ပရေၚ်လဝေၚ်ပၞာန်အလုံဍုၚ်မွဲတုဲ ညးဍုၚ်ကွာန်တံ ညံၚ်ဂွံဖေက်လကိုတ်မံၚ်ကီုလေဝ် မွဲလပါ်ဂှ် ဇြဟတ်ညးဍုၚ်ကွာန်ပၠန်ဂတး ဒုၚ်သ္ဇိုၚ်ကဵု ပရေၚ်ဖိတ်ဒရေဝ်ဒဳမဝ်ကရေသဳတံဂှ် အသိၚ်ခိုဟ်မံၚ်ဖိုအ်ရောၚ် JFM သ္ဂးရ။
တုဲပၠန် ပရေၚ်ဒပ်ပၞာန်သီအဝဵု ပေၚ်အာ ၅ သၞာံကီုလေဝ် ညးဍုၚ်ကွာန်ဗမာတံဂှ် အတိုၚ်စိုတ်သတ္တိ ဖျေံလဝ်သ္ဂုတ်သွာတ်ကေုာံ နကဵုပရေၚ်သၠးဖဵုဂုဏ်တံပေၚ်ၚ် ဆက်ဒုၚ်ဒဝ်တဝ်စၞေဟ်မံၚ် မဒှ်ရ။
ပရေၚ်ပၠန်ဂတး ဒုၚ်ဒဝ်တဝ်စၞေဟ် ဂါံလုပ်စိုပ်ကၠုၚ် ၆ သၞာံဏံဂှ် သွက်ဂွံဗတိုက်သၠေက်အာ ဂိုဏ်ရာဇဝတ်ပၞာန်ဏံ ရိုဟ်ကၞက်ဂွံပိုတ်တုဲ ကရောံညးဍုၚ်ကွာန်ဒက်ပတန်အာ သၞောတ်ဖိတ်ဒရေဝ်ဒဳမဝ်ကရေသဳတံဂှ် ဍုၚ်ဂၠးကဝ်ဇၞော်တံ ဒးဘိုၚ်ဒတူလိုၚ်အာရောၚ် JFM ဗတိုက်ဖအောဝ်လဝ်ရ။
ပရိုင်-သြၚ်လောန်တိုၚ်မ်
Photo – RFA