ဖာအၚ်၊ ဖေဖဝ်ဝါရဳ ၂
ဒပ်ပၞာန်သီလဝ်အဝဵုဂှ် အဝဵုဍေံတံဖေက်ကၠေံအာဂှ် ဂွိၚ်မံၚ်အိုတ်စောန် တုဲ ဆန္ဒသွက်ဂွံဒက်ပတန် ကၟိန်ဍုၚ်ဖိတ်ဒရေဝ်ဒဳမဝ်ကရေသဳ ဟၟဲလးလးရောၚ် ဥက္ကဌ KNU ပဒိုသဝ်ကွေဝ်ထူဝေန် ဟီုရ။
ပ္ဍဲကဵုဂလာန်ဟီုလဝ် တ္ၚဲပၠန်ဂတးကောန်ဂကူကရေၚ် မရနုက်ကဵု ၇၇ ဝါ ဂျာန်နဝါရဳ ၃၁ ဂှ် ဥက္ကဌ KNU ပဒိုသဝ်ကွေဝ်ထူဝေန် ဟီုစုတ်လဝ်ရ။
ညံၚ်ဂွံသောၚ်ကလးပြဿနာ ပရေၚ်ဍုၚ်ကွာန်ကီု သွက်ဂွံဒက်ပ္တန်အာကၟိန်ဍုၚ်ဖိတ်ဒရေဝ်ဒဳမိုကရေသဳ ဇေတ်တ်ကီု ဆန္ဒဒပ်ပၞာန်ဗမာတံညိလေဝ်ဟၟဲပုဟ် ပဒိုသဝ်ကွေဝ်ထူဝေန် သ္ဂးရ။
ဗွဲတၟေၚ် စနူသၞာံ ၂၀၂၁ ဂိတုဖေဖဝ်ဝါရဳ ၁ တေံ သီကေတ်လဝ်အဝဵုတုဲ ဗွဲအဓ္ဓမနနဲပကီုပရာတ်ဂှ် ဒပ်ပၞာန်ပလီုထောံ လၟေၚ်ဂၠံၚ်တရဴဒဳမဝ်ကရေသဳတုဲ ဍိုက်ထပၠုပ်လဝ်လမျီုယန္တရာသၞောတ် ပရေၚ်အုပ်ဓုပ် မဒှ်ရ။
ဂကောံပၞာန်ဗမာတံ သွက်ဂွံဒက်ပတန် ကၟိန်ဍုၚ်ဖိတ်ဒရေဝ် ဒဳမိုကရေသဳဂှ် စိုတ်ဆန္ဒ ညိလေဝ်ဟၟဲလးလးဂှ် ထ္ၜးလဝ်ကၠးမးမံၚ်တုဲ သွက်ဍေံတံ ဂွံပၠတရဴအာပရေၚ်ဍုၚ်ကွာန်ဂှ် ကေမ်ဇျှာပ်လဝ်သ္ဇိုၚ်သၞောဝ်ဥပဒေ ၂၀၀၈ ကၟောန်န်ရောၚ် ဥက္ကဌ KNU ပဒိုသဝ်ကွေဝ်ထူဝေန် ဟီုစုတ်လဝ်ရ။
အဝဵုကၟိန်ဍုၚ်ဂှ် ဒပ်ပၞာန်သီကေတ်လဝ် ဗွဲအဓ္ဓမအတေၚ်ကီုလေဝ် ထိၚ်ဒေသဖအိုတ်လေဝ်ဟွံမာန်၊ ဟိုတ်နူညးဍုၚ်ကွာန်ကောန်ဍုၚ်အရၚ် အလုံမွဲဍုၚ်တံ နူကဵုဇၟာပ်ပ်ဒိုဟ်တဝ်စၞေဟ်ဂှ်ရ တိဍာ်ဒပ်ပၞာန်ဗမာတံ ဍုန်ဂြေက်စှ်ေအာ သ္ဂးရ။
တုဲပၠန် ဟိုတ်နူပရေၚ်ဓလီုတမ်ရိုဟ် ပရေၚ်ပိုန်ဒြပ်ဂၠးကဝ်ဒေါအ်အာဂှ် ပရေၚ်ပိုန်ဒြပ်ဍုၚ် ဆုတ်ယောင်စှ်ေအာတုဲ ဟိုတ်နူပဋိပက္ခပေါဲပၞာန်ကေုာံ ပရေၚ်ဖံက်ပကဝ်အခေါၚ်မၞိဟ်တံတုဲ ညးဍုၚ်ကွာန်တံ ထောံသ္ၚိဌာန် ဒးဂြိပ်ပါဲဒဴမံၚ်အပ္ဍဲဍုၚ်ဂှ် လၟိဟ်ပေၚ်စိုပ်အာ ပြကောဋိကိုတ်နွံမံၚ် ပဒိုသဝ်ကွေဝ်ထူဝေန် ဟီုရ။
သွက်အဝဵုဒပ်ပၞာန် ညံၚ်ဂွံတန်ကြန်အာမာန် ဒပ်ကဝ်မယှေန်ပၞာန် စကာပၞာန်ကျာ၊ ၜၚ်ကျာ၊ လွဟ်ဇၞော်ကဆံၚ်သၠုၚ်တံရောၚ် ဥက္ကဌ KNU ပဒိုသဝ်ကွေဝ်ထူဝေန် ဟီုဗပေၚ်စုတ်လဝ်ရ။
ပရိုင်-သြၚ်လောန်တိုၚ်မ်
Photo – KNU