ပလဝ်၊ ဖေဖဝ်ဝါရဳ ၃
ရးတနၚ်သဳ ပွိုၚ်ဍုၚ်ပလဝ် ဟိုတ်နူဒပ်ပၞာန်ဗမာ စံၚ်ပလီုထောံကွာန်ယှာတ်ပုၚ်ဂှ် သ္ၚိ ၄၀ ပြၚ် ပၟတ်တူလီုလာ်အာနွံ ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂျာန်နဝါရဳ ၃၁ အခိၚ်ၜိုတ်ဒေါအ်တ္ၚဲဂှ် ဒပ်ကဝ်မယှေန်ပၞာန် ဇြဟတ်ၜိုတ် ၄၀ တံ လုပ်ကၠုၚ်ကွာန်ယှာတ်ပုၚ်တုဲ စံၚ်ပလီုဏာလဝ် သ္ၚိနွံမံၚ်လဒေါဝ်ကွာန်တံရ။
အတိုၚ်ညးဒေသတံဟီုလဝ်မ္ဂး ဟိုတ်နူဒပ်စဵုဒၞာညးဍုၚ်ကွာန် PDF တံ ကၠုၚ်ဗတိုက်လဝ် ဒၞာဲဗ္ဒိုပ်ဒပ်ပၞာန်ကဝ်မယှေန်ပၞာန်တုဲ ကၠုၚ်စံၚ်ပလီုထောံသ္ၚိပ္ဍဲကွာန်တံဏံ သ္ဂးရ။
ဒပ်ကဝ်မယှေန်ပၞာန်တံ ဖျေံလဝ်ဗ္ဒိုပ် လပါ်အုံဗၟံက်ကွာန်ယှာတ်ပုၚ်တုဲ ဟိုတ်နူဒပ်စဵုဒၞာညးဍုၚ်ကွာန် PDF တံ ကေတ်လဝ်ဒၞာဲ လပါ်ပလိုတ်ကွာန်ဂှ် အကာဲအရာပၞာန်ၜါလပါ်ကြံၚ်မ္ၚိုဟ်မံၚ် သ္ဂးရ။
ပြဟ်ဟ်ဏံ ဟိုတ်နူဒပ်ကဝ်မယှေန်တံ ဖျေံလဝ်ဗ္ဒိုပ်မံၚ်ဒၟံၚ် ပ္ဍဲကွာန်ယှာတ်ပုၚ်ဂှ် ညးဒေသဗွဲမဂၠိုၚ်တံ ပြံၚ်စိုပ်အာ ဒၞာဲကွာန်တၞဟ်ဟ်တံကီု လ္တူဍုၚ်တံရ။
ပ္ဍဲဂျာန်နဝါရဳ ၂၇ ကဵု ၂၈ ဂှ်လေဝ် ပ္ဍဲအရာပ် ၄ ဍုၚ်ပလ ပွိုၚ်ဍုၚ်ပလဝ် ဒပ်ကဝ်မယှေန်ပၞာန် စံၚ်ပလီုထောံ သ္ၚိဌာန်ကောန်ညးဍုၚ်ကွာန် ၁၀၀ မပြၚ်ဂှ် ဂွံတီလဝ်ညးဒေသတံရ။
ပရိုၚ်-သြၚ်လောန်တိုၚ်မ်
Photo – CJ