ၜဳကလေၚ်၊ ဖေဖဝ်ဝါရဳ ၃
တွဵုရးမန် ပွိုၚ်ဍုၚ်ၜဳကလေၚ် ပ္ဍဲဆေင်အရက် ကွာန်ကအ်ဂမာဂှ် ဗၠာဲသၟိၚ်ထိၚ်နေဝ်မွဲတၠ ဒးဒုၚ်ပန်ဂစိုတ်တုဲ ချိုတ်အာလဝ် သာ်ဝွံ ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဖေဖဝ်ဝါရဳ ၁ ၜိုတ်အခိၚ်တ္ၚဲစေၚ် ၂ နာဍဳကလေၚ်ဂှ် ဗၠာဲသၟိၚ်ထိၚ်နေဝ်မွဲတၠ ဒးဒုၚ်ပန်ဂစိုတ်လဝ် နကဵုသေနာတ် ပ္ဍဲကဵုဆေင်အရက် ဒဝ်သဳလေဝ် ကွာန်ကအ်ဂမာ နွံမံၚ်ဇိုၚ်ဒကဲဂၠံၚ်ကွာန်မုဟ်ဒုန်-ၜဳကလေၚ် ရ။
ဟိုတ်နူဒးဒုၚ်ပန်ဂစိုတ်လဝ်ကြပ်ပ်ဂှ်ရ ဗၠာဲသၟိၚ်ထိၚ်နေဝ် ဒုအကြာပ်ဒပ်ဇြဝ်မေန်ထောန် မွဲအလန်ဓဝ်ချိုတ်အာလဝ် ပ္ဍဲကဵုဒၞာဲ ဒှ်လဝ်ဟိုတ်ဂှ်ရ။
ဒုဂအုပ်ဗၠာဲသၟိၚ် ဖုၚ်မျေအ်နိုင် ညးပါကၠုၚ်ကရောံ ဇြဝ်မေန်ထောန်ဂှ် ပ္ဍဲကဵုပရေၚ်ပန်ဂစိုတ်ဏံ ဗၠးအာဘဲလမျီုရဂှ် ညးဒေသတံဟီုတုဲ ဂွံတီရ။
ပရေၚ်ပန်ဂစိုတ်ဏံဒှ်အာတုဲ ရဲဒပ်ကဝ်မယှေန်ပၞာန်ကဵုဒပ်ဗၠာဲသၟိၚ်တံစိုပ်ကၠုၚ်ဂှ် ကော်သၟာန်စၟဳစၟတ်လဝ် ညးဒေသလ္ၚဵုတံနွံမံၚ် ဂွံတီရ။
စပ်ကဵုပရေၚ်ပန်ဂစိုတ်ဏံဂှ် ဂကောံဇြဟတ်ပၠန်ဂတး ဖျေံလဝ်သ္ဇိုၚ် ၜဳကလေၚ်တံမုလဝ်လလောၚ်တြးလဝ်ပရိုၚ် ဟွံဆဵုဏီရ။
ပ္ဍဲကဵုဂျာန်နဝါရဳ ၂ တေံလေဝ် ပ္ဍဲကဵုဒၞာဲဂၠံၚ်ပန်သွာၚ် ကအ်ကတေဝ် ကရပ်ကွာန်မုဟ်ဒဵု ပွိုၚ်ဍုၚ်ၜဳကလေၚ်ဂှ် ကောန်ဒပ်ကံၚ်သဳပရေၚ်ၜိုဟ်လလမ် ကရေၚ် KNU/KNLA PC ဒးဒုၚ်ပန်ဂစိုတ်တုဲ ချိုတ်အာလဝ်ကီုရ။
ပရိုၚ်-သြၚ်လောန်တိုၚ်မ်
Photo – CJ