မတ်မလီု ၊ ဖေဖဝ်ဝါရဳ ၃
ညးဍုၚ်ကွာန်မန် အပ္ဍဲဍုၚ်မ္ၚးဍုၚ်တံ နကဵုစိုတ်ဓါတ်ကတိုၚ်ကၟိုဟ် ၚုဟ်က္တဵုတုဲ ၜိုတ်အစောန်ဇြဟတ်နွံ ညံၚ်ဂွံလုပ်အာပေါဲဗတိုက်အိုတ်ညိဂှ် ဗော်ဍုၚ်မန်တၟိ AD ဗတိုက်ဖအောဝ်ရ။
ဗော်ဍုၚ်မန်တၟိ ဂကောံဗတိုက်သရိုဟ်သၠောတ်တၠအဝဵုပၞာန် NMSP AD ပတိတ်လိက်လလောၚ်တြး တ္ၚဲကောန်ဂကူမန် မရနုက်ကဵု ၇၉ ဝါ ပ္ဍဲဖေဖဝ်ဝါရဳ ၂ ဂှ် ဗတိုက်ဖအောဝ်လဝ် မဒှ်ရ။
ဂကောံသီအဝဵုဍုၚ်တံ သွက်ဂွံဒၞာအာပရေၚ်အမှုရာဇဝတ်ပၞာန်ဍေံတံ ဖန်လဝ်ဂှ်ကီု ညံၚ်ဂွံဆက်ထပၠုပ်အာလမျီု သၞောတ်တၠအဝဵုပၞာန်ဍာ်ဇမၠိၚ် ရန်တၟံတုဲ ကၠောန်လဝ်ပေါဲရုဲမာဲအလီ ပါ်လဝ် ၃ သ္ကုတ် သ္ဂးရ။
အတိုၚ်ပၟိက်ဆန္ဒသွဟ်ဍေံတံ မိက်ဂွံကဵုဒှ်ဂှ် ကၠောန်လဝ်ပေါဲရုဲမာဲကီု ကေတ်ဇၞးသ္ပမာန် ရပ်ဓရတ်ကုညးဍုၚ်ကွာန်တံတုဲ ကၠောန်လဝ်ပေါဲရုဲမာဲအလီဂှ် ကောန်ဍုၚ်သီုဖအိုတ်တံကီု ဂကောံဗွိၚ်ဂၠးကဝ်တံကဵု ဍုၚ်အာသဳယာန်တံ ဒစဵုဒစးလဝ်ရောၚ် ချူလဝ်ရ။
ပေါဲရုဲမာဲအလီ တုဲဒှ်အာကီုလေဝ် ပရေၚ်ပေါဲဗတိုက်အလုံဍုၚ်မွဲကဵု ပေါဲဗတိုက်ပရေၚ်ဗၠးၜး ကောန်ဂကူကောန်ဍုၚ်အရၚ်တံ ဒေါအ်အာဟွံသေၚ်ကီု ဇၟာပ်ဂကောံဇြဟတ်ပၠန်ဂတးတံပၠန် မွဲမွဲဂကောံဒှ်ဒှ် နကဵုဗီုပြၚ်မဟာမိတ်တံဒှ်ဒှ် ထမံက်အာမံၚ်ပေါဲဗတိုက် နကဵုဗီုပြၚ်နာနာသာ်တံ နွံရ။
တုဲပၠန် သၠောတ်တၠအဝဵုပၞာန် ကဵုမံၚ်ဒဒိုက်ကၞာဘဲဒဏ် လ္တူညးဍုၚ်ကွာန်တံကဵု ကောန်ဍုၚ်အရၚ်တံ ဆက်နွံမံၚ်မ္ဂး ရဲပၠန်ဂတးတံလေဝ် ညံၚ်ဂွံစိုပ်အာတိုၚ်ပကဴရန်တၟံညးတံ ဆက်နွံအာမံၚ်ဏီရောၚ် ပ္ဍဲကဵုလိက်လလောၚ်တြး ချူထမံက်လဝ်ရ။
ဟိုတ်နူ သၠောတ်အဝဵုပၞာန်ကဵု မဟာဝါဒဳတံ ဍဵုဍိုက်ကၠုၚ်လဝ်အဆက်က်တံတုဲ ကောန်ဂကူမန်ကေၚ်ပိုၚ်ပြဳဍုၚ် နွံကၠုၚ်လဝ် ဍုၚ်နန်ထဝ်တံ ညံၚ်သ္ဂောံဂွံအခေါၚ်အဝဵု မပိုၚ်ပြဳဇကုဇကုမာန် ဆက်လုပ်အာမံၚ်ပေါဲဗတိုက်ဖိုအ် သ္ဂးရ။
ပ္ဍဲကဵုပရေၚ်လုပ်ပေါဲဗတိုက် အခိၚ်လၟုဟ်ဂှ် နကဵုဂၠံၚ်တရဴပရေၚ်ပၠန်ဂတးရပ်လွဟ်ဟေၚ် စိုပ်တိုၚ်ပကဴရန်တၟံအန္တိမ မာန်ရောၚ် ဗော်ဍုၚ်မန်တၟိ ဂကောံဗတိုက်သရိုဟ်သၠောတ်တၠအဝဵုပၞာန် NMSP AD ပတေဟ်ကေတ်တုဲ လ္တူတၠအဝဵုပၞာန်သီလဝ်အဝဵုတံဂှ် ဆက်လုပ်အာမံၚ်ပေါဲဗတိုက်ဖိုအ်ရောၚ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – NMSP-AD