မတ်မလီု ၊ ဖေဖဝ်ဝါရဳ ၃
ပ္ဍဲခေတ်တ္ၚဲဏံ သွက်ပရေၚ်ဂကူဗၠးၜးကေုာံ ညံၚ်ဂွံဒက်ပတန်ဍုၚ်မန်မာန် အသိၚ်အလိုန် ပရေၚ်ပၠန်ဂတးမန်သၠုၚ်မံၚ်ဏံဂှ် ညးဍုၚ်ကွာန်မန်တံ ဘိုၚ်ပါလုပ်ရီုဗၚ်အိုတ်ညိဂှ် ကံၚ်သဳဖိတ်ဒရေဝ်ဍုၚ်မန် ဗတိုက်ဖအောဝ်လဝ် ပ္ဍဲဖေဖဝ်ပါရဳ ၂ ရ။
ပူဂဵုညးဆာန်ဂကူတံ အပ္ဍဲဍုၚ်မ္ၚးဍုၚ်တံကီု တၠပရေၚ်ပိုန်ဒြပ်မန်၊ ညးဗြဴမန်ကေုာံ သၟတ်မန်တံ ပ္ဍဲပရေၚ်ပၠန်ဂတးဂှ် နနဲတိုက်ရိုက်ပါလုပ်ဒှ်ဒှ် ဟွံသေၚ်မ္ဂး ရီုဗၚ်ကဵုအထံက်ပၚ် မွဲနဲမွဲဗီုဒှ်ဒှ် ပ္ဍဲလိက်လလောၚ်တြး တ္ၚဲဂကူမန်မရနုက်ကဵု ၇၉ ဝါဂှ် ချူထမံက်လဝ်ရ။
ပြဟ်ဟ်ဏံ ညးဍုၚ်ကွာန်ဗမာတံကီု ကောန်ဍုၚ်အရၚ်ညးဍုၚ်ကွာန် သီုဖအိုတ်တံဂှ် ညံၚ်ဂွံတိတ်ဗၠးအာ နူကဵုသၞောတ်တၠအဝဵုပၞာန်မာန် လုပ်အာမံၚ်ပေါဲဗတိုက် နဲကဲစုၚ်ၚ်ရ။
ပ္ဍဲကဵုဒေသ ကောန်ဍုၚ်အရၚ်ဗွဲမဂၠိုၚ်တံ ညံၚ်ဂွံတိတ်ဗၠးအာ နူကဵုသၠောတ်တၠအဝဵုပၞာန်၊ သွက်အခေါၚ်မပိုၚ်ပြဳဇကု စသုၚ်စောဲအာတုဲ သွက်ဇြဟတ်တွဵုရး/ယူနေတ်ဖိတ်ဒရေဝ်တံ ဂွံခိုဟ်တိုန် ထမံက်မံၚ်ရုပ်ရဴအိုတ်ရ။
သွက်သ္ဂောံဂွံ အခေါၚ်အရာပရေၚ်ဂကူဇကုကေုာံ အခေါၚ်အရာ မပိုၚ်ပြဳတံဂှ် ပၠးတဲအာတ်မံၚ်ဇရေၚ်အလဵုအသဳပၞာန် သၟဝ်တဲသၠောတ်တၠအဝဵုဂှ် ဆလံမှကလိဂွံဟွံမာန်တုဲ ဒပ်ပၞာန်ဗမာတံရ နကဵုဇြဟတ်လွဟ်ဂှ် ဆက်ဍဵုဍိုက်ပျဲပျာံမံၚ်ရောၚ် MSFC ထံက်ထ္ၜးရ။
တုဲပၠန် အတိုၚ်သၞောဝ်ယိုက်ဝန်ပၞာန်ဂှ် ဒပ်ပၞာန်ဗမာတံ ကံက်ကေတ်မံၚ်ကောန်ပၞာန်တၟိ လ္တူသၟတ်မန်တံ နနဲအဓ္ဓမကီု၊ ကဵုဘာပၞာန်တုဲပလံၚ်ဗစိုပ်လဝ် မုက်ပၞာန်ဂစိုတ်မၞိဟ်တံအရိုဟ်ဟ်တ္ၚဲတုဲ ဥပဒေယိုက်ဝန်ပၞာန်ဟီုဂှ် သွက်ကောန်ဍုၚ်အရၚ်လၟိဟ်မၞိဟ်အောန်တံ ဒှ်မံၚ် ပရေၚ်ဂစိုတ်ကမၠက်ဂကူမွဲရောၚ် သ္ဂးရ။
ဂကောံဇြဟတ်ဒဳမဝ်ကရေသဳကဵု ကောန်ဍုၚ်အရၚ်တံဂှ် တးပါဲပတိတ်တုဲ သၞာံ ၂၀၂၅ ကၠောန်လဝ် ပေါဲရုဲမာဲအလီဏံ ဗော်ဒပ်ပၞာန်တံရ ဂွံလဝ်ဇၞး၊ ဍေံတံ ဆက်အုပ်ဓုပ်အာကၟိန်ဍုၚ် အတိုၚ်သၞောဝ် ၂၀၀၈ ရောၚ်။
သွက်ဂွံဆက်အုပ်ဓလီုအာ နကဵုပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်အုပ်ဓုပ်တံဂှ် ဂကောံပၞာန်ဗမာတံဂစာန်မံၚ်တုဲ ဆက်ဗတိုက်မံၚ် ဂကောံဇြဟတ်ပၠန်ဂတးတံကဵု ညးဍုၚ်ကွာန်တန်တဴမံၚ် ပ္ဍဲကဵုဒေသပဋိပက္ခတံရောၚ် MSFC ကဵုလဝ်သတိ ပ္ဍဲလိက်လလောၚ်တြးဂှ်ရ။
ပရိုၚ်-သြၚ်လောန်တိုၚ်မ်
Photo – MSFC