မတ်မလီု ၊ ဖေဖဝ်ဝါရဳ ၄
နူကဵုလပါ်ဒပ်ပၞာန်ဗမာ ကဵုဇြဟတ်ဟရိုဟ် သွက်ဂွံကၠောန်အာပရေၚ်ၜိုဟ်လလမ်အလီနွံမံၚ်ဂှ် ဒုၚ်သ္ဇိုၚ်ကဵုအတိုၚ်ကတိဝတ် ဂကောံဇြဟတ်ပၠန်ဂတးတံစွံလဝ်ဂှ်တုဲ ဆက်ဒစဵုဒစးအာညိဂှ် ကံၚ်သဳဒုၚ်ချပ်ဂၞန် ပရေၚ်ညဳသၟတ်ဂကူ NUCC ဗတိုက်ဖအောဝ်ဏာ ရ။
ပ္ဍဲဖေဖဝ်ဝါရဳ ၁ အတိုၚ် NUCC လလောၚ်တြးလဝ် လိက်ဒုၚ်စဳရေၚ်ဇရေၚ်ညးဍုၚ်ကွာန်တံမ္ဂး ပရေၚ်ကမၠောန်ပ္ဍဲကဵုသၞာံ ၂၀၂၅ ကီု ပရေၚ်အံၚ်ဇၞး၊ ပရေၚ်အခက်အခုဲတံကီု ကိစ္စပရေၚ်ကမၠောန် သွက်ဂွံကဵုဖျုန်ကၠောန်အာသွက်သၞာံဏံတံဂှ် ဗတိုက်ဖအောဝ်လဝ် ဇၟာပ်ဂကောံပၠန်ဂတးဂမၠိုၚ်ရ။
ပ္ဍဲကဵုပဋိဉာဏ်ဖိတ်ဒရေဝ်ဒဳမဝ်ကရေသဳ သ္ကုတ် ၁ ကဵု သ္ကုတ် ၂ အတိုၚ်ဂကောံဇြဟတ်ပၠန်ဂတးဂမၠိုၚ် သ္ပစွံလဝ်ကတိဝတ် တင်တုပ်စိုတ်တံမ္ဂး NUCC၊ NUG ကဵု CRPH တံဟီုဂှ် ဒှ်မံၚ်ဂကောံစန်ပကောံလဝ် လုပ်ဗဗွဲသၞောဝ် သ္ဂးရ။
ဟိုတ်ဂှ်ရ အတိုၚ်ဂကောံဇြဟတ်ပၠန်ဂတးဂမၠိုၚ် သ္ပစွံလဝ်ကတိဝတ်တုပ်လဝ်စိုတ် ပ္ဍဲကဵုပဋိဉာဏ် သ္ကုတ် ၁ ကဵု သ္ကုတ် ၂ တံ ဒုၚ်သ္ဇိုၚ်ကဵုဗီုတိထ္ၜးဂၠံၚ်၊ တင်ရန်တၟံ၊ မူဝါဒကဵုသၞောတ်ဗ္ၜတ် ဍာ်ဒကေဝ်တံတုဲ သွက်ဂွံကၠောန်အာ တာလျိုၚ်နွံမံၚ် ချူလဝ်ရ။
ပဋိဉာဏ် ဖိတ်ဒရေဝ်ဒဳမဝ်ကရေသဳတံဂှ် ဒုၚ်သ္ဇိုၚ်ကဵု ပရေၚ်ကမၠောန်ပၠန်ဂတး တဴတက်တိုန်အာမံၚ် အတိုၚ်လၟေၚ်ဂၠံၚ်ဍာန် ဍာံဍာံဂှ် သွက်ဂွံကၠောန်အာပရေၚ်အပြံၚ်အလှာဲ ကၠးကၠးမးမးမာန် ပံၚ်တောဲအာကဵု NUCC ညိဂှ် ဗတိုက်ဖအောဝ်ဏာ ဂကောံဇြဟတ်ပၠန်ဂတးဂမၠိုၚ်ရ။
သၞောတ်တၠအဝဵုပၞာန်သီုဖအိုတ် ညံၚ်ဂွံကၠေံကၠက်အာ ဒုၚ်သ္ဇိုၚ်ကဵုပရေၚ်ဒက်ပတန်ကၟိန်ဍုၚ် ဖိတ်ဒရေဝ်ဒဳမဝ်ကရေသဳတုဲ ညံၚ်ဂွံကၠောန်အာပရေၚ်အပြံၚ်သၠာဲနာနာ မဒှ်ရ။
နကဵုဂကောံ ဒေါအ်လဝ်ဗွဲယာယဳ နူကဵု NUCC တံဂှ်လေဝ် အတိုၚ်တုပ်လဝ်စိုတ် ပ္ဍဲကဵုပဋိဉာဏ်ဖိတ်ဒရေဝ်ဒဳမဝ်ကရေသဳ စပ်ကဵုဗီုတိထ္ၜးဂၠံၚ်တံ ညံၚ်ဂွံဆက်ဒတူလိုၚ်အာကဵုဂှ် ဗတိုက်ဖအောဝ် လဝ်ရ။
ခြာဟွံလံ နူကဵုဂကောံပၞာန်ဗမာတံ နနဲဗီုပြၚ်ဇြဟတ်ဟရိုဟ်နာနာသာ် ကၠောန်ကၠုၚ် ပရေၚ်ၜိုဟ်လလမ်အလီတံမ္ဂး ဒုၚ်သ္ဇိုၚ်ကဵုကတိဝတ်စွံလဝ်ညးသ္ကံတံဂှ် ညံၚ်ဂွံပံၚ်တောဲဒစဵုဒစးအာ ဗတိုက်ဖအောဝ်လဝ် ကီုရ။
ပ္ဍဲကဵုပၠန်ဂတး ဂကောံဇြဟတ်လုပ်ကၠုၚ်ပေါဲဗတိုက် ဒတူလိုၚ်လဝ်တံဂှ် စွံအဓိကကဵုအတိုၚ်တၚ်ရန်တၟံ ပၠန်ဂတးတမ်ကညၚ်တုဲ ညံၚ်ဂွံဆက်လုပ်အာပေါဲဗတိုက်၊ အကြာဂကောံဇြဟတ်မဟာမိတ်တံ ၜိုတ်သ္ပမာန် ညံၚ်ဂွံပံၚ်တောဲကၠောန်အာ မဒှ်ရ။
ပရေၚ်အာက္ဍိုပ်ဇြဟတ်ပၠန်ဂတး ညံၚ်ဂွံခိုၚ်ကၠိုက်အာမာန်ဂှ် လၟေၚ်ကမၠောန်ပရေၚ်စန်ပကောံတံ ဒှ်အဓိကတုဲ ဂကောံဇြဟတ်ပၠန်ဂတး ဟွံပါလုပ်လဝ်ဏီဂှ်လေဝ် ညံၚ်ဂွံလုပ်ဂကောံ NUCC ကေတ်အဆက် ပကောံပကေဝ်အာရောၚ် သ္ဂးရ။
ပြဟ်ဟ်ဏံ ဂစာန်ကၠောန်မံၚ်ပရေၚ်ပံၚ်တောဲဆက်စၠောံတံတုဲ ကော်ဘိက်အာ ဂကောံကောန်ဍုၚ်အရၚ်ပၠန်ဂတးတံကီု သီုကဵုယူနေတ်ဖိတ်ဒရေဝ် ထပ်မံက်တိုန်တၟိတၟိတံကီုရောၚ် ပ္ဍဲလိက်ဒုၚ်စဳရေၚ် ချူထမံက်လဝ်ရ။
လၟေၚ်ကမၠောန်ပရေၚ်ကိစ္စဇၞော် သွက်သၞာံ ၂၀၂၆ မ္ဂး ကဵုဖျုန်ကၠောန်အာ သဘၚ်သဳကၠဳညးဍုၚ်ကွာန်မွဲနွံတုဲ သွက်ဂွံပလေဝ်အာ ပဋိဉာဏ်ဖိတ်ဒရေဝ်ဒဳမဝ်ကရေသဳ သ္ကုတ် ၂ ပ္ဍဲကဵုသၞာံဏံ ညံၚ်ဂွံစိုပ်ဒတုဲကၠောန်အာရောၚ် သ္ဂးရ။
ပရေၚ်ပြုပြေၚ်စဳရေၚ် ပွမပြံၚ်သၠာဲဖိတ်ဒရေဝ် သွက်ဂွံချူအာသ္ဇိုၚ်ဥပဒေ AFTA ကေုာံ လၟေၚ်ကမၠောန်တင်တုပ်စိုတ်ဘုံ ပရေၚ်ဍုၚ်ကွာန် CPA ညံၚ်ဂွံဂွံမာန် ပ္ဍဲကဵုသၞာံ ၂၀၂၆ ကဝက်သၞာံဏံ ညံၚ်ဂွံတုဲဒှ်အာ ဂစာန်ကၠောန်အာရောၚ် NUCC ကဵုလဝ်သမ္တီရ။
ပရိုင်-သြၚ်လောန်တိုၚ်မ်
Photo – MOI