ဖာအၚ်၊ ဖေဖဝ်ဝါရဳ ၄
ပ္ဍဲကဵုတွဵုရးကရေၚ် စနူဂိတုဂျာန်နဝါရဳအိုတ်ဏံဂှ် ဒပ်ကဝ်မယှေန်ပၞာန် ပလံၚ်နၚ်လဝ်ဇြဟတ်ဗွဲမဂၠိုၚ်တုဲ ညံၚ်ဂွံကလေၚ်သီကေတ် ဗ္ဒိုပ်ပၞာန်ဗမာတံ ဆောံလေၚ်လဝ်တံဂှ် ဒှ်မာန်ရောၚ် ဂကောံဇြဟတ်ပၠန်ဂတးတံ သ္ၚဳဂၠိပ်လဝ်ရ။
စနူဂိတုဂျာန်နဝါရဳအိုတ်ဏံတုဲ ဒပ်ပၞာန်ဗမာတံ တိုန်ကၠုၚ်လပါ်ဍုၚ်ဗြတဳ သီုကဵုလွဟ်ဇၞော် ကွဳစက်ကာခြပ်တံ၊ နူကဵုဍုၚ်ဖာအၚ်မွဲအဆံင် နကဵုကွဳစက်ပၞာန်ဗွဲမဂၠိုၚ် တတ်ကၠုၚ်ဍုၚ်လိုင်ဗၠဲ၊ ကြုင်ဒဵု၊ ကအ်ကြိက် စိုပ်ကၠုၚ်ဍုၚ် ဗြဝတဳဂှ် ညးဒေသတံ ဟီုရ။
ဗ္ဒိုပ်ကဝ်မယှေန်ပၞာန် ဆေင်လေၚ်အာလဝ် ပ္ဍဲကဵုတွဵုရးကရေၚ်တံဂှ် ဒးကလေၚ်ကေတ်ရောၚ် အတိုၚ်ဒပ်ပၞာန်ဗမာဟီုလဝ် စဳဇန်ကၠောန်လဝ်ဒှ်မာန်ရောၚ် ညးအခေါင်ဟီုဂးနွံ မဟာဒပ် ၅ သ္ကိုပ်ဗိုလ်ဇၞော် သဝ်ဂလါဒို ဟီုကဵုဌာန်ပရိုၚ်သြၚ်လောန်တိုင်မ်ရ။
တုဲပၠန် ကောန်ပၞာန်ဗမာတံ ဟလိုင်မံၚ်ဇြဟတ်တံဂှ် သွက်ဂွံကလေၚ်ထိင်ဂၠံၚ်အာယှကဵု ဍုၚ်ဗြဝတဳလေဝ် ဒှ်မာန်ရောၚ် သ္ဂးရ။
မွဲလပါ်ပၠန် ဒပ်မၚ်ပယျဵုကရေၚ် BGF တံ လ္တူပြံၚ်သၠာဲလဝ် ဒပ်ပၞာန်ကောန်ဂကူကရေၚ် KNA တုဲ ပါ်တိတ်အာလဝ်ဂှ် လပါ် ကဝ်မယှေန်ပၞာန် ဒှ်မံၚ်ဒွိၚ်ဗွဲမဂၠိုၚ်နွံတုဲ လ္တူဏံကဝ်မယှေန်ပၞာန် ထပေၚ်လဝ်ဇြဟတ်လေဝ် ဒှ်မာန်ကီု သ္ကိုပ်ဗိုလ်ဇၞော် သဝ်ဂလာဒို သ္ဂးရ။
ပြဟ်ဟ်ဏံမ္ဂး အပ္ဍဲကဵုတွဵုရးကရေၚ် ပ္ဍဲကဵုတိဍာ် KNU မဟာဒပ် ၇ သၟဝ်ကျာကအ်ကြိက် ဒၞာဲဂၠံၚ်ကွဳစက်ဒဵုဒဝ်နတြေံတံကီု၊ ပ္ဍဲကဵုဒၞာဲ KNU မဟာဒပ် ၆ ဒၞာဲဒေသမေန်လက်ပါန်ကဵု ဖလူတံကီု ပ္ဍဲကဵုတိဍာ် KNU မဟာဒပ် ၅ ပ္ဍဲကရပ်ကွာန်ဝါဒူ ဂၠံၚ်ကမမံၚ်-ဖာပေါန်တံဂှ် အကြာဒပ်ပၠန်ဂတးတံကဵု ဒပ်ပၞာန်ဗမာတံ ပေါဲဗတိုက်ဒှ်မံၚ် ဇၟာပ်တ္ၚဲရ။
သွက်ဂွံကလေၚ်ထိၚ်ချုက်အာ တိဍာ်သၟဝ်ကျာကအ်ကြိက် သီုဖအိုတ်မာန်ကီု လပါ်သ္ကုတ်ဂၠံၚ် ဗြဝတဳ-ဝဝ်လေဝ်သၠုၚ်ကျာ ဗြဝတဳဂှ်ကီု ဒပ်ပၞာန်ဗမာထပက်မံၚ်ပၞာန် ဂၠိုၚ်ကဵုဂိတုကီုလေဝ် ကောန်ပၞာန်ချိုတ်၊ ဒးဝပ်ဂၠိုၚ်တုဲ ဆက်တိုန်ဂတဟွံမာန်ဏီရ။
ပ္ဍဲဒေသ ပရေၚ်အုပ်ဓုပ်ကဝ်တူလေဝ် ဗော်သွးကောန်ဂကူ ကရေၚ် KNU အကြာပွိုၚ် ၂၀၂၅ မွဲသၞာံဏံ ပေါဲဗတိုက် ၂၀၀၀ ဝါ ကေင်ဒှ်ကၠုၚ်တုဲ သ္ကိုပ်တမ်ဒပ်၊ ဒုသ္ကိုပ်တမ်ဒပ်တံကီု ချိုတ်အာလဝ် ပ္ဍဲကဵုကောန်ပၞာန် ၂၀၀၀ ပြင်တုဲ ၁၆၀၀ ပြင် ဒးလဝ်ဝပ်နွံမံၚ် ဗဟဵု KNU လလောၚ်တြးပတိတ်လဝ်ရ။
ပရိုင်-သြၚ်လောန်တိုၚ်မ်
Photo – CJ