မတ်မလီု ၊ ဖေဖဝ်ဝါရဳ ၄
သၠာဲဒါ ပွမဒစဵုဒစးအဝဵုဗီုပြင်ပကီုပရာတ်ဟွံသေၚ် CDM တံ ညံၚ်ဂွံကလေၚ်စဴဒၞာဲကမၠောန်ပၠန်ဂှ် နူကဵုဌာနဆေင်စပ်တံယှအ်နုက်ကဵုလဝ် နူကဵုစရၚ်ယၟုလီု Black Lists (ဘလက် လစ်စ်) ရောၚ် ကံၚ်သဳစဵုဒၞာကောန်ဂကူကေုာံပရေၚ်ဂီုကၠီု လလောၚ်တြးလဝ် ပ္ဍဲဂျာန်နဝါရဳ ၃၁ ရ။
ကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီု ကၠောန်လဝ်ပေါဲရုဲမာဲ ဒုၚ်ယၟုဒဳမဝ်ကရေသဳဗော်ဇဳတုဲအာတုဲ ထပ်ကလေၚ်ကော်ဖျဴမံၚ် သၞာဲဒါ CDM တံရ။
ရဲသၞာဲဒါ CDM တံ ကေတ်အဆက်ကဵုဌာနဇကုတုဲ ညံၚ်ဂွံကလေၚ်ပလံၚ်ပရိုၚ်ကီု ညးဆက်နင်လဝ်တံ ကလေၚ်စၟဳစၟတ်တုဲ ယဝ်ရကၠောန်လဝ်ဒုဟ်ဒဏ်ဟၟဲမ္ဂး နုက်ပတိတ်ကဵုနူကဵုစရၚ်ယၟုလီုရောၚ် သဘဴကမၠောန်ဍေံတံ နွံမံၚ်ဗီုဏံရ။
ကလေၚ်ဒုၚ်တဲသၞာဲဒါတံတုဲ ယှအ်ကဵုလဝ်ရောၚ် ပတိတ်ပရဲပရေၚ်ဍုၚ်ကွာန်ကဵု တြးဝါဒတံနွံမာန်ရောၚ် ဗိုလ်ဇၞော် CDM ဇြေန်ယဝ် သ္ပလဝ် CDM နူကဵုဒပ်ပၞာန်တိုက်ဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ၜိုတ် ၉၀% ပြင်င်ဂှ် ဍုဟ်မံၚ်ဍေံတံ ဒဵုအခိၚ်လၟုဟ်ဏီတုဲ ရဲသၞာဲဒါ CDM တံ ဗီုပြၚ်ကလေၚ်စဴအာဂှ် ဒှ်ဟွံမာန်ပုဟ်။ ဆဂး ပ္ဍဲကဵုမၞိဟ်မွဲလ္ၚီတှ်ေ မၞိဟ်ညိညိရ ဒှ်မာန်။ ပရေၚ်ဏံ ဒပ်ပၞာန် ပတိတ်ပရဲပရေၚ်ဍုၚ်ကွာန်ဇၞော်ဇၞော်တုဲ တြးဝါဒးလေဝ် ဒှ်ကၠုၚ်မာန်မံၚ်။ ယဝ်ရ ကလေၚ်လုပ်အာတှ်ေ ရဲ CDM ကဵု မၞိဟ်ခါန်ကၞက်လဝ်ဗွဲကြဴဏံ ဇီုတေက်ညးသ္ကံတုဲ ယန္တရာပရေၚ်အုပ်ဓုပ်ဍေံတံ ပဵုတုဲဘိုအ်ဂွံဒကးအာရနွံ” သာ်ဝွံ သ္ဂးရ။
စနူသၞာံ ၂၀၂၁ ဂိတုဖေဖဝ်ဝါရဳ ၁ ဂှ်တုဲ သၞာဲဒါလ္ၚဵု နူကဵုဌာနဝန်ဇၞော်ကၟိန်ဍုၚ်တံ ဒၟာနူဟိုတ်ပရေၚ်နာနာသာ်တုဲ ဟွံဂွံအခေါၚ်မွဲသာ် စ္ဍးခြာအာလဝ်နူကဵု ဒၞာဲကမၠောန်ညးတံဂှ် ချူလဝ်ပ္ဍဲကဵုလိက်လလောၚ်တြးရ။
ဟိုတ်ဂှ်ရ ဒၟာနူယၟုဇကု ပါမံၚ်ပ္ဍဲကဵုစရၚ်ယၟုလီုဂှ်တုဲ သၞာဲဒါဒးဂြိပ်ပါဲမံၚ်နကဵုစိုတ်ဒွိၚ်တံ နူကဵုဌာန်ဒၞာဲဇကုစိုပ်မံၚ်ဂှ် ညံၚ်ဂွံကလေၚ်ကေတ်အဆက်ကဵု ဒၞာဲရုၚ်ဌာနဇကုဒှ်ဒှ်၊ ပ္ဍဲကဵုဂကောံပရေၚ်အုပ်ဓုပ်အလဵုအသဳ ဒၞာဲကြပ်ကဵုဇကု အဆံၚ်ပွိုၚ်ဍုၚ်၊ ခရိုၚ်၊ တွဵုးရး၊ ရးတံဂှ်ဒှ်ဒှ်၊ ကေတ်အဆက်ကဵု ရုၚ်ကလုတ်ဗမာ၊ ရုၚ်ကလုတ်ပၞာန်၊ ရုၚ်သ္ကိုပ်ဝန် ကံၚ်သဳတံဒှ်ဒှ် ဆဝ်ဗ္ၚုဟ်ကဵုလဝ်သမ္တီရ။
စနူဒပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် သီကေတ်လဝ်အဝဵုကၟိန်ဍုၚ်တုဲဗွဲကြဴ သၞာဲဒါ CDM တံ ညံၚ်ဂွံကလေၚ်စဴဒၞာဲကမၠောန်ဂှ် ကော်ဘိက်ကၠုၚ်လဝ်ဇၟာပ်ပ်သၞာံကီုလေဝ် ဗွဲမဂၠိုၚ်ဂှ် ဂလာန်ပတေဟ်ဟၟဲပုဟ်။
မွဲလပါ်ဂှ် ပ္ဍဲကာလသီအဝဵု လ္တူသၞာဲဒါ ကၠောန်လဝ် CDM တံဂှ် ခုတ်စၟတ်စုတ်လဝ်ၝောံပိုဒ်နာနာသာ်တုဲ ရပ်ဖျေံလဝ်ထံၚ်ကီု သီလဝ်သ္ၚိဌာန်ညးတံကီု ကၟာတ်လဝ်ချိက်ကဵု ဒၞာဲကမၠောန်ညးတံကီု ပ္ဍဲကဵုဒၞာဲကမၠောန်ပုဂ္ဂလိကတံပၠန် ညံၚ်ဟွံဂွံခါန်ကၞက်ကမၠောန်ကီု ကံၚ်သဳပၞာန်ကဝ်မယှေန်ပၞာန်တံ ကဵုလဝ်ဇြဟတ်ဟရိုဟ် နွံရ။
တုဲပၠန် ပ္ဍဲကဵုလပါ်ကဏ္ဍပရေၚ်ထတ်ယုက် ရဲကၠောန်လဝ် CDM တံဂှ် ဟိုတ်နူရုၚ်ဂဥုဲ ခဒမ်ဂဥုဲဌာန်ဝဳယဲ ပုဂ္ဂလိကတံ ခါန်ကၞက်ကဵုကမၠောန်ဂှ် ဒးမာတ်ထောံဗွဲယာယဳနွံကီု ရုၚ်ဂဥုဲ၊ ခဒမ်ဂဥုဲဌာန်ဝဳယဲ ပုဂ္ဂလိကတံ ညံၚ်ဟွံဂွံခါန်ကၞက်လဝ် သၞာဲဒါ CDM လေဝ် ဒးထပက်လဝ်စၟတ်တဲဒုၚ်ဝန်တံ နွံရ။
လ္တူသၞာဲဒါ CDM တံ ယှအ်နုက်ကဵုလဝ် နူကဵုစရၚ်ယၟလီုတံဂှ် နကဵုက္ဍိုပ်လိက် ပကီုပရာတ်အကာဲအရာ စောဲစပ်အမှုနွံမာန်ရောၚ် ဗိုလ်ဇၞော် CDM ဇြေန်ယဝ် ထံက်ထ္ၜးရ။
“နူကဵုစရၚ်ယၟုလီုရ ဍေံတံယှအ်ကဵုဏောၚ်။ အကြာဏံ ဍေံတံတက်စုတ်က္ဍိုပ်လိက် ကၠောန်ပရေၚ်ပရာတ်ဂးတုဲ ကိစ္စဒစဵုဒစးလဝ်ဍေံတံဂှ် ကလေၚ်စောဲအမှုလေဝ် ဒှ်မာန်မံၚ် အဲခယျ။ ပ္ဍဲကဵုသၞာဲဒါတံဏံ ကောန်ပၞာန်ကဵု ဒပ်ဗၠာဲသၟိၚ်တံ ဟွံပါပုဟ်။ သၞာဲဒါကောန်ပၞာန်ကဵု ဒပ်ဗၠာဲသၟိၚ်တံဂှ် ဍေံတံကော်စ CDM ဟွံသေၚ်ပုဟ်။ ရဲဂြိပ်ပၞာန် ဂြိပ်နူဗၠာဲသၟိၚ် စုတ်လဝ်ပ္ဍဲစရၚ်ဂြိပ် ၄ ဂကူဂှ်ဏောၚ် အဲဂွံဆဵုလဝ်” သာ်ဝွံ သ္ဂးရ။
လ္တူရဲကေတ်နၚ်အဆက်တံဂှ် ကလေၚ်စၟဳစၟတ်အာတုဲ သၞာဲဒါကၠောန်လဝ်ဒုဟ်ဟၟဲတံကီု ကၠောန်လဝ်ဒုဟ် ဒုၚ်လဝ်ဒုဟ်တုဲ ယၟုလုပ်မံၚ်စရၚ်ယၟုလီုတံဂှ် နုက်ယှအ်ကဵုမံၚ်ရောၚ် ပ္ဍဲလိက်လလောၚ်တြး ချူလဝ်ရ။
အတိုၚ်တင်နၚ် အလဵုအသဳညဳသၟဟ်ကောန်ဂကူ NUG မ္ဂး ပ္ဍဲကာလသီအဝဵုဏံ သၞာဲဒါကၠောန်လဝ် CDM တံ လၟိဟ်နွံမံၚ်ကဵုကိုတ်ရောၚ် ဂွံတီရ။
ဗွဲမဂၠိုၚ် သၞာဲဒါနူကဵုဌာနပရေၚ်ပညာကဵု ပရေၚ်ထတ်ယုက်တံပါဂၠိုၚ်တုဲ ကောန်ပၞာန်ကဵု ကောန်ဒပ်ဗၠာဲသၟိၚ်တံလေဝ် ပါလုပ်မံၚ်ကီုရ။
ပ္ဍဲကဵုလဒေါဝ်သၞာံတုဲကၠုၚ်တေံဂှ် နူကဵု CRPH ကမ္မတဳသ္ပစၞးစၠတ်ဓဝ်ကၟိန်ဍုၚ် ချူခၞံလဝ်ဥပဒေ စပ်ကဵုပရေၚ် CDM ဂှ် သွက်ဂွံကေတ်အာအရေဝ် ရဲသၞာဲဒါ Non CDM တံတုဲ နုက်ပတိတ်ထောံလဝ် နူကဵုတာလျိုၚ်ညးတံရ။
လ္တူသၞာဲဒါ CDM တံဂှ် ညံၚ်ဂွံစွံအဲပရဲတုဲ ညံၚ်ဂွံစဵုဒၞာအာကဵု အခေါၚ်ကောန်ဍုၚ်ကဵု အခေါၚ်အရာမၞိဟ်တံကီု ပရေၚ်ညးတံဒုၚ်ဂိလဝ် ကေုာံ ဒးဒုၚ်ဖံက်ပကဝ်လဝ်အခေါၚ်အရာမၞိဟ်တံဂှ် ကလေၚ်ထမံက်ပတိတ်အာတုဲ ညံၚ်ဂွံကလေၚ်ဝဳအာကဵုဘဝညးတံ ကေုာံ လ္တူ Non CDM တံဂှ် စၟဳစၟတ်အာတုဲ သွက်ဂွံကေတ်အာအရေဝ် ရန်တၟံလဝ် မဒှ်ရ။
ပရိုင်-သြၚ်လောန်တိုၚ်မ်
Photo – Social Media