ဘာအင်၊ ဖေဖဝ်ဝါရဳ ၅
တွဵုရးကရေၚ် ပ္ဍဲလ္တူဍုၚ်ဘာအၚ်ဂှ် စနူဖေဖဝ်ဝါရဳ ၃ ဂှ် ဂကောံသၟဝ်တဲကဝ်မယှေန်ပၞာန်တံ ရပ်သီကေတ်မံၚ် ကွဳစက်လိုင်သေင်ဟၟဲတံ ညးဒေသတံဟီုကဵုဌာန်ပရိုၚ်သြၚ်လောန်တိုၚ်မ်ရ။
အတိုင်ဂၠံၚ်ဗၞိက်ဒေသပယျဵု ကွဳစက်လိုင်သေင်ဟၟဲ ဂြိပ်အာမံၚ် နူဍုၚ်ဘာအၚ်- လိုၚ်ဗၠဲ၊ နူဘာအင်-ကြုၚ်ဒဵု-ကအ်ကြိက် ပ္ဍဲကဵုဒၞာဲလ္ၚဵုလ္ၚဵုတံဂှ် ဗက်ရပ်သီကေတ်မံၚ်ရ။
ပ္ဍဲတ္ၚဲ ၃ ဖေဖဝ်ဝါရဳမွဲတ္ၚဲဓဝ်ဂှ် ကွဳစက်လိုင်သေင်ဟၟဲ ဟွံအောန်နူကဵု ၃၀ မဂှ်ကီု ကွဳစက်လိက်ထံက်ဂလာန် ဂကောံရပ်လွဟ်ကရေၚ်တံ ပါမံၚ်ဂှ်လေဝ် ရပ်သီကေတ်ဏာကီု ညးဒေသတံ ဟီုရ။
ဆဂး ကွဳစက်ဒပ်မင်ပယျဵုကရေၚ် BGF၊ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC ၊ ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA၊ ဒပ်ပၞာန်ကောန်ဂကူကရေၚ်ဗုဒ္ဓဘာသာတဴတက် DKBA ပါ်တိတ်လဝ်တံဂှ် ကဝ်မယှေန်ပၞာန် ရပ်သီကေတ်လဝ်ဟၟဲပုဟ် ညးဒေသတံ သ္ဂးရ။
ပ္ဍဲကဵုဘာအင် ဂကောံသၟဝ်တဲကဝ်မယှေန်ပၞာန်တံ ရပ်မံၚ်ကွဳစက်လိုၚ်သေၚ်ဟၟဲကီုလေဝ် မၞိဟ်ဂှ်ဟွံရပ်ပုဟ်။ ကွဳစက်ဂကောံဏောၚ် ဟီုမ္ဂး ရပ်ဏာသီုမၞိဟ်တုဲ နကဵုလိက်ထံက်ဂလာန်ဂကောံလဵုမှ ကလေၚ်ရုဲစှ်ကေတ်ဟွံဂွံပုဟ် ဂွံတီရ။
အတိုၚ်အမိၚ်နေပျဳတဝ် ညးတာလျိုၚ်အဆံၚ်လ္တူ ကဝ်မယှေန်ပၞန်တေံ ကဵုအမိၚ်ရပ်သီကေတ်မံၚ်တုဲ ကိုန်အစဳဇန်ရပ်သီကေတ်ကွဳစက်လိုင်သေၚ်ဟၟဲဏံဂှ် ဒဵုကဵုဂိတုမာတ်ချ်တေံအိုတ် ဆက်နွံအာမာန်ရောၚ် ဂွံတီနူကဵု တမ်ရိုဟ်ပရိုၚ်ညးကြပ်မံၚ်ကဵု ကဝ်မယှေန်ပၞာန်တံရ။
လ္တူဍုၚ်ဘာအၚ် ဟိုတ်နူဂကောံကဝ်မယှေန်ပၞာန် ကလေၚ်ရပ်သီကေတ်မံၚ်ကွဳစက်လိုၚ်သေၚ်ဟၟဲတံတုဲ ညးဒေသဒးစကာသုၚ်စောဲမံၚ် သွက်ပရေၚ်ပညာ၊ ပရေၚ်မၞိဟ်၊ ပရေၚ်ထတ်ယုက်၊ ပရေၚ်ပိုန်ဒြပ်တံ ဂွံအာကၠုၚ်စဂှ် ဒှ်မံၚ်တင်ဝါတ်အခက်အခုဲဗွဲမဂၠိုၚ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ