ဗြဝတဳ၊ ဖေဖဝ်ဝါရဳ ၁၁
တွဵုရးကရေၚ် ပ္ဍဲကရပ်ကွာန်ဖလူ သၠုၚ်ကျာဗြဝတဳဂှ် အကြာဒပ် ကဝ်မယှေန်ပၞာန်ကဵု ဂကောံမဟာမိတ်ဒပ်ပံၚ်တောဲတံ ၜါလပါ် ပေါဲဗတိုက်သ္ကာတ်ဒှ်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒပ်ပၞာန်ဗမာ သွက်ဂွံထိင်ချုက်ကေတ် ကွာန်ဖလူဂှ် စနူဖေဖဝ်ဝါရဳ ၉ အခိၚ်နူဂယး ထပက်ကရောၚ်ပၞာန်တုဲ လုပ်ကၠုၚ်လဝ် ကွာန်ထီုဣသိ ဇိုၚ်ဍုၚ် လေဝ်ကေကဝ်ဂှ်ရ။
ဟိုတ်နူကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ်လဝ်ဂှ်ရ ပေါဲဗတိုက်သ္ကာတ်မြဟ်ဒှ်လဝ်ကဵု ဂကောံဇြဟတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA တံသ္ကိုပ်သ္က မဒှ်ရ။
နူကဵုဒပ်ကဝ်မယှေန်ပၞာန်တံ ပန်ပလံၚ်မံၚ်ကဵု လွဟ်ဇၞော်တံ အဆက်က်တုဲ ရမျှာၚ်မကမ်လွဟ်ဇၞော်တံခတိုဟ်ဂှ် ရဲနူဍုၚ် မေဝ်ဆံက် တိသေံတေံ ဂွံမိၚ်မံၚ်ရောၚ် ညးဒေသဖလူတံကဵု တမ်ရိုဟ်ပရိုၚ်သေံတံ သ္ဂးရ။
ကွာန်မေန်လက်ပါန်ကဵု ကွာန်ဖလူ နွံမံၚ်ကရပ်ဒေသပယျဵုသေံ-ဗမာ ဂှ် စနူကဵုသၞာံအာတေံရ ဒပ်ကဝ်မယှေန်ပၞာန် စကာသုၚ်စောဲ လွဟ်ဇၞော်၊ ဒရုၚ်၊ ပၞာန်ကျာပန်ရီုကဵုလဝ်တုဲ ကရောၚ်ပၞာန်ထပက်မံၚ် ကီုလေဝ် ဒဵုအခိၚ်တ္ၚဲဏံ ထိၚ်ချုက် ဖလူကဵု ကွာန်မေန်လက်ပါန်တံ ဟွံမာန်ဏီပုဟ်။
သွက်အရာဏံ ပေါဲရုဲမာဲတုဲဒှ်အာတုဲ လပါ်သၠုၚ်ကျာဗြဝတဳဂှ် ဒပ်ကဝ်မယှေန် သွက်ဂွံပဵုထပက်အာပၞာန်မာန် စနူဂိတု ဂျာန်နဝါရဳ မံက်ရ ထပ်ထပေၚ်လဝ်ကဵု ကွဳခြပ်ပသဲ လွဟ်ဇၞော်တံကဵု ဖျေံစွံလဝ် ဇြဟတ်ပၞာန်ဗွဲမဂၠိုၚ်ကီုရ။
ဟိုတ်နူဒပ်ကဝ်မယှေန်ပၞာန် ပလံၚ်ထပေၚ်စုတ်မံၚ် ဇြဟတ်ပၞာန် အပ္ဍဲကဵုတွဵုရးကရေၚ်ဂှ် ပေါဲဗတိုက်ဂမၠိုၚ် ပဵုတုဲသ္ကာတ်မြဟ်ကၠုၚ် မာန်ရောၚ် ညးတာလျိုၚ် ဒပ် KNLA တံ သ္ၚဳဂၠိပ်လဝ်ရောၚ်။
ပရိုၚ်-သြၚ်လောန်တိုၚ်မ်
Photo – Social Media