လိုၚ်ဗၠဲ၊ ဖေဖဝ်ဝါရဳ ၁၁
ပ္ဍဲကဵုဒေသမျာၚ်ကျဳၚူ တွဵုရးကရေၚ် ဟိုတ်နူလွဟ်ဇၞော်ဒတုံခတိုဟ် စမြိုၚ်ဒၞာဲလ္ၚဵုလီုလာ်အာတုဲ ကောန်ညးဍုၚ်ကွာန်လ္ၚဵုတံလေဝ် ဒးအာလဝ်ဘဲဒဏ်နွံမံၚ် ဂွံတီလဝ်ညးဒေသတံရ။
ဒၞာဲကရပ်ရုၚ်ဂဥုဲမျာၚ်ကျဳၚူ ပွိုၚ်ဍုၚ်လိုၚ်ဗၠဲ ပ္ဍဲဖေဖဝ်ဝါရဳ ၉ ၜိုတ်အခိၚ် နူဂယး ၇ နာဍဳဂှ် မကမ်လွဟ်ဇၞော် ဒတုံခတိုဟ်အာတုဲ စမြိုၚ် ဒၞာဲရုၚ်ဂဥုဲလ္ၚဵုကဵု ကွဳစက်မွဲမ လီုလာ်အာရ။
ဟိုတ်နူမကမ်လွဟ်ဇၞော်ဏံ ခတိုဟ်ဂှ် ကောန်ၚာ်မွဲတၠဒးအာဝပ်တုဲ နူဂကောံလဵု ပန်နၚ်လဝ်လွဟ်ဇၞော်ဏံဂှ် ဟွံဂွံတီဏီပုဟ် သ္ဂးမံၚ်ရ။
ပ္ဍဲကရပ်ဒေသမျာၚ်ကျဳၚူ လပါ်ၜဳသြၚ်လောန်မွဲလပါ်တေံ ပ္ဍဲဍုၚ်ကမမံၚ် ခရိုၚ်ဘာပန်ဂှ် ဗ္ဒိုပ်ဗျူဟာ ဒပ်ကဝ်မယှေန်ပၞာန် နွံမံၚ်တုဲ နူကဵုဗ္ဒိုပ်ဗျူဟာဏံ ဟွံလံဟွံလံ ဗက်ပန်ဟဍာၚ်စုတ်မံၚ် လွဟ်ဇၞော် လပါ်ကွာန်တံနွံမံၚ်လၟိုန်ရ။
ရဲထံက်ဂလာန် ဂကောံပၞာန်ဗမာတံစောဲစပ်မံၚ် KNU ပန်စုတ်နၚ်လဝ် ဒေသမျာၚ်ကျဳၚူဂးတုဲ ပ္ဍဲကဵုဒေသမျာၚ်ကျဳၚူမ္ဂး ဒပ်ပၞာန်ဗမာ၊ ဂကောံ DKBA ကဵု ဒပ်မၚ်ပယျဵု BGF တံ နွံမံၚ်ရ။
နူကဵုဒပ်ကဝ်မယှေန်ပၞာန် ရုၚ်ဗျူဟာကမမံၚ်တေံ ပန်နၚ်ဒှ်မာန်ရောၚ် ညးဒေသတံ ထေၚ်ခယျ ဟီုဂးမံၚ်အိုတ်ရ။
တုဲကၠုၚ်ဖေဖဝ်ဝါရဳ ၂ တေံလေဝ် မကမ်လွဟ်ဇၞော် ဒတုံစှ်ေလဝ် ပ္ဍဲကဵုဒေသ မျာၚ်ကျဳၚူကီုလေဝ် ဟွံခတိုဟ်တုဲ ပရေၚ်ဒးဘဲဝပ် ဟၟဲရောၚ် ဂွံတီနူညးဒေသတံရ။
ပ္ဍဲကဵုဒေသမျာၚ်ကျဳၚူဂှ် ပေါဲဗတိုက်ဟၟူကီုလေဝ် ပ္ဍဲကရပ်ပွဳပွူ ဍုၚ်ကမမံၚ်ဂှ် အကြာဒပ်ကဝ်မယှေန်ပၞာန်ကဵု ဂကောံဇြဟတ် ပၠန်ဂတးတံဒှ်မံၚ်ပေါဲဗတိုက်တုဲ နူကဵုလပါ်ဒပ်ကဝ်မယှေန်ပၞာန်တံ ပန်မံၚ်လွဟ်ဇၞော်ကြာန်န် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media