နေပျဳတဝ် ၊ ဖေဖဝ်ဝါရဳ ၁၁
နူကဵုကံၚ်သဳစဵုဒၞာ ကောန်ဂကူကေုာံပရေၚ်ဂီုကၠီု ကလေၚ်ပလေဝ် လဝ် ဥပဒေရုၚ်ခုၚ်သ္ဇိုၚ်သၞောဝ်ဓဝ်တုဲ အာဏာစက်သမ္မတဂှ် ပဵုသၠဲလးတိုန်ရ။
သမ္မတယာယဳ ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ထပက်စၟတ်တဲတုဲ အတိုၚ် ၝောံပိုဒ် ၄၂၇ ပလေဝ်လဝ် ဥပဒေရုၚ်ခုၚ်သ္ဇိုၚ်သၞောဝ်ဓဝ် အလန်တတိယဂှ် လလောၚ်တြးလဝ် ပ္ဍဲဂျာန်နဝါရဳ ၂၇ ရ။
အပ္ဍဲကဵု ပလေဝ်လဝ် ဥပဒေရုၚ်ခုၚ်သ္ဇိုၚ်သၞောဝ်ဓဝ်ဂှ် ၝောံပိုဒ်ဟွံအောန်နူ ၁၀ ဒၞာဲပါမံၚ်တုဲ သီုကဵု ၝောံပိုဒ်ပါ်တံကီု ထပ်ပလေဝ်ထပေၚ်လဝ် ဂွံဆဵုရ။
အဝဵုသြဇာရုၚ်ခုၚ် ညံၚ်ဂွံဇၞော်တိုန်အာဂှ် အဓိက ပလေဝ်လဝ် တင်နၚ်ဥပဒေ စပ်ကဵု ပရေၚ်ရုဲစှ်ဂကောံရုၚ်ခုၚ်ဂှ်ရောၚ် နူကဵု ISP-Myanmar လလောၚ်တြးလဝ် ပ္ဍဲဖေဖဝ်ဝါရဳ ၉ ဂှ်ရ။
မွဲလပါ်ဂှ်ပၠန် အာဏာစက်သမ္မတ အပိုၚ်အခြာဟၟဲ ဒှ်အာမာန်တုဲ သၠောတ်တၠအဝဵုပူဂဵု ဇြဟတ်ညံၚ်ဂွံခိုဟ်တိုန်အာ ထပၠုပ်ကဵုလဝ်လမျီု လေဝ် ဒှ်မာန်ရောၚ် သ္ဂးရ။
အတိုၚ်ဥပဒေကၠာတေံမ္ဂး ဥက္ကဌရုၚ်ခုၚ်ဂှ် နူကဵုသမ္မတ ချပ်စကဵု ဥက္ကဌစၠတ်ဓဝ်ညးဍုၚ်ကွာန်ကဵု စၠတ်ထဝ်ကောန်ဂကူတံတုဲ ဒးရုဲစှ်အာ ကီုလေဝ် လၟုဟ်မ္ဂး အတိုၚ်သ္ဂုတ်သွာတ်သမ္မတမွဲဟေၚ် ရုဲစှ်မာန်ရောၚ်။
ဥက္ကဌကေုာံဂကောံရုၚ်ခုၚ်တံဂှ် နူကဵုစၠတ်ဓဝ်ကၟိန်ဍုၚ် ထပ်ထပေၚ်ကီု နုက်ထောံကီု အခေါၚ်လုပ်ဖန်ဖက်ဟၟဲတုဲ တင်နၚ်ဒးပလံၚ် လိက်ဒုၚ်စဳရေၚ်လၟေၚ်ဍာံဂှ်လေဝ် နုက်ပတိတ်လဝ် မဒှ်ရ။
ဟိုတ်ဂှ်ရ ပွံက်အဓိပ္ပါယ် ပရေၚ်ရုၚ်ခုၚ်ကီု သဘဴလစွံစိုတ်ကီု ပဵုတုဲဂွံခိုၚ်ကၠိုက်အာ ဒက်စန်လဝ်တုဲ အဝဵုအာဏာစက်ရုၚ်ခုၚ် ဇၞော်သၠဲတိုန်အာရောၚ်။
သွက်အရာဏံ အခေါၚ်အဝဵု ဥက္ကဌ စၠတ်ဓဝ်ညးဍုၚ်ကွာန်ကဵု စၠတ်ဓဝ်ကောန်ဂကူတံ ယှအ်ဖျေံလဝ်တုဲ ပရေၚ်စၠတ်ဓဝ်ကဵုခုၚ်ရုၚ်တံ ထိၚ်ဒဝ်ဂတးဂတန် (Check and Balance) ချက် အန်င် ဘဲလင်းန် တံ ဇြဟတ်ဍိုန်အာမာန်ရောၚ် ISP-Myanmar ထံက်ထ္ၜးလဝ်ရ။
တုဲပၠန် နူကဵုရုၚ်ခုၚ် ပံက်ပွံက်အဓိပ္ပါယ်၊ တင်ဖျေံသ္ဂုတ်သွာတ်၊ တင်လစွံစိုတ်နာနာတံဂှ် သ္ဒးဒှ်ဒတန်တုဲ အဝဵုအာဏာသ္ဒးစိုပ်အာ ဇၟာပ်ဌာနအလဵုအသဳ၊ ဂကောံကေုာံ ပူဂဵုတံရောၚ် ပ္ဍဲကဵုဥပဒေဏံ ချူခၞံလဝ်ရ။
သမ္မတကေမ်ဇျှာပ်လဝ် အခေါၚ်အဝဵုရုၚ်ခုၚ်တုဲ ဇၞော်သၠဲပတိုန်မံၚ် တိုၚ်ခဳပရေၚ်အုပ်ဓုပ်ဂှ် ဗၠးတိတ်မံၚ်ကဵု နူကဵုတိုၚ်ခဳ ပွမထိၚ်ဒဝ် ပရေၚ်ဥပဒေရောၚ် ISP-Myanmar သ္ဂးရ။
တုဲပၠန် ပရေၚ်သၠုၚ်ပတိုန်လဝ်အဝဵုရုၚ်ခုၚ်၊ စ္ဍးခြာအာမံၚ်ကဵု စၠတ်ဓဝ်၊ ဥက္ကဌရုၚ်ခုၚ်ဂှ် အတိုၚ်ပၟိက်စိုတ်သမ္မတ ရုဲစှ်ခါန်ကၞက်မာန် တင်နၚ်တံဏံဂှ်တှ်ေ ပ္ဍဲကဵုတိုၚ်ခဳပရေၚ်ဥပဒေလေဝ် က္ဍိုပ်သ္ကိုပ်ပၞာန် သွက်ဂွံသၠဲပတိုန် အာဏာစက်ညးတံ ဒှ်မာန်ရောၚ် ခါတ်လဝ်အကာဲ နွံရ။
သွက်ဂွံကဵုကသပ်ပ္ညဳပ္ညပ်အာ ပရေၚ်ဂီုကၠီု၊ ပရေၚ်အုပ်လဒမ်သၞောဝ်ဓဝ်၊ ပရေၚ်ဆက်ဆောံဂၠးကဝ်၊ ပရေၚ်ၜိုဟ်လလမ်ကေုာံ ပရေၚ်ချူခၞံ သၞောဝ်ဥပဒေတံမာန် ပ္ဍဲကဵုဖေဖဝ်ဝါရဳ ၃ ဂှ် နူကဵုကံၚ်သဳဂီုကၠီု ချူခၞံကဵု လဝ် ဥပဒေကံၚ်သဳ ဒုၚ်တေၚ်ဗေၚ်ချပ်ဗ္စာရ။
အတိုၚ်သ္ဇိုၚ်သၞောဝ်မ္ဂး နူကဵုသမ္မတ ရုဲစှ်၊ ပလှ်ပတိတ် ဂဥုပ်သ္ကိုပ်က္ဍိုက်ပ် ဒပ်ပၞာန် ဟွံမာန်ဏီလၟုဟ်ဏံ ညံၚ်ဂွံထိၚ်ကြာပ်အာ ဂတးဂတန် ပ္ဍဲကာလအကြာမွဲမာန်ဂှ် ချူခၞံကဵုလဝ် ဥပဒေကံၚ်သဳ ဒုၚ်တေၚ်ဗေၚ်ချပ်ဗ္စာတုဲ သၠုၚ်ပတိုန်ကဵုလဝ် အဝဵုသမ္မတရောၚ် ပရေၚ်ပါ်ပါဲထံက်ထ္ၜးမံၚ်တံ နွံရ။
ပရိုၚ်-သြၚ်လောန်တိုၚ်မ်
Photo – MOI