ကျာ်ထဝ် ၊ ဖေဖဝ်ဝါရဳ (၁၂)
တွဵုရးမန် ပွိုၚ်ဍုၚ်ကျာ်ထဝ် ကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်ကွာန်ပလိုၚ်တၟံဂှ် ရပ်ဏာညးဒေသ ၃၀ ပြင်တုဲ သ္ပလဝ်ဂဒံၚ်မၞိဟ်ရောၚ် ဂွံတီနူကဵုဂကောံဇြဟတ်ပၠန်ဂတးတံရ။
ပ္ဍဲဖေဖဝ်ဝါရဳ ၁၀ အခိၚ်သဝ်တ္ၚဲဂှ် ကရောၚ်ပၞာန်ဒပ်ကဝ်မယှေန်ပၞာန်ထပက်လုပ်ကၠုၚ် ကွာန်ပလိုၚ်တၟံရ။
ကရောၚ်ပၞာန်ဒပ်ကဝ်မယှေန်ပၞာန် ရပ်လဝ်ကောန်ၚာ်ကဵုညးဇၞော် ရဲဟွံဂြိပ်တိတ်နူကွာန်ဂှ်တုဲ သ္ပလဝ်ဂဒံၚ်မၞိဟ် မဒှ်ရ။
အပ္ဍဲကဵု ရဲဒးဒုၚ်သ္ပလဝ်ဂဒံၚ်မၞိဟ်တံမ္ဂး ကောန်ကွာန်ပလိုၚ်တၟံ ဒဝ်သာန်ကျဳ အယုက် ၆၀ သၞာံ၊ အစာဘာ လိၚ်မံၚ်သ္ၚိညးမွဲတၠ၊ ကောန်ကွာန် ကိုဇြဝ်မေန်လာတ်၊ ကောန်ၚာ် ၁၀ သၞာံမွဲတၠတံ သီုဖအိုတ်မၞိဟ် ၃၀ ပြၚ် ဒးဒုၚ်ရပ်လဝ်ရ။
ဒဵုကဵု ဖေဖဝ်ဝါရဳ ၁၁ အခိၚ်နူဂယးဂှ် ဒပ်ကဝ်မယှေန်ပၞာန်ဆက်ကေတ်လဝ်ဒၞာဲ ပ္ဍဲကွာန်ပလိုၚ်တၟံဖိုအ်ဏီတုဲ အကာဲအရာပရေၚ်ပၞာန်ၜါလပါ် ကြံၚ်မ္ၚိုဟ်မံၚ်မဒှ်ရ။
ဟိုတ်နူကရောၚ်ပၞာန် ဒပ်ကဝ်မယှေန်ပၞာန်ထပက်မံၚ်ဂှ်တုဲ ပ္ဍဲ ဖေဖဝ်ဝါရဳ ၉ ဂှ် ဒှ်လဝ်ပေါဲဗတိုက်ကဵုဒပ်ပၠန်ဂတးတံ သ္ကာတ်မြဟ်ဂှ်တှ်ေ အကြာၜါလပါ်ချိုတ်လဝ်နွံမံၚ်ရောၚ်ဂှ် ဂွံတီနူပရိုၚ်ဗလးတိတံရ။
ဟိုတ်နူထပက်မံၚ်ကရောၚ်ပၞာန် ပေါဲဗတိုက်ၜါလပါ်ဒှ်ဂှ်ရ ပ္ဍဲပွိုၚ်ဍုၚ် ကျာ်ထဝ် ၁၅ ကွာန် ညးဒေသမွဲဠက်ပြၚ်ၚ် ထောံသ္ၚိဌာန်တုဲ ဒးဂြိပ်ပါဲမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – Social Media