မတ်မလီု ၊ ဖေဖဝ်ဝါရဳ (၁၂)
ပ္ဍဲတွဵုရးမန် ကဝ်မယှေန်ပၞာန် သွက်ဂွံပံက်အာဘာတန်ဗတောန်ယိုက်ဝန်ပၞာန်ဂှ် အခိၚ်လၟုဟ် တံၚ်ရပ်ကေတ်မံၚ်ပဝ်တာသၟတ်တံနွံတုဲ စွံသတိပရေၚ်အာကၠုၚ်ညိဂှ် ညးဒေသတံဗတိုက်ဖအောဝ် မံၚ်ရ။
ပ္ဍဲဂိတုဏံ ကဝ်မယှေန်ပၞာန် သွက်ဂွံပံက်ဘာပၞာန်ယိုက်ဝန်ပၞာန် လၟေၚ် ၂၂ နွံမံၚ်ဂှ် စကာနဲကဲနာနာသာ် ဖျေံလဝ်အစဳဇန်တုဲ ဆက်တံၚ်ရပ်ကေတ်မံၚ် ပဝ်တာကဵုသၟတ်တံရ။
လောန်ကၠုၚ်ဖေဖဝ်ဝါရဳ ၁၀ အခိၚ်ဗတံဂှ် ဂကောံပံၚ်တောဲကဝ်မယှေန်ပၞာန် ဗွဲမဂၠိုၚ်တံ လုပ်အာဍုၚ်သုဝဏ္ဏဝတဳ အရာပ်ဗဂေါကဵု ကွာန်နံၚ်ဗို ပွိုၚ်ဍုၚ်သဓီုတုဲ ရပ်ကော်ဏာသၟတ် ၃၀ ပြၚ်နွံရ။
သွက်ဂွံယိုက်ဝန်ပၞာန် အတိုၚ်ကိုန်အစဳဇန် တံၚ်မံၚ်ပဝ်တာသၟတ်တံမဒှ်တုဲ အခိၚ်ဗတံ လ္ပဗက်သဘၚ်အာပေါဲ ဝေင်ပါဲအိုတ်ညိဂှ် အမာတ်တြေံ နူကဵုပွိုၚ်ဍုၚ်သဓီု ဥူအံၚ်ကျဝ်တူ ဗတိုက်ဖအောဝ်ရ။
“ပ္ဍဲအကြာတံဏံ ဍေံတံသွက်ဂွံကေတ်သၟတ် ၁၀၀ နွံမံၚ်။ ဍေံတံဖျေံလဝ်အစဳဇန် တံၚ်ကေတ်သၟတ် ၁၀၀ ။ သ္ပမာန်တှ်ေ သၟတ်တံ အေၚ်ဒုၚ်ဝေၚ်ပါဲကဵု ပေါဲသဘၚ်တံထေက်ဏောၚ်။ အခိၚ်ဒေါဝ်တ္ၚဲ အာကၠုၚ်ဂှ် ပြဿနာဟၟဲဏီဟီုလေဝ် အခိၚ်ဗတံတိတ်မ္ၚးတှ်ေ အတိုၚ်ဍေံတံ ဖျေံလဝ်အစဳဇန်ဂှ် လုပ်အာဇာဍေံမာန်မံၚ်” သာ်ဝွံ သ္ဂးရ။
တုဲပၠန် နကဵုကိုန်အစဳဇန်ယိုက်ဝန်ပၞာန်ဂှ် ကဝ်မယှေန်ပၞာန်ရပ်မံၚ်တုဲ အတိုၚ်ဍေံတံစၟတ်ခုတ်စွံလဝ် လၟိဟ်သၟတ်တံဂှ် ဟွံဂွံဟွံဒေါအ်ဆက်ရပ်အာ လၟိဟ်ဂွံပေၚ်မဒှ်တုဲ ဗွဲတၟေၚ်ညံၚ်ဂွံစွံသတိ ပရေၚ်အာကၠုၚ်ညိဂှ် ညးဗတိုက်ဖအောဝ်မံၚ်ရ။
အပ္ဍဲကဵုရပ်မံၚ်သၟတ်တံမ္ဂး ဟွံသၚ်ကာဂးတုဲ ရပ်ဏာ၊ ဒၞာဲညးၜါ ဍိုက်မွဲကွဳလိုန်ဓါတ်ဟွံဂွံဂှ် ဆဵုညာတ်မၞိဟ်ၜါဍိုက်တုဲ ကော်ရပ်ဏာသၟးဟွံက မာဲယိုက်ဝန်ပၞာန်ပိုက်အာဂးတုဲ ဗက်ရပ်မံၚ် သီုကဵုအပ္ဍဲသ္ၚိလေဝ်နွံရ။
ကဵုသၟတ်တံတိုန်ဘာပၞာန်တုဲ ပလံၚ်ဏာလဝ်သၟတ်တံမုက်ပၞာန်ကဵု လုပ်အကြာပၞာန်အပ္ဍဲဍုၚ် သာ်ဏံမ္ဂး လမျီုသၟတ်တံဗွဲမဂၠိုၚ်ဆောံလေင်အာမံၚ် ပွဗီုတံဏံဂှ်ဒုၚ်တဲဟွံမာန်ပုဟ် သၟတ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အခိင်စှ်ေနူဘာပၞာန်တုဲ ကာလပလံၚ်မုက်ပၞာန်ဂှ် သၟတ်ပိုဲတံဗွဲမဂၠိုင်ဆောံလေၚ်အာနွံ။ ဂွံမံၚ်ပရိုၚ်လ္ၚဵုဂှ်တှ်ေ ဟွံကလေၚ်စိုပ်ကၠုၚ်သ္ၚိရတုဲ ဒးဗှ်သၞာဂိုဟ်ဂဟောံမံၚ်အတိုၚ်ဏံ ဟိုတ်ဂှ်ရပရေၚ်ဏံ ပိုဲဟွံဒးစိုတ်ပုဟ်” သ္ဂးရ။
မွဲလပါ်ပၠန် ကဝ်မယှေန်ပၞာန် ကဵုဇြဟတ်ဟရိုဟ်ကု သ္ကိုပ်အုပ်ဓုပ်အရာပ်ကဵုကွာန်တံတုဲ သၟတ်တံဂှ် ကဵုအာတိုန်မံၚ်ဘာပၞာန်တုဲ အတိုၚ်လၟိဟ်ဍေံတံခုတ်ကဵုလဝ် ဟွံဂွံဟွံဒေါအ် ညံၚ်ဂွံပကောံကဵုဂှ် ကဵုဒုၚ်ဝန် ထပက်လဝ်စၟတ်တဲရ။
အတိုၚ်တင်နၚ် သြၚ်လောန်တိုၚ်မ် ဂွံလဝ်တၚ်နၚ်တံမ္ဂး ပ္ဍဲကဵုတွဵုရးမန် စနူပံက်လဝ်တန်ဗတောန်ယိုက်ဝန်ပၞာန် ညးဍုၚ်ကွာန် နူလၟေၚ် ၁ ဒဵုစိုပ် ၂၁ ဂှ် သၟတ်ကြပ် ၄၂၀၀ ပြၚ် ဒးဒုၚ်ပကောံလဝ်ကောန်ပၞာန်တၟိတံရ။
ပရိုၚ်-သြၚ်လောန်တိုၚ်မ်
Photo – MOI