ပၠန်ဂတးဂွံအံၚ်ဇၞး တၠုၚ်လအာတၟိ အရာပံၚ်ကောံအာက္ဍိုပ် မံက်ကၠုၚ်ဟာ 

မတ်မလီု ၊ ဖေဖဝ်ဝါရဳ (၁၂)

ဂကောံအလဵုအသဳညဳသၟဟ်ဂကူကဵု ဂကောံကောန်ဍုၚ်အရၚ်ရပ်လွဟ် ဒစဵုဒစးမံၚ် သၠောတ်တၠအဝဵုပၞာန်တံ ပရေၚ်ပၠန်ဂတးညံၚ်ဂွံအံၚ်ဇၞးအာ ဂစာန်ဖန်မံၚ် ဗီုပြၚ်အရာပံၚ်ကောံအာက္ဍိုပ် တၠုၚ်လအာတၟိရ။ 

စပ်ကဵုပရေၚ်ပၠန်ဂတး အကြာ NUG ၊ KNU ၊ KNPP ၊ CNF ကဵု KIO တံ ညံၚ်ဂွံကလေၚ်စန်ပကောံအာဂှ် ပ္ဍဲကဵုဖေဖဝ်ဝါရဳ သတ္တဟပထမဏံ သဳကၠဳလဝ်ညးသ္ကံနွံမံၚ်ရောၚ် ဒုဥက္ကဌ (၁) KIO ဒုသ္ကိုပ်ပၞာန်ဇၞော် ဂေါန်မဝ် စကဵုကၠုၚ်သမ္တီရ။ 

ပ္ဍဲဖေဖဝ်ဝါရဳ ၈ ကၠောန်လဝ်အခန်ကၞာ စၟတ်သမ္တီတ္ၚဲပၠန်ဂတးကချေၚ် မရနုက် ၆၅ ဝါ ပ္ဍဲကဵုတွဵုရးတက္ကသိတ် ဍုၚ်အမေရိကာန် အခိၚ်ညး ဟီုလဝ်ဂလာန်အန်လိုၚ်ဂှ် ဟီုစုတ်လဝ်ပရေၚ်ဏံရ။ 

ပ္ဍဲအကြာတ္ၚဲတံဏံ NUG ၊ KNU ၊ KNPP ၊ CNF ကဵု KIO တံ ကၠောန်လဝ်ကောံဓရီုအန်လိုၚ်တုဲ ပရေၚ်ပၠန်ဂတးဏံ ညံၚ်ဂွံအံၚ်ဇၞး ဗီုလဵုကၠောန်အာရော ကဵုဖျုန်တုဲသဳကၠဳလဝ်ရောၚ် ဒုသ္ကိုပ်ပၞာန်ဇၞော် ဂေါန်မဝ် သ္ဂးလဝ်ရ။ 

အတိုၚ်မဳဒဳယာပရိုၚ်တံ ချူလဝ် Steering Council (စတီးရီးယားရင်း ကောၚ်ဆယ်) ကံၚ်သဳပရေၚ် ပံၚ်ကောံအာက္ဍိုပ် ဟီုဂှ် ဒှ်ဆၜိုတ်ဝေါဟာမွဲရတုဲ သ္ပလဝ်ဒတန်ဟွံသေၚ်ဏီ ဒှ်မံၚ်ကဆံၚ် ဒးဆက်သဳကၠဳမံၚ်ဏီရောၚ်  ညးဟီုရ။ 

ဂကောံဇြဟတ်ပၠန်ဂတး အလုံသီုဖအိုတ်တံ ပံၚ်ကောံအာက္ဍိုပ်တုဲ ညံၚ်ဂွံထမံက်တၠုၚ်လအာတၟိမွဲ ချပ်ဗ္စာသဳကၠဳလဝ်ရောၚ် ညးအခေါၚ်ဟီုဂးနွံ ရုၚ်သ္ကိုပ်ဝန်ဇၞော် NUG ဥူနေဖုၚ်လာတ် ဟီုလဝ် ပ္ဍဲ PVTV ဖေဖဝ်ဝါရဳ ၁၀ တေံရ။ 

ကေတ်ခန်လ္ၚတ်ပရေၚ်ပၠန်ဂတး ပွိုၚ် ၅ သၞာံဂှ်တုဲ ညံၚ်ဂွံဒက်ပတန်အာဂကောံပရေၚ်အာက္ဍိုပ် ကၟောန်န်မွဲ ရန်တၟံလဝ်ရောၚ် ညးအခေါၚ်ဟီုဂးနွံ မုက်ဒပ်ကောန်ဂကူချေၚ် သလိုၚ်ထက်နဳ ဟီုကဵုဌာန်ပရိုၚ်သြၚ်လောန်တိုၚ်မ်ရ။ 

“ပ္ဍဲကဵုတၠုၚ်လအာပရေၚ်ဍုၚ်ကွာန် ပွိုၚ် ၅ သၞာံဏံ ညံၚ်ဂွံခိုဟ်အာနူဏံ ပရေၚ်ပၠတရဴအာက္ဍိုပ်ကၟောန်န်မွဲ ညံၚ်ဂွံဒှ် မိက်ဂွံဒက်ပတန်ရ။ အဓိကတၚ်ရန်တၟံ ဖျေံတၠအဝဵုတုဲ ညံၚ်ဂွံဒက်ပတန်အာ ကၟိန်ဍုၚ်ဖိတ်ဒရေဝ်ဒဳမဝ်ကရေသဳပြဟ်ဟ်ဂးတုဲ ကေတ်အာခန်လ္ၚတ် ပွိုၚ် ၅ သၞာံဏံတုဲ ညံၚ်ဂွံဒက်ပတန်အာ ရန်တၟံလဝ်” သာ်ဝွံ သ္ဂးရ။ 

ပရေၚ်ဏံဂှ် သွက် NUG ကဵု ဂကောံကောန်ဍုၚ်အရၚ်ရပ်လွဟ် K3C မုက်ဒပ်ပၠန်ဂတးတမ်ကညၚ်တံ ညံၚ်ဂွံပြံၚ်ဆုဲဗစိုပ်အာ ဗီုပြၚ်ပၠန်ဂတး သၠောတ်တၠအဝဵုပၞာန်ရောၚ် ညးကၠိုဟ်ကေတ်လဝ်သ္ဂးရ။  

လ္တူဏံ တုဲကၠုၚ်အပ္ဍဲပွိုၚ် ၅ သၞာံဏံဂှ် အကြာ NUG ကဵု K3C တံ ကၠောန်ကၠုၚ်လဝ် ပရေၚ်ပံၚ်ကောံအာက္ဍိုပ်မာန်ကီုဟာ တင်သၟာန်နွံမံၚ်တုဲ အခိၚ်လၟုဟ်မှကၠောန်ပရေၚ်သဳကၠဳပ္ညဳပ္ညပ်တံ ဟီုမံၚ်ဂှ်တှ်ေ အခိၚ်လဇုဲအာယျ ပရေၚ်ပါ်ပါဲတံလေဝ်နွံမံၚ်ပၠန်ရ။ 

အကြာဂကောံဇြဟတ်ပၠန်ဂတးတံဂှ် နူအခိၚ်ကၠာတေံရ ကေၚ်ပံၚ်ကောံကၠုၚ်လဝ်နွံလဝ်တုဲ ပ္ဍဲအခိၚ်လၟုဟ်ဏံ ကောံအပ္ဍဲကဵုပရေၚ်ပံၚ်ကောံမွဲဒၞာဲမ္ဂး အဓိကရန်တၟံလဝ်ဂှ် ဟွံလဇုဲအာပုဟ် သလိုၚ်ထက်နဳ ဟီုရ။ 

မွဲလပါ်ပၠန် ဒပ်ပၞာန်သီလဝ်အဝဵုဂှ် ကၠောန်လဝ်ပေါဲရုဲမာဲအလီတုဲ ပ္ဍဲဂိတုမာတ် တတိယသတ္တဟမ္ဂး ကော်စၠတ်ဓဝ်ဂှ် ဒက်ပ္တန်အာအလဵုအသဳဒုၚ်ရုဲစှ်မွဲရောၚ်။ 

ပ္ဍဲအလဵုအသဳဏံပၠန် က္ဍိုပ်သ္ကိုပ်ပၞာန်လၟုဟ်ဏံကီု သ္ကိုပ်ပၞာန်တံကဵုဗော်ဒပ်ပၞာန် ပျဳခိုၚ်ဖျိုဝ်တံရ ရပ်လဝ်အာဏာစက်ဗဟဵုတဲ သွက်ဂွံအုပ်ဓုပ်ဗဂေတ်အာ မဒှ်ရ။

အတိုၚ်ဂလာန် သ္ကိုပ်ပၞာန်ဂေါန်မဝ် ဟီုလဝ် တၚ်ရန်တၟံပရေၚ်ပၞာန်ဂှ်ရံၚ်အာမ္ဂး အရာပရေၚ်ပံၚ်ကောံအာက္ဍိုပ်ဏံ ဒှ်ဇြဟတ်ဟရိုဟ်မွဲရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ဟီုကဵုဌာန်ပရိုၚ်သြၚ်လောန်တိုၚ်မ်ရ။ 

“ဟိုတ်ဂှ်တုဲ ပရေၚ်ပံၚ်ကောံအာက္ဍိုပ်ဂှ် အပ္ဍဲကဵု Command Line (ပွကောပ်ကာဲကဵုအမိၚ်) မွဲဂှ် ထမံက်အာပရေၚ်ပၞာန်နကဵုဗျူဟာစှ်ေစှ်ေမာန်မ္ဂး ဒပ်ပၞာန်ဗမာ ဂေတ်ပချဳဒပ်ဟွံမာန်တုဲ လပါ်ဇြဟတ်ပၠန်ဂတးတံ ဂွံအံၚ်ဇၞးမာန်ရောၚ် ပတေဟ်ကေတ်။ ဟိုတ်ဂှ်ရ ပရေၚ်ပၞာန်ကီု ပရေၚ်ဍုၚ်ကွာန်ကီု ပရေၚ်ပံၚ်ကောံအာက္ဍိုပ်ဒးနွံရောၚ်” သာ်ဝွံ သ္ဂးရ။ 

ပ္ဍဲဒေသသ္ကတ်လပါ် ကချေၚ်၊ နာဂ၊ ချေၚ်ကဵု ရးသဂိုၚ် သ္ကုတ်လ္တူတံ ညံၚ်ဂွံညိၚ်ဂှ်ဖန်အာကၠာတုဲ အလုံသ္ကုတ်သၟဝ်ကျာမွဲ ယဝ်ရညိၚ်အာမ္ဂး လပါ်သ္ကုတ်ဒေသသၟဝ် ထိၚ်အာလောဲလောဲမာန်ဂှ် ဒှ်တင်ရန်တၟံ ပရေၚ်ပၞာန်ရောၚ် သ္ကိုပ်ပၞာန်ဂေါန်မဝ် ဟီုလဝ်ရ။

ပ္ဍဲသၞာံ ၂၀၂၄ ဂိတုဂျာန်နဝါရဳ ၃၁ ဂှ် KIO, KNU, KNPP, CNF ကော်ခဴစ ဂကောံ K3C ကဵု NUG တံ ပံၚ်တောဲလလောၚ်တြးလဝ် တင်ရန်တၟံဘုံမွဲ နွံရ။ 

အတိုၚ်တင်ရန်တၟံဘုံဂှ်မ္ဂး ဒပ်ပၞာန်သီုဖအိုတ်တံ ညံၚ်ဂွံစွံအာသၟဝ်တဲအလဵုအသဳကောန်ကွာန် ဒုၚ်ရုဲစှ်လဝ်ကဵု သၞောတ်ဒဳမဝ်ကရေသဳပေၚ်ၚ်တုဲ ညံၚ်ဂွံချူဓဇက်သ္ဇိုၚ်သၞောဝ်ဥပဒေ မဒှ်ရောၚ်။ 

ဒပ်ပၞာန်တံ ပါမံၚ်ပရေၚ်ဍုၚ်ကွာန်ဂှ် ညံၚ်ဂွံဒေါအ်။ သွက်ဂွံပလီုထောံ သ္ဇိုၚ်သၞောဝ် ၂၀၀၈ ကေုာံ ဥပဒေကလေၚ်ဂစာန်ပၠုပ်မံၚ်လမျီု သ္ဇိုၚ်သၞောဝ်ဏံဂှ်လေဝ် ညံၚ်ဂွံဗတိုက်သရိုဟ်ပေၚ်ၚ် လလောၚ်တြးလဝ်ရ။ 

ပရိုၚ်-သြၚ်လောန်တိုၚ်မ်

Photo – PDF