မတ်မလီု ၊ ဖေဖဝ်ဝါရဳ ၁၃
သွက်စၠတ်ဓဝ်တွဵုရးမန်ဂှ် က္ဍိုပ်သ္ကိုပ်ပၞာန်ပလံၚ်နၚ်ယၟုအမာတ် ဒပ်ပၞာန်ရုဲစှ်လဝ် ၈ တၠနွံမံၚ်ရောၚ် နူကဵုကဝ်မယှေန်ပေါဲရုဲမာဲကၟိန်ဍုၚ် လလောၚ်တြး ပ္ဍဲကဵုဖေဖဝ်ဝါရဳ ၁၁ ရ။
ပ္ဍဲကဵုက္ဍိုပ်သ္ကိုပ်ပၞာန် ပလံၚ်ကဵုနၚ်လဝ်ယၟုအမာတ်ဒပ်ပၞာန်တံဂှ် ဒုသ္ကိုပ်ပၞာန် အံၚ်ဝေန်တာန်၊ ဝန်ဇၞော်ပရေၚ်ဂီုကၠီုကေုာံ ဒေသပယျဵု တွဵုရးမန်သ္ကိုပ်ဗိုလ်ဇၞော် ကျဝ်သွာမျေအ်၊ သ္ကိုပ်ဗိုလ်ဇၞော် မံၚ်ၚ်လာတ်၊ သ္ကိုပ်ဗိုလ် ညဳဗိုဗိုသိုဝ်၊ သ္ကိုပ်ဗိုလ် ဒဝ်ၚုဝါကျဳ၊ သ္ကိုပ်ဗိုလ် ဒဝ်တိတ်တ်သိုဝ်၊ ဗိုလ်ဇၞော် ဒဝ်မျေအ်အ်နုဲ၊ ဗိုလ်ဇၞော် ဒဝ်တူဇြာတံ မဒှ်ကီုရ။
ပ္ဍဲကဵုအမာတ်စၠတ်ဓဝ်ပၞာန် က္ဍိုပ်သ္ကိုပ်ပၞာန်ပလံၚ်လဝ် သွက်စၠတ်ဓဝ်ရးဒေသဇၞော်ကဵုတွဵုရးတံဂှ် တာလျိုၚ်သၠုၚ်အိုတ်မ္ဂး ကဆံၚ်သ္ကိုပ်ဗိုလ်ဇၞော်ရဂွံဆဵုမံၚ်ကီုလေဝ် ဗွဲတၟေၚ် သွက်စၠတ်ဓဝ်တွဵုရးမန်ဂှ် ခါန်ကၞက်ကဵုလဝ် ကဆံၚ်ဒုသ္ကိုပ်ပၞာန်မွဲဂှ် ဂွံဆဵုကေတ်ရ။
အတိုၚ် ဌာန်ပရိုၚ်သြၚ်လောန်တိုၚ်မ်လ္ၚတ်ဂွံလဝ်မ္ဂး ဒုသ္ကိုပ်ပၞာန် အံၚ်ဝေန်တာန် ကၠုၚ်နူဒပ်ပၞာန်ဍာ်ဂှ် ကဆံၚ်လစှ်ေညးဒုၚ်ကာ ဂဥုပ်တန်ဗတောန်ကွတ် ပ္ဍဲကဵုဒပ်ပၞာန်ဗမာမွဲတၠ ကေၚ်ယိုက်ဂၠေၚ်လဝ်တာလျိုၚ်နွံတုဲ က္ဍိုပ်သ္ကိုပ်ပၞာန်လေဝ် ကေၚ်ဇိုန်နှင်အပ်ပြာပ်ကဵုလဝ်တဆိပ်ကြာ လာပ်ဂုဏ်တၟေၚ် ဒပ်ပၞာန်ရ။
သ္ကိုပ်ဝန်ဇၞော်မန်လၟုဟ် ဥူအံၚ်ကျဳတိၚ် ယၟုလီုမံၚ်ကဵု ပရေၚ်စသြန်ဝေၚ်ဇျှၚ်လံၚ်သြန်တံနွံတုဲ သွက်ဂွံကဵုတာလျိုၚ်သ္ကိုပ်ဝန်ဇၞော်ဂှ် ဒုသ္ကိုပ်ပၞာန် အံၚ်ဝေန်တာန် ဒှ်ကၠုၚ်မာန်ရောၚ် အမာတ်တြေံ ပွိုၚ်ဍုၚ်သဓီု ဥူအံၚ်ကျဝ်တူ သ္ၚဳဂၠိပ်ရ။
“သ္ကိုပ်ဝန်ဇၞော် ဥူအံၚ်ကျဳတိၚ် ယၟုလီုမံၚ်ကဵု ဝိုင်ဝေၚ်တံဂှ် ပ္ဍဲကဵုမဳဒဳယာမဟာဇန်တံကီု အကြာဗော်ပျဳခိုၚ်ဖျိုဝ်ဍေံတံကီု ဂွံမိၚ်မံၚ်။ ဒှ်အမာတ်တုဲမှ ခါန်ကၞက်ကဵု သ္ကိုပ်ဝန်ဇၞော်ဂွံ၊ အတိုၚ်နဲကဲဥပဒေစၠတ်ဓဝ်ဂှ် ပၠုပ်စရၚ်အမာတ်တုဲမှ ရုဲစှ်ပတိုန်အာ သ္ကိုပ်ဝန်ဇၞော်ရောၚ် ညာတ်” သ္ဂးရ။
တုဲပၠန် အတိုၚ်ဥပဒေစၠတ်ဓဝ်၊ နဲကဲဥပဒေတံမ္ဂး ဒၞာဲဝန်ဇၞော်တံဂှ် နူကဵုတၠပညာစီုသကီုကွတ် နူမ္ၚးမ္ၚးတံ ရုဲစှ်ခါန်ကၞက်မာန်ကီုလေဝ်သ္ကိုပ်ဝန်ဇၞော်ဂှ် ဒးဒှ်နူကဵုအမာတ်/ညးစၞးတံမဒှ်တုဲ ဒုသ္ကိုပ်ပၞာန် အံၚ်ဝေန်တာန်ဂှ် သွက်ဂွံဒှ်သ္ကိုပ်ဝန်ဇၞော် အခေါၚ်အရာဂၠိုၚ်မံၚ်ရောၚ် ညးဆက်ဟီုရ။
အတိုၚ် က္ဍိုပ်သ္ကိုပ်ပၞာန်ပလံၚ်နၚ်ယၟုအမာတ်ဒပ်ပၞာန် ၈ တၠဏံမ္ဂး ဒုသ္ကိုပ်ပၞာန် အံၚ်ဝေန်တာန်ဂှ် ဒှ်သ္ကိုပ်ဝန်ဇၞော်မာန်တုဲ သ္ကိုပ်ဗိုလ်ဇၞော် ကျဝ်သွာမျေအ်ဂှ် ဆက်ဒှ်အာဝန်ဇၞော်ပရေၚ်ဂီုကၠီုကေုာံဒေသပယျဵု တွဵုရးမန်ပၠန် တၠုၚ်လအာနွံမံၚ်ရ။
ပ္ဍဲကဵုစၠတ်ဓဝ် တွဵုရးမန်မံက်တိုန်ဏံမ္ဂး အမာတ်ပျဳခိုၚ်ဖျိုဝ် ၁၁ တၠ၊ အမာတ်ဒပ်ပၞာန် ၈ တၠ၊ အမာတ်ဗော်ညဳသၟဟ်မန် ၇ တၠ၊ ဗော် တစည၊ ဗော်ပအိုဝ်၊ ဗော်ညးဍုၚ်ကွာန်၊ ဗော်အာဂတညးဍုၚ်ကွာန်၊ ဗော်ဒတုဲဖဵုကောန်ဂကူကဵု ပိုန်ဒြပ်တဴတက်တံ ဂွံလဝ်အမာတ်မွဲမွဲတၠတုဲ အပံၚ်ဖအိုတ်အမာတ် ၃၁ တၠ နွံရောၚ်။
ကောံဓရီုလၟေၚ်ဍာံ အလန်ပထမ စၠတ်ဓဝ်တွဵုရးမန်အလန်တတိယဂှ် ပ္ဍဲကဵုဂိတုမာတ် သတ္တဟတတိယ သွက်ဂွံကော်အာ ကဝ်မယှေန်ပၞာန် ပလေဝ်ပလေတ်စလဝ်ရ။
ပရိုၚ်-သြၚ်လောန်တိုၚ်မ်
Photo – MOI