နေပျဳတဝ်၊ ဖေဖဝ်ဝါရဳ ၁၃
ဒုၚ်သ္ဇိုၚ်ကဵု ဂကောံဇြဟတ်အပ္ဍဲဍုၚ်တုဲ သွက်ပရေၚ်စဵုဒၞာကေုာံပရေၚ်ဂီုကၠီုကၟိန်ဍုၚ်ဂှ် ဟွံသ္ပပဓါန်ကဵုဍုၚ်မ္ၚး သၠောတ်ပရေၚ်စဵုဒၞာဂတာပ်ခေတ် ညးဍုၚ်ကွာန်တံသီုဖအိုတ် ညံၚ်ဂွံပါလုပ်အာဂစာန်ကၠောန်အာရောၚ် က္ဍိုပ်သ္ကိုပ်ပၞာန်ဟီုရ။
က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ပလံၚ်လိက်သဝဏ် သွက်အသေအဟာန် တ္ၚဲကၟိန်ဍုၚ် (၇၉) ဝါ ပ္ဍဲဂိတုဖေဖဝ်ဝါရဳ ၁၂ ထပက်လဝ်စၟတ်တဲလိက်ကသုက်ပေၚ်လုၚ်ဂှ် ချူစုတ်ဟီုလဝ်ရောၚ်။
ဒပ်ပၞာန်ပံၚ်တောဲအာကဵု ညးဍုၚ်ကွာန်နွံပၟိက်ကဵုပရေၚ်ၜိုဟ်လလမ်တံတုဲ ပရေၚ်ပကီုပရာတ် ရဲပလီုပလိုက်ဍုၚ်ကွာန် ကၠောန်မံၚ်ပွမဟွံကေတ်သၞောဝ်ဥပဒေတံ ပေါဲဗတိုက်သၠဲမံၚ်ပရေၚ်တိဍာ်တံဂှ် စဵုဒၞာအာရောၚ် ညးဟီုရ။
ပရေၚ်သီအဝဵုဒှ်တုဲ ဂကောံပၠန်ဂတးရပ်လွဟ်မံက်တိုန်ကၠုၚ်တံကဵု ဂကောံကောန်ဍုၚ်အရၚ်ရပ်လွဟ် ဗတိုက်မံၚ်သၠောတ်တၠအဝဵုပၞာန်တံဂှ် ညးမိက်ဂွံဟီုသ္ဂးဏာရောၚ် ဒးကၠိုဟ်ကေတ်ရ။
ကၟိန်ဍုၚ်ပိုဲဏံ ပၞာန်အပ္ဍဲဍုၚ်ညံၚ်ဟွံဂွံဒေါအ်အာ က္ဍိုပ်သ္ကိုပ်ပၞာန်ကၠောန်မံၚ်ရောၚ် သ္ကိုပ်ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် MSFC နာဲတလနာဲ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“နကဵုဇြဟတ်ညးဍုၚ်ကွာန် ဂစာန်ကၠောန်အာ သၠောတ်ပရေၚ်စဵုဒၞာ ဟီုဏာဂှ် ကၠောန်မံၚ် ပ္ဍဲအပ္ဍဲဍုၚ်ညံၚ်ဟွံဂွံဒေါအ်အာရဏောၚ်။ ကၠောန်ဗီုဏံဂှ်တှ်ေ ညးဍုၚ်ကွာန်တံ မွဲတ္ၚဲတုဲမွဲတ္ၚဲ ညံၚ်ဂွံပဵုကြေပ်တိုန်အာဏောင် အဲညာတ်” သာ်ဝွံ သ္ဂးရ။
ညံၚ်ဍုၚ်ကွာန်ကောန်ဍုၚ်အရၚ် မိက်ဂွံမံၚ်စံၚ်ၜိုဟ်ဟ်သြိုဟ်ဟ်တံဂှ် နွံမံၚ်ပၟိက်ကဵုပရေၚ်ၜိုဟ်လလမ်ထာဝရ ဟၟဲကဵုပဋိပက္ခတံရောၚ် ထ္ၜးလဝ် ဖိုရာမ်သၟတ်ကၠောန်လဝ် ပ္ဍဲဂိတုဂျာန်နဝါရဳတေံတုဲ ဟီုဏာရ။
အတိုၚ်ဒပ်ပၞာန်တန်တဴအာဂှ် ကၟိန်ဍုၚ်ဏံဆက်တန်တဴအာရောၚ် မဒှ်တုဲ ကောန်ညးဍုၚ်ကွာန်ဂမၠိုၚ်လေဝ် ဒတူလိုၚ်အာကဵုအလဵုအသဳ၊ ဒပ်ပၞာန်တံမွဲဖျုန်မွဲစိုတ်ဂှ် ညံၚ်ကၟိန်ဍုၚ်ဟွံပါ်ဒကးအာဒးမင်မွဲအာထေက်ရောၚ် သ္ဂးရ။
ဟိုတ်ဂှ်ရ ကာလထမံက်အာရုပ်ရဴ ကၟိန်ဍုၚ်ညံၚ်ဂွံညိၚ်ဝပ်ကေုာံ ကမၠောန်ပရေၚ်အုပ်လဒမ်သၞောဝ်ဥပဒေ ညံၚ်ဂွံအံၚ်ဇၞးမ္ဂး ကောန်ဍုၚ်အရၚ်ညးဍုၚ်ကွာန်တံသီုဖအိုတ် သွက်ဂွံပံၚ်တောဲအာကဵု အလဵုအသဳကေုာံဒပ်ပၞာန်မွဲစွံဂှ် ဗတိုက်ဖအောဝ်လဝ်ရ။
ကၟိန်ဍုၚ်ဒုၚ်လဝ်ယၟုဂှ် စန်ပကောံလဝ်သီုညးဖအိုတ်ဟွံမာန်တုဲ သၠောတ်ပရေၚ်ဂီုကၠီု သ္ပဗဟဵုကဵုညးဍုၚ်ကွာန် ဂွံဒှ်ကၠုၚ်မာန်ဂှ်ဟွံလောဲသွာပုဟ် ညးဍုၚ်ကွာန်မွဲတၠ ဟီုလဝ်လညာတ်ညးရ။
“အဓိက သၠောတ်ပရေၚ်ပၞာန် အုပ်ဓုပ်ညးဍုၚ်ကွာန် ဂွံဒှ်မာန်ဟီုဂှ် မၞိဟ်ညးဍုၚ်ကွာန်တံဒးစိုတ်၊ မၞိဟ်ညးဍုၚ်ကွာန်တံ စွံအဲပရဲမာန် အာက္ဍိုပ်တှ်ေ သၠောတ်ဗီုတံဏံ ဒှ်ကၠုၚ်မာန်ရောၚ်။ အကာဲအရာပြဟ်ဟ်ဏံ ကၟိန်ဍုၚ်ဟီုဂှ် ဟွံဒှ်မံၚ်ဗီုပြၚ်ကၟိန်ဍုၚ်တုဲ သၠောတ်ပရေၚ်ဂီုကၠီု၊ ပရေၚ်အုပ်ဓုပ်သ္ပဗဟဵုကဵု ညးဍုၚ်ကွာန်ဂွံမံက်တိုန်ဟီုဂှ် ဟွံလောဲသွာဏီ ခယျ” သာ်ဝွံ သ္ဂးရ။
ပ္ဍဲကဵုပေါဲရုဲမာဲဂှ် ညးကဵုမာဲ နွံမံၚ် ၅၄% ဂးတုဲ က္ဍိုပ်သ္ကိုပ်ပၞာန်ကေတ်စရာဲဟီုဂးမံၚ်တုဲ စကာဇြဟတ်ညးဍုၚ်ကွာန်တံတုဲ ညံၚ်ဂွံကၠောန်အာပရေၚ်ညိၚ်ဝပ်တံဂှ် ဟွံအောန်နူ ၜါဝါ ကေင်ဟီုလဝ်ရ။
တံၚ်ဟပၠုပ် ကေတ်ဇြဟတ်ညးဍုၚ်ကွာန်တံဗွဲအတေၚ်အဓ္ဓမတုဲ သွက်ဂွံကဵုဗတိုက်ကု ဂကောံကောန်ဍုၚ်အရၚ်ရပ်လွဟ်တံကဵု ဂကောံပၠန်ဂတးတံရောၚ် နာဲတလနာဲ ထံက်ထ္ၜးရ။
မွဲလပါ်ဂှ်လေဝ် ဟိုတ်နူပၠုပ်လမျီုသၞောဝ်ယိုက်ဝန်ပၞာန်ဂှ် ဘာပၞာန် မွဲဂိတုမွဲဝါ သၟတ် ၅၀၀၀ ကဵုတိုန်ဘာပၞာန်ဂှ်တှ်ေ လၟုဟ်စိုပ်ကၠုၚ်လၟေၚ်ဘာပၞာန် ၂၁ ဝါတုဲ ဂွံကၠုၚ်လဝ်ဇြဟတ်ပၞာန် မွဲကိုတ်ပြၚ်အာယျ။
နဲကဲစုၚ်ၚ် ပကောံစုတ်မံၚ်ညးဍုၚ်ကွာန် ပ္ဍဲကဵုဘာပၞာန်အတေၚ်အဓ္ဓမဂှ် သွက်ကၟိန်ဍုၚ်ဂွံၜိုဟ်သြိုဟ်အာ ဒှ်ကၠုၚ်ဟွံမာန်ပုဟ်ဂှ်လေဝ် ညးဍုၚ်ကွာန်မန်မွဲတၠ ဟီုရ။
“ဥပဒေယိုက်ဝန်ပၞာန်ဂှ် ညးမွဲမှ ဟွံဒးစိုတ်ပုဟ်။ ဍေံတံကော်ဏာအတေၚ် လ္ၚဵုတံပါအာ။ တွဵုရးမန်ဂှ် ပရေအ်ကွေံကွေံ။ ရဲစဴကၠုၚ်နူဍုၚ်သေံဂှ် ရပ်တုဲ ကဵုလုပ်ပၞာန်အတေၚ်။ ဍုၚ်ကွာန်ဟွံၜိုဟ်သြိုဟ်တှ်ေ ညးဍုၚ်ကွာန်တံ ပဵုတုဲဒှ်ဒဒိုက်။ အတိုၚ်အာမံၚ်ဗီုလၟုဟ်ဂှ် သွက်ညးဍုၚ်ကွာန်တံ ဟွံပြေပြံၚ်ပုဟ်” သာ်ဝွံ သ္ဂးရ။
နူကဵုဒပ်ပၞာန်ရုဲစှ်ကဵုမၞိဟ်ဂှ် ဒှ်သမ္မတတုဲ သွက်ဂွံပံက်အာကံၚ်သဳဒုၚ်တေင်ဗေၚ်ချပ်ဗ္ဒာ ဥက္ကဌ၊ ညးအုပ်ကာကေုာံ ညးလုပ်ဂကောံ ၅ တၠ ရုဲစှ်အာရောၚ်။
သွက်ဒၞာဲဏံ ပူဂဵုနူဂကောံလဵု ဒးဒှ်ရောၚ် ခုတ်စၟတ်လဝ်ဟၟဲတုဲ သ္ကိုပ်ပၞာန်လဵုဒှ်ဒှ် ရုဲစှ်ခါန်ကၞက်စုတ်အာမာန်ရောၚ် ညးလ္ၚတ်တံ ထံက်ထ္ၜးဟီုဂးမံၚ်ရ။
ပရိုၚ်-သြၚ်လောန်တိုၚ်မ်
Photo – MOI