ဗြဝတဳ၊ ဖေဖဝ်ဝါရဳ ၁၉
တွဵုရးကရေၚ် ဒၞာဲရုၚ်ကမၠောန်ကျာဖျ ဍုၚ်ဗြဝတဳကဵု ဒေသယှိုဲကုက်ကိုတံဂှ် ကဝ်မယှေန်ပၞာန် ရပ်ထိၚ်ပလီုပလိုက် မံၚ်ကီုလေဝ် ဒၞာဲကမၠောန်ကျာဖျတၟိတၟိတံ မံက်တိုန်ကၠုၚ်မံၚ်ရောၚ် ရိုဟ်ကၞက်ပရိုၚ်ဗြဝတဳတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒၞာဲကမၠောန်ကျာဖျ KK Park ဒပ်မၚ်ပယျဵု BGF ကဵုလဝ်ပရေၚ်ဂီုကၠီုဂှ် ကဝ်မယှေန်ပၞာန်လုပ်သီကေတ်ဒၞာဲ သီကေတ်ကောန်ပျူတာ၊ ဖုၚ်၊ စက်စတာလေအ်တုဲ ဖံက်ဖတိုဟ်ပလီုပလိုက်လဝ်ဂှ်ကီု ရပ်လဝ်ကောန်ဍုၚ်သ္အာၚ် ဗွဲမဂၠိုၚ်ရောၚ် လလောၚ်တြးလဝ်ရ။
ဆဂး ဒၞာဲကမၠောန်ကျာဖျတၟိတၟိတံပၠန် မံက်တိုန်မံၚ်ကရပ်ဍုၚ်ဗြဝတဳ သိုၚ်လဝ်စမြိုၚ်သ္ၚိဒၞာဲမံၚ်တံ ကလေၚ်မံက်တိုန်မံၚ်ရောၚ် ညးဒေသဗြဝတဳတံ ဟီုရ။
ဒၞာဲတိဍာ် BGF ဒေသပၞာန်လၟိဟ် ၄ ပ္ဍဲကွာန်မေတ္တာလေၚ်မျာၚ် ပွိုၚ်ဍုၚ်ဗြဝတဳဂှ် ဒုသ္ကိုပ်ပၞာန် သဝ်မုက်တုၚ်ကဵု ဂကောံတံ သိုၚ်လဝ် စမြိုၚ်ဒၞာဲမံၚ်စံၚ်တံတုဲ ဗဂေတ်မံၚ်ကမၠောန်ကျာဖျတံရောၚ်။
တုဲပၠန် ဒပ် BGF သၟဝ်ကျဗြဝတဳ ပြံၚ်လဝ်ယၟု ဒပ်ပၞာန် ကောန်ဂကူကရေၚ် KNA ဒၞာဲဒေသပၞာန်လၟိဟ် ၂ ဒုသ္ကိုပ်ပၞာန် သဝ်တေၚ်ဝေၚ် ထိၚ်ချုက်လဝ် ပ္ဍဲကွာန်တေံကတေဂှ် ကမၠောန်ကျာဖျတၟိတၟိတံကၠောန်မံၚ်ရောၚ် ညးဒေသဗြဝတဳတံ သ္ဂးရ။
ပ္ဍဲသၞာံအာတေံအိုတ်ဂှ် ပ္ဍဲဒၞာဲရုၚ်ကမၠောန်ကျာဖျ ဍုၚ်ဗြဝတဳကဵု ဒေသယှိုဲကုက်ကိုတံဂှ် ကဝ်မယှေန်ပၞာန် လုပ်ဂၠိုက်ဂၠာဲ စၟဳစၟတ်ကီုလေဝ် ဗွဲကြဴဏံ လုပ်ရပ်ထိၚ်ပလီုပလိုက်လဝ်ဂှ် ဟွံဂွံဆဵုပုဟ်။
ပရိုင်-သြၚ်လောန်တိုၚ်မ်
Photo – CJ