ဖာသံၚ် ၊ ဖေဖဝ်ဝါရဳ ၁၉
ဂကောံကောန်ဍုၚ်အရၚ် ပၠန်ဂတးရပ်လွဟ်ကဵုဂကောံပၠန်ဂတးတံ ထိၚ်ချုက်ဂွံလဝ် တိဍာ်လ္ၚဵုတံဂှ် ပ္ဍဲသတ္တဟတတိယဏံ ဒပ်ပၞာန်ဗမာကလေၚ်ထိၚ်ချုက်ဂွံယျရောၚ် လိက်ပရိုၚ်တြးဝါဒ အလဵုအသဳ ချူထမံက်လဝ်ရ။
ပ္ဍဲရးသဂိုၚ် ဍုၚ်ဗာန်မံက်ကဵု တွဵုရးကရေၚ်ဍာဲ ဍုၚ်ဖာသံၚ်တံဂှ် ဒပ်ပၞာန်စကာဇြဟတ်ပေၚ်ၚ်တုဲ ကလေၚ်ထပက်ပၞာန် ဍိုက်ဗတိုက်လဝ်ဂှ် ပ္ဍဲအခိၚ်ပေါဲရုဲမာဲလောန်အာဏံ ကလေၚ်သီဂွံလဝ် မဒှ်ရ။
ဍုၚ်ဗာန်မံက် ဒပ်ပၞာန်ဗၠးၜးကချေၚ် KIA ကဵု ဒပ်ပၞာန်စဵုဒၞာ ညးဍုၚ်ကွာန် PDF တံ ထိၚ်ချုက်လဝ်ဂှ် ဒပ်ပၞာန်ဗမာကဵု ဒပ်ပၞာန်သေံဍာဲ SNA တံပံၚ်တုဲ ကလေၚ်သီဂွံဏာ ပ္ဍဲဖေဖဝ်ဝါရဳ ၈ ရ။
ဒၞာဲဒေသ ဒပ်ကရေၚ်ဍာဲ ထိၚ်ချုက်ဂွံလဝ်ဍုၚ်ဖာသံၚ်ဂှ်လေဝ် ပ္ဍဲကဵု ဖေဖဝ်ဝါရဳ ၁၅ ဂှ် ဒပ်ပၞာန်ဗမာ ကလေၚ်သီဂွံလဝ်ရောၚ် လိက်ပရိုၚ်အလဵုအသဳတြးဝါဒတံ ချူလဝ်ရ။
နူကဵုဒပ်ပၞာန်ဗမာ ကေတ်လဝ်ဇြဟတ်ပၞာန်အရီုဗၚ် နူဗဝ်လခေဝ် ၜိုတ် ၅၀၀ တုဲ လုပ်ဍုၚ်သီဂွံလဝ်ရောၚ် ညးအုပ်ကာကံၚ်သဳပရေၚ်အုပ်ဓုပ် ဍုၚ်ကရေၚ်ဍာဲ အခိၚ်အကြာ ICE ဥူဗညာ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လပါ်ပၞာန်ဗမာ ဇြဟတ်ဍေံတံ ဂၠိုၚ်မံၚ်ကီု လွဟ်ကီု နဲကဲဒရုၚ်ကီု ၜၚ်ကျာကီု အဆဗွဲမဂၠိုၚ် ကြဳဖျေံဗတိုက်လဝ်ဂှ် သွက်ပိုဲတင်ကော်ဆော ဇၞော်ကွေံကွေံရ။ နကဵုမဟာဗျူဟာပၞာန် ပိုဲဒးကလေၚ်ဆုတ်လဝ်ဂှ် ရံၚ်အာမ္ဂး ဟိုတ်နူၜၚ်ကျာပၞာန်တံဏောင်” သာ်ဝွံ သ္ဂးရ။
ပ္ဍဲအခိၚ်ကာလပၞာန်သီအဝဵုဏံ ဒပ်ပၞာန်ဗမာ ၜိုန်ရဒးပလးလဝ်တဲ ၁၀၀ ဍုၚ်ပြၚ်ကီုလေဝ် လဝေၚ်ပၞာန် ၁၀၂၇ သ္ကုတ်ဒုတိယတုဲအာဂှ် ဟိုတ်နူကြုက် လုပ်ဖန်ကဵုတုဲ နကဵုပရေၚ်ဍုၚ်ကွာန်ကီု ပရေၚ်ပၞာန်ကီု ဒပ်ပၞာန်ဗမာ ကလေၚ်ယာဍိုပ်မာန်ကၠုၚ်ရ။
ဒပ်ပၞာန်ဗမာ စကာဇြဟတ်ပန်လွဟ်ဇၞော်ကဵု ၜၚ်ကျာတံတုဲ မၞိဟ်လေဝ်စိုပ် မကမ်လေဝ်စိုပ် ကၠောန်ကၠုၚ်ဗီုပြၚ်ဏံရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“ပန်ကဵုလွဟ်ဇၞော်၊ ကရောၚ်ပၞာန် တိုန်ကၠုၚ်၊ ဗတိုက်ကဵုၜၚ်ကျာ၊ ဗတိုက်ကဵုဒရုၚ်၊ ဗီုကၠာတေံ ဗလးမၞိဟ်တုဲတိုန်ကၠုၚ်ဟွံသေၚ်ပုဟ် မၞိဟ်လေဝ်စိုပ် မကမ်လေဝ်စိုပ် ဒှ်ဗီုပြၚ်ဏံ။ အဓိက စကာလဝ်ဇြဟတ် မကမ်ပေၚ်ၚ်၊ လပါ် မိုဝ်ဂုက်တေံလေဝ်ဗီုဏံ၊ လပါ်ကရေၚ်ဍာဲလေဝ် ဗီုဏံ။ အဓိက Fire Power ဂှ် ပိုဲပြိုၚ်ပကာန်ဟွံမာန်ပုဟ်။ အဓိက ဇြဟတ်ဗတိုက်ရ။ လပါ်ဍေံတံ ဇြဟတ်မၞိဟ်တၟိ ၜိုတ်ကေတ်ဂွံမံၚ်။ မွဲဂိတု ၅၀၀၀ ဂွံမံၚ်။ လပါ်ဍေံတံ ဒုၚ်လေၚ်မၞိဟ်မံၚ်” သာ်ဝွံ သ္ဂးရ။
အတိုင်ဒပ်ပၞာန်ဗမာ တြးလဝ်ဝါဒဂှ်ရ ရဲပၠန်ဂတးတံဖျေံလွဟ်ကီု အာတ်အခေါၚ်စဴသ္ၚိတုဲ ဟွံကလေင်စိုပ်ဒၞာဲ ဂြိပ်တိတ်မံၚ်နွံတုဲ ၜိုတ်ဇြဟတ်နွံကဵုနွံ ဆက်ဗတိုက်မံၚ်တှ်ေ မဇပၠန်ဂတး ကၠက်အာမာန်ဂှ်ရ ဒးဆက်ထိၚ်လဝ်ဇြဟတ်တုဲ ဆက်ဗတိုက် အာမံၚ်ရောၚ် ညးဆက်ဟီုရ။
ဍုၚ်ဂကောံပၠန်ဂတးတံ ထိၚ်ချုက်ဂွံလဝ်ဂှ် ဒးကလေၚ်ကဵုမံၚ်တုဲ သြန်ကဵုနဲကဲပညာတံဂှ် ဗက်အာတ်အရီုဗၚ် ဂွံမာန်ကီုလေဝ် ညံၚ်ရဴဒပ်ပၞာန်ဗမာတံ ပကောံကေတ်မံၚ်ဇြဟတ်မၞိဟ်ဂှ် ကၠောန်ဟွံလောဲပုဟ် ဗိုလ်ဇၞော် CDM ဇြေန်ယဝ် ထံက်ထ္ၜးလဝ်ရ။
ဟိုတ်နူပရေၚ်လဝေၚ်ပၞာန် ၁၀၂၇ ဒပ်သရိုဟ်စှ်ေအာလဝ်တံဂှ် ကလေၚ်ပၠုပ်လမျီု ဥပဒေယိုက်ဝန်ပၞာန်တုဲ ဒပ်ပၞာန်ဗမာကလေၚ်ဝေၚ်ပၞာန်၊ ကလေၚ်ထိၚ်ဂွံအာလဝ်ရောၚ်။
ပံၚ်ကဵုညးဍုၚ်ကွာန်ထံက်ဂလာန်တံတုဲ ဗတိုက်သရိုဟ်အာ ပရေၚ်ပၠန်ဂတးရပ်လွဟ်တံရောၚ် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဟီုလဝ်ရ။
လပါ်ရဲဒစဵုဒစးမံၚ်သၞောတ်တၠအဝဵုပၞာန် ဂကောံအလဵုအသဳ ညဳသၟဟ်ဂကူ NUG ကဵု K3C တံလေဝ် ပၠန်ဂတးညံၚ်ဂွံအံၚ်မာန် ပရေၚ်ပံၚ်ကောံဗတိုက်အာ ဗီုပြၚ်တၟိဂှ် ဂစာန်ထမံက်မံၚ်ရုပ်ရဴပၠန် ရောၚ် လလောၚ်တြးလဝ်ရောၚ်။
ပရိုင်-သြၚ်လောန်တိုၚ်မ်
Photo – SAC