မတ်မလီု ၊ ဖေဖဝ်ဝါရဳ ၂၀
ပ္ဍဲတွဵုရးမန် သွက်ဘာပၞာန် ယိုက်ဝန်ညးဍုၚ်ကွာန် လၟေၚ် ၂၂ ပကောံလဝ်သၟတ် ၜိုတ် ၃၀၀ နွံမံၚ်ရောၚ် ဂွံတီလဝ် နူကဵုတၚ်နၚ် ဒပ်ပၞာန်ဗမာတံရ။
ပ္ဍဲဖေဖဝ်ဝါရဳ ၁၈ ဏံ ကၠောန်ဗ္ဒျ်လဝ် အခန်ကၞာ ပံက်ဘာယိုက်ဝန်ပၞာန်ညးဍုၚ်ကွာန် လၟေၚ် ၂၂ ပ္ဍဲကဵုဘာပၞာန်လၟိဟ် ၄ ကွာန်ဝါကလဳ ပွိုၚ်ဍုၚ်ဇြပ်ဗုရ။
အတိုၚ်လိက်ပရိုၚ်တြးဝါဒ ဒပ်ပၞာန်ဗမာချူလဝ်မ္ဂး သၟတ်တိုန်ဘာပၞာန် ၜိုတ် ၃၀၀ တိုန်မံၚ်ဘာယိုက်ဝန်ပၞာန် လၟေၚ် ၂၂ နွံမံၚ်ဂှ်တှ်ေ လၟိဟ်ဂၠိုၚ်နူကဵုဘာပၞာန်ဂိတုတုဲတေံဏီရောၚ် ဂွံဆဵုလဝ်ရ။။
ဟိုတ်နူ ရပ်တံၚ်နၚ်ပဝ်တာသၟတ်တံ ပကောံဂွံနၚ်တုဲ သွက်ဘာပၞာန်လၟေၚ် ၂၂ ဏံ လၟိဟ်ဂၠိုၚ်တိုန်ရောၚ် ညးကြပ်မံၚ်ကဵု ဒပ်ပၞာန်ဗမာမွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဂိတုဏံ မၞိဟ်ဂၠိုၚ်နူကဵု ဂိတုကၠာကၠာတေံဏီ။ တံၚ်လဝ်ပဝ်တာ သၟတ်တံလေဝ်ဂၠိုၚ်မံၚ်ကီု။ ပထမ အခိၚ်ပေါဲရုဲမာဲဒှ်မံၚ်တုဲ ညိင်မံၚ်ညိညိဏီ။ လၟုဟ်ကလေၚ်တံၚ်ကေတ်ပဝ်တာ ဗီုကၠာတေံပၠန်။ သွက်ဂွံတိုန်ဘာပၞာန်ဂှ် ဗီုကၠာတေံ ဂွံထပက်အဇာ ကဵုသြန်လေဝ် မၞိဟ်ကၠောန်ဟၟဲပုဟ်။ ဗီုဂွံဗီုကေတ် တံၚ်မၞိဟ်တံ ပလံၚ်ဏာဘာပၞာန်” သာ်ဝွံ သ္ဂးရ။
သွက်ဂွံတိုန်ဘာပၞာန် လၟေၚ် ၂၂ ဂှ် စနူဂိတုဖေဖဝ်ဝါရဳ ပထမသတ္တဟတေံရ ရပ်မံၚ်သၟတ်တံလေဝ်နွံ၊ လ္ၚဵုဒးမာဲဟီုတုဲ ဒးဗက်ဂၠာဲရပ်ကေတ် အကြာသ္ၚိတံရ။
တုဲပၠန် ဟွံသင်ကာဂးတုဲ ရပ်မံၚ်သၟတ်တံကီု ညးတြုံၜါတၠ ဍိုက်မွဲကွဳလိုန်ဓါတ်ဟွံဂွံဂှ် ဍိုက်ဒးမ္ဂးရပ်ဏာဂှ်ကီု၊ အခိၚ်အာကမၠောန်စဴကမၠောန် တံၚ်ပဝ်တာရပ်ဏာလဝ်သၟတ်တံ မဒှ်ရ။
အတိုၚ်တင်နၚ် ဌာန်ပရိုၚ်သြန်လောန်တိုၚ်မ် ပကောံဂွံလဝ်တင်နၚ်မ္ဂး စနူဘာယိုက်ဝန်ပၞာန်လၟေၚ် ၁ ဒဵုကဵု ၂၂ ဂှ် သၟတ်ၜိုတ် ၄၅၀၀ ဒးဒုၚ်ပကောံလဝ် ကောန်ပၞာန်တၟိ မဒှ်ရောၚ်။
ပရိုင်-သြင်လောန်တိုၚ်မ်
Photo – MOI