မတ်မလီု ၊ ဖေဖဝ်ဝါရဳ ၂၀
သွက်ပရေၚ်ၜိုဟ်လလမ်ဍုၚ်ဗမာ ဟွံပြံက်လုပ်ပထုဲအကြာမွဲသာ် ကဵုအရီုဗၚ်ရောၚ် အလဵုအသဳသေံ ကော်ဘိက်မံၚ်ဂှ် ဒှ်ပရေၚ်ဂုဏ်ဖဵုပိုန်ဒြပ်ကီုလေဝ် ကဵုဇြဟတ်ဟရိုဟ်ဂွံမာန်ဟွံသေၚ်ရောၚ် ဂကောံကောန်ဍုၚ်အရၚ်ဒေသသၠုၚ်ကျာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်ပရေၚ်ၜိုဟ်လလမ်ဍုၚ်ဗမာ ယဝ်ရအာတ်မိက်ကၠုၚ်မ္ဂး ဂကောံကောန်ဍုၚ်ရပ်လွဟ် နွံမံၚ်ဒေသပယျဵုမွဲဒမြိပ်တံကဵု ပရေၚ်ဆက်ဆောံအပ္ဍဲဍုၚ်တေံ ညံၚ်ဂွံဒှ်ကမၠောန်မာန် မၚ်ကဵုမံၚ်အရီုဗၚ်ရောၚ် ဝန်ဇၞော်ဍုၚ်သအာၚ်သေံ ဟီုလဝ် ပ္ဍဲဖေဖဝ်ဝါရဳ ၁၈ ရ။
နကဵုဗမာ ဒးစကၠောန်အာ ပရေၚ်သဳကၠဳအပ္ဍဲဍုၚ် ဗွဲကိုပ်ကၠာအိုတ် မဒှ်တုဲ သွက်ၜါလပါ် ညံၚ်ဂွံသဳကၠဳအာ နကဵုဍုၚ်သေံ စန်ဒက်ဆဝ်ဗ္ၚုဟ်အာ ဟွံသေၚ်၊ ပရေၚ်ၜိုဟ်လလမ်ဗမာဂှ် နူကဵုပရေၚ်ပ္ညဳပ္ညပ် အပ္ဍဲဍုၚ်ဟေၚ် ဒးမံက်ကၠုၚ်ရောၚ် ဟီုဂးလဝ်ရောၚ်။
ပ္ဍဲဖေဖဝ်ဝါရဳ ၁၈ ပ္ဍဲဍုၚ်ဖူကိတ်ဂှ် ဝန်ဇၞော်ဍုၚ်သအာၚ်ကံၚ်မယှေန်ပၞာန် ဥူတာန်သွိုဲကဵု ဝန်ဇၞော်ဍုၚ်သ္အာၚ်သေံ သဳဟာသက်တံ ဗွဲပလး အခိၚ်ဆဵုဂဗလဝ်ညးသ္ကံဂှ် ဟီုဂးလဝ်ရောၚ် လိက်ပရိုၚ်သေံတံ ချူလဝ်ရ။
နူလပါ် ကဝ်မယှေန်ပၞာန်ဂှ်လေဝ် အလဵုအသဳတိုန်တၟိဏံ ရန်တၟံပရေၚ်ဍုၚ်ဂွံညိဝပ်တုဲ ဂစာန်ကၠောန်အာ ပရေၚ်စန်ပကောံညဳသၟဟ် ကောန်ဂကူရောၚ်ကေုာံ သွက်ဂွံတက်အာကျာကဵု ဂကောံကောန်ဍုၚ်အရၚ် ရပ်လွဟ်တံကီု ရဲနွံပၟိက်ကဵုဒဳမဝ်ကရေသဳ ဂကောံဒစဵုဒစးတံကီု အလဵုအသဳတၟိပံက်လဝ်ဂၠံၚ်ရောၚ် ဥူတာန်သွိုဲ ဟီုလဝ် သဳဟာသက် သ္ဂးရ။
ယဝ်ရထိၚ်လဝ် ပရေၚ်ညိၚ်ဝပ်ပယျဵုမာန်မ္ဂး ဒှ်ကဵုဇြဟတ်ပရေၚ်ပိုန်ဒြပ်သေံမာန်တုဲ ဗီုလဵုဂွံလုက်စုက်အာ ဒးမၚ်ရံၚ်အာ အကာဲအရာရောၚ် နူကဵုကံၚ်သဳပရေၚ်အုပ်ဓုပ်ကာလအကြာ ကရေၚ်ဍာဲ ညးအုပ်ကာ ဥူဗညာ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ယဝ်ရ ဍေံတံထိၚ်လဝ်ပယျဵုညိင်အာမ္ဂး မွဲနဲမွဲဗီု ကဵုဇြဟတ်ပရေၚ်ပိုန်ဒြပ်သေံလေဝ်ဒှ်တုဲ ဗိုက်မွဲလတဲ ပိုတ်ၜါသ္ကုတ်လေဝ်ဒှ်အာ။ လၟေၚ်ကမၠောန်ဍေံတံကၠောန်မံၚ်ရ။ လ္တူဏံ ပိုဲဒးမၚ်ရံၚ်အာရောၚ်။ ကၠုၚ်ဗီုပြၚ်တၟိဟာ ဗီုပြၚ်အတိုၚ်ကၠာတေံရဟာ အခိၚ်လၟုဟ်ဏံ ပိုဲဟီုဟွံမာန်ဏီ” သာ်ဝွံ သ္ဂးရ။
စကၠောန်သဳကၠဳမံၚ်၊ ယှအ်ဖျေံပရေၚ်ပကီုပရာတ် ဗတိုက်မံၚ် ညးဍုၚ်ကွာန်တံမ္ဂး ဒှ်အထံက်ပၚ် ဍုၚ်ဗမာကဵုအာသဳယာန် သွက်ဂွံပြေပြံၚ်အာမာန်ရောၚ် လပါ်သေံ သ္ဂးလဝ်ရ။
ပရေၚ်ညိင်ဝပ်ပ္ဍဲဍုၚ်ဗမာဂှ် အလဵုအသဳသေံတံ မိက်ဂွံညာတ်တုဲ ယဝ်ရဒှ်ကၠုၚ်မ္ဂး သွက်ပရေၚ်ဂီုကၠီုဍုၚ်သေံလေဝ် ဂုဏ်ဖဵုနွံတုဲ အကြာပရေၚ်ပံၚ်တောဲပိုန်ဒြပ်အကြာၜါဍုၚ်လဝ် ဒးပြေပြံၚ်ဍာံရောၚ် ဝန်ဇၞော် သဳဟာသက် ဟီုလဝ်ရ။
တုဲပၠန် ပရေၚ်ဒှ်ဒွိၚ် အာသဳယာန်ကဵု ဍုၚ်ဂၠးကဝ်တံ ဟီုဂးမံၚ်တံဂှ်လေဝ် ကဝ်မယှေန်ပၞာန် ညံၚ်ဂွံသောၚ်ကလးအာ ဗတိုက်ဖအောဝ်လဝ်တုဲ အကြာဗမာကဵု အာသဳယာန် အတိုၚ်တင်တုပ်စိုတ်ဘုံ ၅ တၚ် ညံၚ်လမျီု ကလေၚ်ဂွံလုပ်အာဂှ် မူဝါဒသေံ မဒှ်ရောၚ် သ္ဂးရ။
ပြဿနာဍုၚ်ဗမာဂှ် သေံတံကၠိုဟ်ကေတ်ဟွံမာန်တုဲ အလဵုအသဳသေံ ဂွံသောၚ်ကလးအာ ကဵုဇြဟတ်ဟရိုဟ်ဟွံမာန်ပုဟ် ဥက္ကဌ ကမ္မတဳ ပရေၚ်အုပ်ဓုပ် ကံၚ်သဳဖိတ်ဒရေဝ်ဍုၚ်မန် MSFC နာဲမန်သာၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“သေံဂှ် အတိုၚ်တြေံရ။ ဍေံဂှ် ပယျဵုတိဍာ် ဆက်စပ်မံၚ်ကဵု ဍုၚ်ဗမာဏောင်။ ပရေၚ်ပိုန်ဒြပ်ကပေါတ်ဗၞိက်ဍေံတံ ဇွောဝ်လုပ်အာမံၚ်ဍုၚ်ဗမာဗွဲမဂၠိုၚ်။ သွက်ဂုဏ်ဖဵုဍုၚ်ဍေံ ဍေံတံနွံပၟိက်ကဵု ပရေၚ်ၜိုဟ်လလမ်ဍုၚ်ဗမာရ။ ဆဂး အဓိက ပြဿနာပရေၚ်ဍုၚ်ကွာန်ဍုၚ်ဗမာဂှ် မုရော အလဵုအသဳကီု သေံတံဗွဲမဂၠိုၚ်ကီု ဟွံကၠိုဟ်လဝ်ပုဟ် ပိုဲဂွံတီလဝ်။ နူကဵုအလဵုအသဳသေံလေဝ် ပြဿနာပရေၚ်အပ္ဍဲ ဍုၚ်ဗမာဂှ် မုလေဝ်ကဵုဇြဟတ်ဟရိုဟ်မာန်ဟွံသေၚ်ပုဟ်” သာ်ဝွံ သ္ဂးရ။
သွက်အရာညိၚ်ဝပ် ပရေၚ်ဂီုကၠီုဒေသပယျဵု၊ သွက်ဂွံဗတိုက်ပလီုအာ ပရေၚ်ကူသာန်သွံရာန် ဟွံလုပ်သၞောဝ်၊ ပရေၚ်ကူသာန်မၞိဟ်၊ သွံရာန်ဂဥုဲၜူမာဲတံ သွက်ဂွံပံၚ်တောဲဗတိုက်ပလီုဏာ အမှုရာဇဝတ်တတ်ကၠောံ အကြာၜါဍုၚ်တံ ညံၚ်ဂွံသၠုၚ်တိုန်အသိၚ်တံသဳကၠဳလဝ်ရောၚ် နူလပါ်ကဝ်မယှေန်ပၞာန် လလောၚ်ပတိတ်လဝ် ပရိုၚ်ရ။
အကြာၜါဍုၚ် ပရေၚ်ကူသာန်ဗၞိက်၊ ဗလိုက်တမ်ရိုဟ်၊ ပရေၚ်ပညာ၊ ပရေၚ်ထတ်ယုက်ညးဍုၚ်ကွာန်၊ ပရေၚ်သၟာကမၠောန်ဆုဲပြံၚ်ဗမာတံ ကဏ္ဍသွာၚ်စုၚ်ၚ် သဳကၠဳလဝ်ရောၚ်။
တုဲပၠန် စပ်ကဵုပရေၚ်ဒေသကေုာံ ပရေၚ်ဂၠးကဝ်တံအကြာၜါဍုၚ် ညံၚ်ဂွံပံၚ်တောဲအာသဳကၠဳလဝ်ရောၚ် ချူလဝ်တုဲ အတိုၚ်ဝန်ဇၞော် ဍုၚ်သ္အာၚ်သေံဟီုလဝ် သွက်ဂွံသဳကၠဳအာကဵု ရဲဒစဵုဒစးတံပံက်လဝ်ကဵုဂၠံၚ်ရောၚ် ကိစ္စဏံ ချူလဝ်ပ္ဍဲလိက်လလောၚ်တြးဂှ် ဟၟဲပုဟ်။
ပရိုင်-သြင်လောန်တိုၚ်မ်
Photo – MOI