မတ်မလီု၊ ဖေဖဝ်ဝါရဳ ၂၁
ပ္ဍဲဍုၚ်ဗမာ အခိၚ်ပၞာန်သီလဝ်အဝဵု ပွိုၚ်ကာလပန်သၞာံပြၚ်ဏံ ဟိုတ်နူဒပ်ပၞာန်ဗမာကဵု ဂကောံသၟဝ်တဲဍေံတံ စံၚ်ပလီုတုဲ သ္ၚိဌာန်မွဲကိုတ်ပြၚ်ၚ် ပၟတ်တူဆောံလေၚ်အာလဝ်နွံ ဂကောံသုတေသန Data For Myanmar လလောၚ်တြးလဝ်ရ။
စနူသၞာံ ၂၀၂၁ အခိၚ်သီအဝဵုတေံ ဒဵုကဵုသၞာံ ၂၀၂၅ ဂိတုအဝ်ဂတ် ပွိုၚ်ပန်သၞာံပြၚ်ဂှ် အကြာဒပ်ပၞာန်ဗမာကဵု ဂကောံပၠန်ဂတးတံ ဒှ်ပဋိပက္ခပၞာန်တုဲ သ္ၚိဌာန်ကောန်ကွာန်တံ ဒးဒုၚ်စံၚ်ပလီုလဝ်ရောၚ်။
ဒၞာဲကွာန်ဒေသ ဒှ်လဝ်ပဋိပက္ခပၞာန်တံဂှ် ဒပ်ပၞာန်ဗမာကဵုဂကောံသၟဝ်တဲဍေံတံ ထပက်ကရောၚ်ပၞာန်တုဲ သီကေတ် ကပေါတ်ၚုဟ်မးနွံနွံတံကီု စံၚ်ပလီုထောံလဝ်သ္ၚိ ကၠောန်လဝ်ပွတံဏံမဒှ်ရ။
ပ္ဍဲပွိုၚ်ပန်သၞာံပြၚ်ဏံ သ္ၚိကောန်ကွာန် ၁၁၅,၅၆၈ မ ပၟတ်တူ ဆောံလေၚ်အာဂှ် ပၞောဝ်အာမွဲအလုံဍုၚ်မ္ဂး ပ္ဍဲရးသဂိုၚ် ၆၅% ဆောံလေၚ်ဂၠိုၚ်အိုတ်ရောၚ် Data For Myanmar သ္ဂးရ။
ပ္ဍဲသၞာံ ၂၀၂၅ စနူဂိတုဂျောန် ဒဵုစိုပ်အဝ်ဂတ်ပၠန် ပ္ဍဲကဵုရးဒေသကဵု တွဵုရး ၈ ဒၞာဲ ကွာန် ၈၁ ကွာန်တံဂှ် သ္ၚိဌာန်ကောန်ကွာန်တံ ၂,၅၁၃ မ ဒးဒုၚ်စံၚ်ပလီုလဝ်ရောၚ် Data For Myanmar လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media