ဘာအင်၊ ဖေဖဝ်ဝါရဳ ၂၃
ဗော်သွးကောန်ဂကူကရေၚ် KNU အာဂတတုဲ ပေါဲသၠာဲဂတးလညာတ် ကောန်ဂကူကရေၚ် ပ္ဍဲကဵုသၞာံဂတမ္ဂး ကောန်ဗော် KNU တံပံက်ဂၠံၚ်ဍာန် သွက်ဂွံကၠောန်အာဇၟာပ်ပ်ဒၞာဲ လၟေၚ်သၞာံရောၚ် နူကဵုဗဟဵု KNU လလောၚ်တြးလဝ်ရ။
ကၠောန်အာပေါဲသၠာဲဂတးလညာတ် ကောန်ဂကူကရေၚ်မ္ဂး ပရေၚ်ဓရ်ကၠိုဟ်ခၠၚ် အကြာကောန်ဂကူကရေၚ်တံကီု ဇြဟတ် ပရေၚ်ပံၚ်တောဲတံ အခေါၚ်အရာခိုဟ်တိုန်မာန်တုဲ သွက်ဂွံကၠောန်အာလၟေၚ်သၞာံဂှ် နူကဵု KNU လလောၚ်တြးလဝ် တင်လစွံစိုတ် ပ္ဍဲဖေဖဝ်ဝါရဳ ၁၇ ရ။
တင်စၟဳစကောန်ဂကူကေုာံ တင်ရန်တၟံပရေၚ်ဍုၚ်ကွာန် ကောန်ဂကူကရေၚ်တံ သွက်ဂွံအံၚ်ဇၞးအာဂှ် KNU သ္ကိုပ်သ္ကတုဲ ကၠောန်လဝ် ပေါဲသၠာဲဂတးလညာတ်ကောန်ဂကူကရေၚ် စနူ ဖေဖဝ်ဝါရဳ ၉ ဒဵုစိုပ် ၁၂ မဒှ်ရ။
နူကဵုညးစၞး ဂကောံကရေၚ်ဂၠးကဝ်ကီု ဂကောံမှာဇန်ကရေၚ်တံ က္ဍိုပ်သ္ကိုပ် KNU ဗဟဵု၊ ခရိုၚ်တံကီု ညးစၞးဒပ် KNLA, KNDO သ္ကိုပ်ဒပ်ဂမၠိုၚ်ကဵု ကၟုဲတၟေၚ်ကော်ဘိက်လဝ်ညးစၞး ၁၃၀ တၠ တိုန်စိုပ်လဝ်ရောၚ် ချူလဝ်ပ္ဍဲတၚ်လလောၚ်တြးရ။
သ္ၚဳဂၠိပ်အကာဲအရာပရေၚ်ဍုၚ်ကွာန် ပကတိလၟုဟ်ဏံကေုာံ စပ်ကဵုကိစ္စဒက်ပတန် ဍုၚ်ကဝ်တူလေဝ် စပ်ကဵုပရေၚ်အုပ်ဓုပ် ပရေၚ်ပၞာန်ကဵု သွက်ဂွံခါန်ကၞက်စွံအာ ညးစၞး KNU ပ္ဍဲဍုၚ်ဂၠးကဝ် နာနာမာန်ဂှ် သဳကၠဳလဝ် ပေါဲသၠာဲဂတးလညာတ် ကောန်ဂကူကရေၚ် ဏံရောၚ်။
တုဲပၠန် စပ်ကဵုပရေၚ်ရဲဒဴပၞာန်ဂမၠိုၚ်တံ ကိစ္စပရေၚ်မၞိဟ်နာနာ၊ ကမၠောန်ကျာဖျလီသြန်အန်လိုၚ် မံက်တိုန်မံၚ်အကြာဒေသတံကီု ပရေၚ်အမှုရာဇဝတ် တတ်ကၠောံဍုၚ်တံလေဝ် သ္ၚဳဂၠိပ်လဝ်ရောၚ် KNU သ္ဂးလဝ်ရ။
ပ္ဍဲကဵုပေါဲဗတိုက်ပၠန်ဂတး ကောန်ဂကူကရေၚ်တံကဵု ပရေၚ်ဒက်ပတန် ဍုၚ်ကဝ်တူလေဝ်တံဂှ် တၠပညာစိုန်သကီုတံကီု သၟတ်လေပ်ပညာတံ ဒၞာဲတာလျိုၚ်စှ်ေဂှ် သွက်ဂွံပံၚ်ပစပ်အာကဵု ကွတ်ပညာ လေပ်စိုန်သကီုနာနာသာ်တံတုဲ သွက်ဂွံဒက်ပတန်အာ မွဲစွံမာန် KNU လလောၚ်တြးလဝ်ရောၚ်။
ပရိုၚ်-သြၚ်လောန်တိုၚ်မ်
Photo – Social Media