မျေအ်ကျဳဏာ ၊ ဖေဖဝ်ဝါရဳ ၂၃
ပ္ဍဲလက်ထက်အလဵုအသဳတၟိဏံ သွက်ဂွံထမံက်ရုပ်ရဴကိုန်စဳဇန် မျေတ်ဇြုင်မာန်ဂှ် နူသွာၚ်ဌာနကဝ်မယှေန်နာနာ ညးစၞးဌာနစုၚ်တံ ပ္ဍဲဖေဖဝ်ဝါရဳ ၂၀ ဂှ် ဆဵုဂဗညးဒေသတံ ပ္ဍဲတက္ကသိုလ်မျေအ်ကျဳဏာတုဲ စှ်ေလဝ်ပရေၚ်စန်ဒက်ရ။
အလဵုအသဳတၟိ သၠုၚ်ပတိုန်ပရေၚ်ပံၚ်တောဲကဵု ဍုၚ်ကြုက်ဂှ် ကၠောန်အာရောၚ် ဒုဂဥုပ်ဒပ်ပၞာန် သိုဝ်ဝေန်ဟီုလဝ် ပ္ဍဲပေါဲသဘၚ်ကြုက်ကၠောံသၞာံတၟိတုဲ ကိုန်စဳဇန်မျေတ်ဇြုင်ဏံ ကလေၚ်ပတဝ်ကၠုၚ်ရောၚ်။
အတိုၚ်လိက်ပရိုၚ်တြးဝါဒ ကၟိန်ဍုၚ်တံ ချူလဝ်မ္ဂး ဥက္ကဌ ကဝ်မယှေန် ပရေၚ်ဖောအ်ဗြဳဓါတ်လလဳ ဝန်ဇၞော်ရုၚ်သမ္မတ (၁) ဥူတေန်အံၚ်သာန်ကဵုဂကောံတံ စပ်ကဵုကိုန်စဳဇန်မျေတ်ဇြုင်ဂှ် အာသောၚ်ကလးမံၚ်ကဵု ညးဍုၚ်ကွာန်တံရ။
ပ္ဍဲကဵုထမံက်ရုပ်ရဴ ကိုန်စဳဇန်မျေတ်ဇြုင်ဏံ ၜိုတ် ၅ သၞာံ-၁၀ သၞာံ ကာလလံမာန်တုဲ ဒစးဒုၚ်ဖန်ဖက်လဝ်မှ သွက်မဇတၞောဝ်ဒတောဝ် အနာဂတ်တေံဓါတ်လလဳရုံဂပ်မာန်ရောၚ် ဝန်ဇၞော် ဥူတေန်အံၚ်သာန် ဟီုရ။
ဇြဟတ်ပၟတ်ဓာတ်လလဳတိတ်ကၠုၚ် နူကဵုကိုန်စဳဇန်မျေတ်ဇြုင်ဏံ သွက်စကာအပ္ဍဲဍုၚ်ဟေင်ကဵုဖျုန်ကၠောန်အာရောၚ် စန်ဒက်မံၚ် ညးဒေသတံ ဗီုဏံရ။
စကာဓါတ်လလဳ သွက်တွဵုရးတုဲ ဇြဟတ်ပဵုမံၚ်တံဂှ် ပါ်တြးကဵုအာ သွက်ဒေသဇၞော် တွဵုရးကောန်ဍုၚ်အရၚ်တံကီုလေဝ် ကိစ္စသွံအာဓါတ်လလဳသွက်ဍုၚ်ကြုက်ဂှ် သ္ၚိတ်ဇြမံၚ်ရောၚ်။
နူကဵုဍုၚ်မျေအ်ကျဳဏာ သ္ၚောဲအာၜိုတ် ၂၃ တိုၚ် ပ္ဍဲကဵုဒၞာဲၜဳမေခကဵု မလိခတံ ၜါသွာၚ်ပံၚ်အာလဝ်ဂှ် ကၠောန်အာကိုန်အစဳဇန် သွက်ဂွံပတိတ်အာဇြဟတ်ဓါတ်လလဳ ၜိုတ်မဂ္ဂါဝါတ် ၜါဠက် မဒှ်ရ။
ဇြဟတ်ဓါတ်လလဳ ဂွံနင်ဗွဲမဂၠိုၚ်တံဂှ် သွက်ဂွံသွံစကဵုဍုၚ်ကြုက်တုဲ ဟိုတ်နူကိုန်အစဳဇန်ဏံ ဒှ်ကၠုၚ်ပရေၚ်ဇီုကပိုက် ပရေအ်ပရေအ်တံဂှ် ညးဒေသကောန်ဍုၚ်ဗမာတံရ ဒးဒုၚ်အာဘဲဒဏ်မဒှ်ဂှ် ဟိုတ်နူ ဒစဵုဒစးတုဲ လက်ထက်သမ္မတဥူတိၚ်သိၚ်တေံ ဒးဒေါအ်ကၠုၚ်လဝ် ကိုန်အစဳဇန်ဏံရောၚ်။
ပ္ဍဲအခိၚ်သီအဝဵု ဟိုတ်နူလဝေၚ်ပၞာန် ၁၀၂၇ ဂှ် ဒပ်ပၞာန်ကြပ်ဒေါမ်စှ်ေ အာကီုလေဝ် ဟိုတ်နူအလဵုအသဳကြုက် ကလေၚ်ယဵုထ္ၜကဵုလဝ်ဂှ် ကလေၚ်ယာဇိုၚ်မာန်ကၠုၚ်တုဲ ဂစာန်ကၠောန်ကဵုကိုန်အစဳဇန်ကြုက် တံ မဒှ်ရ။
ကိုန်အစဳဇန်မျေတ်ဇြုၚ်ဏံ နွံမံၚ် ပ္ဍဲကတေၚ်တိကသဳသဂိုၚ် ၜိုတ် ၂၅ ကဳလဵုပြၚ်ဂှ် သွက်ဂွံဒုၚ်ဒဝ်ဘဲဒဏ်သဘာဝမာန် သိုၚ်ခၞံအာဏောၚ် ဒုဂဥုပ်ဒပ်ပၞာန် သိုဝ်ဝေန်ဟီုလဝ်ရောၚ်။
ဗီုပြၚ်သွက်ဂွံပါ်ပရအ်အာဍာ်တံကီု ဒဳဇြာၚ်ကၟာၚ်ဍာ်တံကီု အကာဲအရာ ကတေၚ်တိကသဳသဂိုၚ်တံကဵု ဗီုပြၚ်ညးတာလျိုၚ် နူသွာၚ်ဌာနစုၚ်တံကီု တၠပညာကဏ္ဍဆေင်စပ်တံ ပြုပြေၚ်ဖန်ဇန် မံၚ်ဂှ် ဆဵုဂဗသဳကၠဳလဝ်ကဵု ညးဒေသတံရောၚ် ကဝ်မယှေန်ပၞာန် တြးလဝ်ဝါဒရ။
တုဲပၠန်စပ်ကဵု အကာဲအရာကၠောန်မံၚ် ပရေၚ်ဖျေံစိုတ်ဂီုကၠီုနဲကဲပညာ တံ ဍာ်ဇၞော်မ္ဂး ဗီုပြၚ်ဂွံစဵုဒၞာအာ ကိစ္စသွက်ဂွံလေဲသြန်ၚုဟ်တိတံကဵု ပရေၚ်ပြံၚ်ပဆုဲမၞိဟ်တံ ညံၚ်ဂွံကိုက်ညဳကဵုဥပဒေ ကၠောန်မံၚ်ရောၚ် ကဝ်မယှေန်ပၞာန် သ္ဂးရ။
ယဝ်ရ ဂွံဓါတ်လလဳဇြဟတ်ဍာ်မ္ဂး လပအ်ညာတ်လဝ်တံဂှ် ထမံက်အာရုပ်ရဴမာန်တုဲ သွက်အနာဂတ်အပြံၚ်အလှာဲဒှ်ကၠုၚ်မ္ဂး ညံၚ်ဂွံဒုၚ်တဲအပြံၚ်လှာဲမာန်ဂှ် ညးပါလုပ်ဂကောံကံၚ်သဳစဵုဒၞာဲ ကောန်ဂကူကေုာံပရေၚ်ဂီုကၠီု ဒဝ်ဒဲဗူ ဗတိုက်ဖအောဝ်လဝ် ညးဒေသတံရ။
မွဲလပါ်ပၠန် ကမၠောန်အလဵုအသဳ ကဵုလဝ်အခေါၚ်ကၠောန်တံဂှ် သက်သဳဟွံခိုၚ်ဗိုန်မွဲသာ် ယဝ်ရဒစဵုဒစးမ္ဂးကေတ်အရေဝ်ရောၚ် နူကဵု ကံၚ်သဳစဵုဒၞာဲကောန်ဂကူကေုာံ ပရေၚ်ဂီုကၠီုပတိတ်လဝ်လိက်အမိၚ် ပ္ဍဲကဵုသၞာံအာတေံရ။
အယုက်အမိၚ်ဏံ စွံလဝ်အခိၚ်အပိုၚ်အခြာဟၟဲကီုလေဝ် နူကဵုပေါဲရုဲမာဲ ဒက်ပတန်အာ အလဵုအသဳတုဲမ္ဂး အတိုၚ်အမိၚ်ဏံကိန်အစဳဇန် အလဵုအသဳကဵုလဝ်အခေါၚ်တုဲတုဲတံ သွက်ဂွံဆက်ကၠောန်အာရောၚ် ညးလ္ၚတ်တံ သ္ၚဳဂၠိပ်လဝ်ရောၚ်။
ပရိုၚ်-သြၚ်လောန်တိုၚ်မ်
Photo – Social Media