မတ်မလီု ၊ ဖေဖဝ်ဝါရဳ ၂၃
ဟိုတ်နူဒပ်ပၞာန်ဗမာ မာတ်ဆိုအ်ဗက်ရပ်မံၚ်ဂှ်ရ ကပေါတ်ဗၞိက် လုပ်ကၠုၚ်နူဍုၚ်သေံ လပါ်ပယျဵုဗမာတံဗွဲမဂၠိုၚ် ပိုတ်အိုတ်မံၚ် ယျရောၚ် ရဲကူသာန်ဗၞိက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုပၞော်လုပ်တွဵုရးကရေၚ်၊ တွဵုရးမန်၊ ရးဒေသဗဂေါတံဂှ် ကဝ်မယှေန်ပၞာန် ဗက်မာတ်ဆိုအ်ရပ်ကေတ်မံၚ် ကပေါတ်ဗၞိက်သေံ တံကီု သီကေတ်ကပေါတ် ရပ်မံၚ်သီုမၞိဟ်ကီုတုဲ ရဲကူသာန်ဗၞိက်တံ ဟွံဂံၚ်ထပၠုပ်ကပေါတ်ရ။
ရဲကူသာန်ဗၞိက်တံဟွံဂံၚ်ထပၠုပ်ဂှ်ရ ကပေါတ်စၞစသုၚ်နွံမံၚ်ပၟိက် နာနာတံ ပ္ဍဲကဵုဗွဝ်ဖျာပိုတ်အာအိုတ် မဒှ်ရ။
ဟိုတ်နူထပၠုပ်နၚ် ကပေါတ်နူသေံတံဟွံဂွံ၊ ဒပ်ပၞာန်ဗမာတံ ရပ်သီကေတ်မံၚ်တုဲ ကပေါတ်ပိုတ်အာရဂှ် သၟာကူဗၞိက်ကပေါတ်သေံ မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲဖျာ မုကပေါတ်ဟၟဲရပုဟ်။ Colgate ဟၟဲပုဟ်။ သွက်ဂွံသုၚ် Coca Cola ဟၟဲပုဟ်။ Signal လေဝ် ရာန်ဟွံဂွံပုဟ်။ ကပေါတ်ပိုတ်အာအိုတ်ယျ” သာ်ဝွံ သ္ဂးရ။
တုဲပၠန် ကပေါတ်နူသေံလ္ၚဵု လုပ်ဂၠံၚ်ဒမၠုနွံကီုလေဝ် ၚုဟ်မးကပေါတ် သၠုၚ်တိုန်မံၚ် ၃-၄ ဆတုဲ ရပ်စပ်စကာဟွံမာန်ပုဟ် ညးဆက်ဟီုရ။
နူလပါ်ဂၠံၚ်ဍာ်ဂှ် ကဝ်မယှေန်ပၞာန် ကဵုပလံၚ်မံၚ် ကပေါတ်ဗၞိက်သေံ ကီုလေဝ် အတိုၚ်ကဠာဗၞိက်ခုတ်စၟတ်ဂှ်ဟေင် ကဵုအခေါၚ်ဂှ်တုဲ သွက်ရဲကပေါတ်အောန်န်တံ ဒှ်အာတၚ်ဝါတ်ဂါတ်ရ။
ပလံၚ်ကပေါတ်သေံ နူကဵုဂၠံၚ်ဍာ်ပၠန်တှ်ေလေဝ် အခိၚ်လအ်ဂၠိုၚ်၊ စရိတ်လေဝ်အိုတ်ဂၠိုၚ် ဟိုတ်နူ စေဝ်ပၞောန်ကဝ်မယှေန်ပၞာန် ဂၠိုၚ်လောန်တုဲ ပၠုပ်နၚ်ကပေါတ်လေဝ်ဟွံလောဲသွာပုဟ် ဒှ်မံၚ်အကာဲအရာ ဗီုပြၚ်ဏံရောၚ်။
စၞးစကာသုၚ်စောဲမံၚ် ကပေါတ်သေံတံဂှ် နူကဵုအပ္ဍဲဍုၚ် ကၠောန်ဗတိတ်လေဝ်ဟွံမာန်တုဲ အခေါၚ်ပၠုပ်နၚ်နူကဵုဒေသ ပယျဵုဂှ်လေဝ် ကၟာတ်ထောံလဝ်ဂှ်တှ်ေ ညံၚ်ကောန်ဍုၚ်ကွာန်တံ ဂွံဒှ်အခက်အခုဲ ကဝ်မယှေန်ပၞာန်ဗမာ ကၠောန်မံၚ်ရောၚ် သၟာပရေၚ်ပိုန်ဒြပ်တံ ပါ်ပါဲမံၚ်ရ။
သွက်ဍုၚ်ဗမာ ဂွံသုၚ်စောဲစကာအာ ဒးရာန်ပၠုပ်ကေတ်နင်ကပေါတ် နူကဵုဍုၚ်သေံ မပ္တံကဵု ကပေါတ်စသုၚ်သ္ဇိုၚ်၊ ဂဥုဲ၊ ကပေါတ်ကျိုင် ပယျေဝ်၊ ကပေါတ်သိုၚ်ခၞံကဵု ကပေါတ်စကာပရေၚ်နာနာသာ်တံ အဓိက ဒးရာန်ပၠုပ်မံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – MOI