ဝါယှေန်တန်၊ ဖေဖဝ်ဝါရဳ ၂၃
သွက်ဂွံကေတ်အာပရေၚ်တုပ်စိုတ် ကိုန်နျူကလဳယာမွဲမွဲ ညံၚ်ဂွံကဵုအာဇြဟတ်ဟရိုဟ်ကု က္ဍိုပ်သ္ကိုပ်အဳရာန်မာန်ဂှ် သွက်ဂွံဗတိုက် နကဵုသ္ကုတ်အပိုၚ်အခြာဂှ် ချပ်မံၚ်ရောၚ် သမ္မတအမေရိကာန် ဒဝ်နေဝ် ထရဟီုရ။
သွက်ဂွံဗတိုက်အာ အဳရာန်ဒှ်မာန်ရောၚ် ညးတာလျိုၚ်တံဟီုတုဲ အစာပရိုၚ်မွဲတၠသၟာန်လဝ်ဂှ် ထရ ဟီုလဝ်ရ။
အကြာပွိုၚ် ၁၀ ဏံ ယဝ်ရအဳရာန် ဟွံကေတ်တၚ်တုပ်စိုတ်မွဲမွဲဗီုမ္ဂး ဒးဆဵုဂဗအာကဵု အကာဲအရာပရေအ်ပရေအ်တံရောၚ် ထရ ဟီုလဝ် ပ္ဍဲဖေဖဝ်ဝါရဳ ၁၉ ရ။
စနူကဵုသတ္တဟတုဲဏံ ပ္ဍဲကရပ်အဳရာန်ဂှ် အမေရိကာန် ထပ်ဖျေံဂလိုၚ်လဝ်ဇြဟတ်ပၞာန်တုဲ ၜၚ်ဖ္ဍိုက်ၜၚ်ကျာဇၞော်အိုတ်အမေရိကာန် ယူအက်က်ဂါရက်အာဖိုဒ်လဝ် စိုပ်မံၚ်ဗလးဍာ် ဒေသဗၟံက်အဒေါဝ် မဒှ်ရ။
အဳရာန် သွက်ဂွံပတိတ်လွဟ်နျူကလဳယာ ချပ်ဇန်မံၚ်ရောၚ် အမေရိကာန်ကဵု မဟာမိတ်ယူရောပ်တံ သံသယနွံမံၚ်ဂှ် အဳရာန် ကယျာန်တးပါဲလဝ်လၟိုန်ရောၚ်။
စပ်ကဵုပရေၚ်ကိစ္စတံဏံ ညးတာလျိုၚ်အမေရိကာန်ကဵု အဳရာန်တံ ဆဵုဂဗလဝ် ပ္ဍဲဍုၚ်သိပ်ဇြာလန်ဂှ် အကာဲအရာပရေၚ်တဴတက်နွံမံၚ် ဂွံတီရ။
တၚ်တုပ်စိုပ်အပြောံမွဲ အဳရာန်တံချူတုဲ ပ္ဍဲတ္ၚဲအကြာတံဏံ ပလံၚ်ဗစိုပ်ဏာ ညးစၞးအမေရိကာန် သတိဗ်ဝေတ်ကအ်ရောၚ် ဝန်ဇၞော်ဍုၚ်သအာၚ်အဳရာန် ဟီုလဝ် ပ္ဍဲဖေဖဝ်ဝါရဳ ၂၀ သ္ဂးရ။
နူကဵုအမေရိကာန် ဖျေံစွံလဝ်ၜၚ်ဖ္ဍိုက်ၜၚ်ကျာကဵု ၜၚ်ပၞာန်ဗွဲမဂၠိုၚ် ကရပ်အဳရာန်တုဲ အဃောကဵုမံၚ်ဇြဟတ်ဟရိုဟ်ဏံ အကြာၜါဍုၚ်သဳကၠဳအာမံၚ် ပ္ဍဲဂျဳနဳပါ မဒှ်ရ။
နူကဵုအဳရာန်လေဝ် သၠုၚ်လဝ်ဇြဟတ်ပၞာန်တုဲ ကလေၚ်ဗတိုက်အာ အမေရိကာန်ရောၚ် က္ဍိုပ်သ္ကိုပ်အဳရာန်အဆံၚ်သၠုၚ်အိုတ် အလဳခါမေနဳ ဟီုဘပဠလဝ် ပ္ဍဲမဳဒဳယာမဟာဇန်ကီုရ။
အမေရိကာန် ဗလးလဝ်ၜၚ်ပၞာန် ဇရေၚ်အဳရာန်တေံ သမ္မတထရ ဟီုမံၚ်လၟိုန်တုဲ ၜၚ်ပၞာန်ဟီုဂှ် ဒှ်လွဟ်လက်နက်အန္တရာဲနွံမာန်ကီုလေဝ် မကမ်သၠောဝ်အဳရာန်တံ ထဗၠိုက်ဖျေံထောံသၟဝ်ဂတာမှာသၟိဟ်ၜဳရောၚ် ခါမေနဳ ကလေၚ်ဟီုပ္လန်လဝ်ရောၚ်။
အစာပရိုၚ်တံ သၟာန်လဝ် ထရ ကလေၚ်သှ်ကဵုမံၚ်တံဂှ် မုလေဝ်သ္ပသမ္တီခိုၚ်ၚ်ဟွံဂွံတုဲ ဗီုညးတေံဟီုကဵု ဗီုညးတေံကၠောန်ဂှ် မွဲဏှမွဲဏှ ဒှ်အာမံၚ်ညးမွဲမွဲဗီုမာန်ရောၚ်။
Ref:BBC