မတ်မလီု ၊ ဖေဖဝ်ဝါရဳ ၂၄
ပ္ဍဲတွဵုရးမန် ကၠာဟွံဒက်ပတန် အလဵုအသဳတၟိဏီ သွက်သ္ကိုပ်အုပ်ဓုပ် အရာပ်/ကွာန်တံဂှ် နူကဵုကဝ်မယှေန်ပၞာန်တွဵုရး ဖျေံကဵုမံၚ် ပါမေတ် ပေါဲဝိုင်ဝေၚ်တံ အဆက်က်ရောၚ် ဂွံတီနူရဲကြပ်ကဵု ကဝ်မယှေန်ပၞာန်တံရ။
အခိၚ်ဟွံဂွံပံက် အလဵုအသဳတၟိဏီ အကြာဏံဂှ် ဂကောံအလဵုအသဳ တွဵုရးမန် သ္ကိုပ်ဝန်ဇၞော် ဥူအံၚ်ကျဳတိၚ်တံ ကဵုမံၚ်အခေါၚ် ဖျေံကဵုမံၚ် ပါမေတ် ပေါဲဝိုင်ဝေၚ်တံ အဆက်က် မဒှ်ရ။
ပ္ဍဲကဵုပံက်အလဵုအသဳမ္ဂး ဥူအံၚ်ကျဳတိၚ်ဂှ် သွက်ဒၞာဲသ္ကိုပ်ဝန်ဇၞော် ဟွံချိုတ်ပၠိုတ်ဒှ်မံၚ်တုဲ အခိၚ်ညးကေတ်မံၚ်တာလျိုၚ်ဏံ ၜိုတ်ဂွံကဵုဂွံ ဇျှာပ်ကေတ်အာရောၚ် ညးဂမၠိုၚ်ပါ်ပါဲမံၚ်ရောၚ်။
အတိုၚ်သ္ကိုပ်အုပ်ဓုပ်မွဲတၠ စၞးဟီုဂးလဝ်ဂှ် ထပက်အဇာတုဲ ဟီုစုတ်လဝ်ဗီုဏံရ။
“ပြဟ်ဟ်ဏံ ကောန်ၚာ်တံ သှ်မံၚ်လိက်တုဲ ဝိုင်ဝေၚ်ဒေါအ်လဝ် မွဲအံၚ်ကၠာ။ တုဲတှ်ေ ကဵုအာအခေါၚ်ပေါဲဇၞော်ဇၞော်ဏောၚ်။ သ္ကိုပ်ဝန်ဇၞော် ကဵုအာအခေါၚ်ပေါဲ သွက်ညးဖအိုတ်ဏောၚ်။ မုဒှ်ရောတှ်ေ သ္ကိုပ်ဝန်ဇၞော်ဂှ် ညးတေံဒှ်ချိုတ်ပၠိုတ်ဟွံသေၚ်ပုဟ်။ အခိၚ်လၟုဟ် ၜိုတ်ဂွံကဵုဂွံ ညးတေံဇျှာပ်ကေတ်ဏာ” သာ်ဝွံ သ္ကိုပ်အုပ်ဓုပ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲပၠန် ပံက်အလဵုအသဳတၟိတုဲမ္ဂး ပ္ဍဲတွဵုရးဂှ် ဒးကလေၚ်ရုဲစှ် သ္ကိုပ်အုပ်ဓုပ်တၟိ သီုဖအိုတ်တုဲ သွက်သ္ကိုပ်အုပ်ဓုပ်တံလေဝ် ပံက်လဝ်ကဵုအခေါၚ် ပၞော်စကီုရောၚ် ညးဆက် ပါ်ပါဲလဝ်ရောၚ်။
အခိၚ်ကၠာတေံ ပ္ဍဲကဵုပေါဲသဘၚ်ဂမၠိုၚ် ဟွံကေၚ်ကဵုလဝ်အခေါၚ် ပံက်ဝိုၚ်ဝေၚ်ကီုလေဝ် လက်ထက် ကဝ်မယှေန်ခါန်ကၞက် သ္ကိုပ်ဝန်ဇၞော် ဥူအံၚ်ကျဳတိၚ်ဏံ ညံၚ်ရဴလုပ်သၞောဝ် ကဵုလဝ်အခေါၚ် ဝိုၚ်ဝေၚ်တံရ။
ပေါဲသဘၚ်ကျာ်၊ လံၚ်ဗဗေၚ်ဇၞော်၊ ကထိုန်ကဵုပေါဲ အခိၚ်ရာသဳတံ ဟွံသၟးက ထ္ၜးဟိုတ်နာနာတုဲ ဗ္ဒျ်ပေါဲ ကဵုလဝ်အခေါၚ်ပံက်ဝိုၚ်ဝေၚ် တံရ။
ဂွံကၠုၚ်သြန်အကံက် နူကဵုဝိုၚ်ဝေၚ်တံမ္ဂး ညးတာလျိုၚ် ဂကောံအလဵုအသဳအဆံၚ်ၚ်တံကဵု ညးတာလျိုၚ်ပၞာန် နူကဵုဌာန်ပၞာန် ရးအဂၞဲ တံ ပါ်ပရအ်ကေတ်သြန်တံဏံရ။
ပ္ဍဲကဵုတွဵုရးမန် ဟိုတ်နူဝိုၚ်ဝေၚ်ဂှ် ပရေၚ်ကၠတ်ကွဳလိုန်ဓါတ်၊ ပၠံၚ်ၜး ကၠတ်ဂၠံက်စ ဒှ်မံၚ်မွဲဏှမွဲဏှတုဲ ကောန်ၚာ်ကွးဘာဂမၠိုၚ် စရိုတ်လီုလာ်မံၚ်ဂှ်တှ်ေ နူကဵုကဝ်မယှေန်ပၞာန် ညိလေဝ် သ္ပဂရုရောၚ်။
ပရိုၚ်-သြၚ်လောန်တိုၚ်မ်
Photo-Social Media