ပိုင်ကြုၚ်၊ ဖေဖဝ်ဝါရဳ ၂၅
ပ္ဍဲတိဍာ် ဌာန်ဂအုပ်ဗဟဵု KNU ဒၞာဲမဟာဒပ် ၇ ဂှ် ဟိုတ်နူ ကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်ဂှ်ရ အကြာၜါလပါ် ဒှ်ပေါဲဗတိုက်တုဲ ညးဒေသတံ ဒစးဒုၚ်ဂြိပ်ပါဲမံၚ် အိုတ်ဂှ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူဖေဖဝ်ဝါရဳ ၂၃ တုဲ ကရောၚ်ပၞာန် ဒပ်ကဝ်မယှေန်ပၞာန်ထပက်လုပ်စိုပ်ကၠုၚ် ဍုၚ်ပိုၚ်ကြုၚ်ဂှ် ဒှ်ပေါဲဗတိုက်ကဵု KNU မဟာဒပ် ၇ တံရ။
အဃောကရောၚ်ပၞာန် ထပက်ကၠုၚ်မံၚ်ဂှ် နူကဵုဒပ်ကဝ်မယှေန်ပၞာန် ပန်ပလံၚ်မံၚ်ကဵုလွဟ်ဇၞော်တုဲ ဖေက်ပေါဲဗတိုက်ဇၞော်ကၠုၚ်ဂှ်ရ ညးဒေသပွဳဗွိုၚ် ဍုၚ်ပိုၚ်ကြုၚ်တံ ဂြိပ်ပါဲတိတ်အာဒၞာဲဗၠးဘဲတံရောၚ် ညးဒေသတံ သ္ဂးရ။
ပ္ဍဲကဵုတွဵုရးကရေၚ် အခိၚ်ကာလပေါဲရုဲမာဲတုဲကၠုၚ်ဏံ ကဝ်မယှေန်ပၞာန် ထပ်ထပဵုဂလိုၚ်လဝ်ဇြဟတ်ပၞာန် အကြာဂၠံၚ် လိုၚ်ဗၠဲ-ပိုၚ်ကြုၚ်ဂှ်တုဲ လုပ်ဖျေံကၠုၚ်ဒပ် ပ္ဍဲကဵုဍုၚ်ပိုၚ်ကြုၚ်၊ ပ္ဍဲဖေဖဝ်ဝါရဳ ၂၃ ဂှ်တှ်ေ ထပက်ကရောၚ်ပၞာန် အကြာပွဳဗွိုၚ်ဍုၚ်ပိုၚ်ကြုၚ်တုဲ ပန်မံၚ်ကဵုလွဟ်ဇၞော်တံရောၚ်။
သွက်ဂွံကလေၚ်ထိၚ်ချုက် ဒၞာဲတိဍာ်မဟာဒပ် ၇ ဗ္ဒိုပ်ဗျူဟာ တာလေဝ်ကဵုဗ္ဒိုပ်ပၞာန်တံမာန် ကရောၚ်ပၞာန်ဒပ်ကဝ်မယှေန်ပၞာန်တံ တတ်ကၠောံဒဵုဒဝ်နတုဲ ထပက်ကၠုၚ်ကရောၚ်ပၞာန်ရောၚ် ညးလ္ၚတ်ပရေၚ်ပၞာန်မွဲတၠ ဟီုရ။
သွက်ဂွံကၠောန်အာပရေၚ်လဝေၚ်ပၞာန် ဍုၚ်လိုၚ်ဗၠဲ၊ ကအ်ကြိက်၊ ဗြဝတဳကဵု ဍုၚ်ဘာပန်တံမာန် စနူကဵုဂိတုဂျာန်နဝါရဳဂှ်ရ ဒပ်ကဝ်မယှေန်ပၞာန်ပလံၚ်နၚ်လဝ် လွဟ်ဇၞော်၊ ကွဳစက်ကာခြပ်တံကဵု ဖျေံစွံလဝ်ဇြဟတ်ပၞာန် အပ္ဍဲကဵုတွဵုရးကရေၚ် ဗွဲမဂၠိုၚ်ရ။
စနူကဵုသၞာံတၟိဏံမံက်ဂှ် ပ္ဍဲဒၞာဲ KNU မဟာဒပ် ၅ ပွိုၚ်ဍုၚ်ဘာပန်၊ မဟာဒပ် ၆ ပွိုၚ်ဍုၚ်ကအ်ကြိက်ကဵု ဗြဝတဳ၊ မဟာဒပ် ၇ ပွိုၚ်ဍုၚ်လိုၚ်ဗၠဲကဵုပိုၚ်ကြုၚ်တံ ညံၚ်ကလေၚ်ဂွံထိၚ်ချုက်ဗ္ဒိုပ်မာန် ဒပ်ကဝ်မယှေန်ပၞာန် ဂစာန်ကၠုၚ်မံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media